ރާއްޖޭގެ ހިންގުމުގެ ނިޒާމް ބަދަލު ކުރަން އިދިކޮޅު އެމްޑީޕީ އިން މަސައްކަތް ކުރުމަށްޓަކައި، ކުރީގެ އިގްތިސާދީ މިނިސްޓަރު ފައްޔާޒް ހުށަހެޅުއްވި "ބޮޑު ބަދަލު" ކަރުދާސް އެ ޕާޓީ އިން މިއަދު އެންޑޯޒްކޮށްފި އެވެ.
އެމްޑީޕީ އިން މިވަގުތު ކުރިއަށްގެންދާ ކޮންގްރެސްގައި އެ ކަރުދާސް ފާސްވެފައި ވަނީ 520 ވޯޓުންނެވެ. އެހެންކަމުން ބޮޑު ބަދަލު ކަރުދާހަކީ މިހާރު އެމްޑީޕީ އިން ގަބޫލު ކުރާ ސިޔާސަތެވެ.
ބޮޑު ބަދަލު ކަރުދާހުގައި ހިމެނޭ އެންމެ ބޮޑު ބަދަލަކީ، ދައުލަތުގެ ވެރިޔަކާއި ސަރުކާރުގެ ވެރިޔަކު އިންތިހާބު ކުރުމެވެ. އެ ކަރުދާހުގައިވާ ގޮތުން، ސަރުކާރުގެ ވެރިޔާ އިންތިހާބު ކުރާނީ ރައްޔިތުންގެ ސީދާ ވޯޓަކުންނެވެ. އަދި ދައުލަތުގެ ވެރިޔާ އިންތިހާބު ކުރާނީ މަޖިލީހާއި ކައުންސިލްތަކުން ނަގާ ވޯޓަކުންނެވެ.
ގާނޫނުއަސާސީގައި އެކަށައަޅާފައިވާ މައިގަނޑު އުސޫލުތައް ރައްކާތެރި ކުރުމަށާއި މިނިވަން މުއައްސަސާތަކާއި ފަނޑިޔާރުގެއަށް މަޖިލީހާއި ވެރިކަން ކުރާ ފަރާތުގެ ބާރު ނުހިންގޭނެ ގޮތަށް ނިޒާމު ބަދަލު ކުރުން ވެސް "ބޮޑު ބަދަލު" ގެ ތެރޭގައި ހިމެނެ އެވެ.
ފައްޔާގެ ށަހެޅުއްވުމަކީ ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކި ކުރަން ރައްޔިތުންގެ ރުހުން ހޯދަންޖެހޭ ގޮތަށް ބަދަލު ކުރުމެވެ. އަދި ރައްޔިތުންގެ މަޖިލީހުގައި އަތޮޅުތައް ތަމްސީލު ކުރެވޭނެ ގޮތެއް ހަދައި، މަޖިލިސް މެންބަރުން ރިކޯލް ކުރެވޭނެ މަގު ފަހި ކުރުން ވެސް އެ ބަދަލުތަކުގެ ތެރޭގައި ހިމެނެ އެވެ.
އޭގެ އިތުރުން، މަޖިލީހުގެ މެންބަރުން ޕާފޯމް ނުކުރެވޭނެ ނަމަ ރިކޯލް ކުރެވޭނެ ގޮތަށް ރައްޔިތުންނަށް ބާރު ދިނުމާއި ރައްޔިތުންނަށް ލިބިދޭ ބާރުތައް ގާނޫނުއަސާސީގައި ތަފުސީލު ކުރުން ވެސް ބޮޑު ބަދަލުގެ ތެރޭގައި ހިމެނެ އެވެ.
ބޮޑު ބަދަލުގެ ކަރުދާސް އެމްޑީޕީގެ ކޮންގްރެސްއަށް ހުށަހަޅުއްވަމުން ފައްޔާޒް ވިދާޅުވީ، ރައްޔިތުންގެ ހައްގުތަކަށްވުރެ ވެރި މީހާގެ ބާރުތައް ގިނަވުމުން ހިންގުމުގެ ނިޒާމާމެދު ވިސްނާލަންޖެހޭ ކަމަށެވެ.
"ރައްޔިތުންގެ މަޖިލީހުގެ ސުޕަ މެޖޯރިޓީ ޕީއެންސީގެ ސަރުކާރުން ނަގައި ގާނޫނުއަސާސީގައި އެހެރަ ހުރިހާ ޗެކްސް އެންޑް ބެލެންސެސްގެ މަހްފޫމްތައް ދުއްވާލާ ވެރިމީހާގެ ހައްގުތައް މި އޮންނަނީ. ރައްޔިތުންގެ ހައްގުތަކެއް ނޫން. އެހެންވީމަ މި ނިޒާމާމެދު އަޅުގަނޑުމެން ވިސްނަން ޖެހެނީ،" ފައްޔާޒް ވިދާޅުވި އެވެ.
