މި ވަގުތު ވެސް ވެރިކަމާ ހަވާލުވާން ތައްޔާރަށް ހުންނެވި ކަމަށް އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ކޮންގްރެސްގެ ރިޔާސަތުގައި އިންނެވި ނަޝީދު އެހެން ވިދާޅުވީ އެ ޕާޓީގެ ގައުމީ މަޖިލިސް މެންބަރު، އަހުމަދު ސަލީމް ދެއްކެވި ވާހަކައަކާ ގުޅިގެންނެވެ.
"މި ސިކުންތުގައި ވެސް ދައުލަތާ ހަވާލުވުމަށް އަޅުގަނޑު މި ހުރީ ތައްޔާރަށް،" ނަޝީދު ވިދާޅުވި އެވެ.
ނަޝީދު އެހެން ވިދާޅުވުމުގެ ކުރިން އެމްޑީޕީގެ އަސާސީ ގަވާއިދަށް ހުށަހަޅާފައިވާ އިސްލާހުތަކަށް ބަހުސްކުރައްވަމުން ސަލީމް ވިދާޅުވީ އެ ޕާޓީގެ އިދާރީ އޮނިގަނޑު އޮންނާންވާނީ ކޮންމެ ވަގުތެއްގައި ވެސް ސަރުކާރާ ހަވާލުވެވޭ ގޮތަށް ކަމަށެވެ.
"އަޅުގަނޑު ވިސްނާ ގޮތުގައި މި ޕާޓީގެ އިދާރީ އޮނިގަނޑު އޮންނާން ޖެހޭނީ އެ ވަގުތު ދައުލަތް އޮތް ގޮތަށް އިންތިޒާމު ކުރެވިފައި، އޭރުން މާދަމާ ވެސް ހަވާލުވާން ފަސޭހަވާނީ،" ސަލީމް ވިދާޅުވި އެވެ.
މިހާރު މި ހިނގާ ޕީއެންސީގެ ސަރުކާރު ފަދަ ނޭއްގާނީ ސަރުކާރުތައް ހިނގަމުންދާ ވަގުތެއްގައި ކޮންމެ ވަގުތެއްގައި ވެސް ވެރިކަމާ ހަވާލުވާން ރައްޔިތުން އަންގަފާނެ ކަމަށް ސަލީމް ވިދާޅުވި އެވެ.
"މިހާރު އަޅުގަނޑުމެންގެ ކުރިމަތީގައި މި އޮތް ސުވާލަކީ، އަޅުގަނޑުމެން ގޮތަކަށް އިންތިޒާމު ވާނީތޯ ފަހުން ދައުލަތް ބަދަލުކުރާނީތޯ؟ ނޫނީ އަޅުގަނޑުމެން އިހަށް މަޑުކޮށްފައި ދައުލަތަށް ބަދަލުގެނެސްފައި ދެން އަޅުގަނޑުމެން ބަދަލުަވާނީތޯ؟" ސަލީމް ވިދާޅުވި އެވެ.
