އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ދުނިޔޭގެ ރޭންކިންގައި ޑްރޮޕް-ނީ ކެޓަގަރީގެ މި އަހަރު 12 ވަނަ ބޮޑީބޯޑަރުގެ މަގާމު ރާއްޖޭގެ އެއް ވަނަ ބޮޑީބޯޑަރު އަލީ ހުޝްރުވާން (ކުޑަ އައްޔަ) އަށް ލިބިއްޖެ އެވެ.
ކުޑަ އައްޔަ އަށް ދުނިޔޭގެ ރޭންކިންގެ މި ވަރުގެ ބޮޑު ކުރިއެރުމެއް ލިބިފައިމިވަނީ މިދިޔަ މަހު މާލޭގައި ކުރިއަށްދިޔަ އައިބީސީ ވިޒިޓް މޯލްޑިވްސް ޕްރޯ 2022 މުބާރާތުގައި ސެމީ ފައިނަލުގައި ވާދަކޮށްގެންނެވެ. ކުޑަ އައްޔަ އަކީ ރާއްޖޭގެ ތާރީހުގައި ވެސް އައިބީސީ މުބާރާތެއްގެ ސީނިއާ ކެޓަގަރީގެ ގަދަ ހަތަރެއްގައި ހިމެނުނު ފުރަތަމަ ބޮޑީބޯޑަރެވެ.
މޯލްޑިވްސް ޕްރޯގައި ކުޑަ އައްޔަ ވަނީ އޭރު ދުނިޔޭގެ ދެ ވަނައިގައި އޮތް ޓަނާ މެކްޑެނިއަލް ވެސް ބަލިކޮށްފަ އެވެ.
މި އަހަރުގެ އައިބީސީ ޓުއާގައި ޑްރޮޕް-ނީ ޑިވިޝަން ނިމުނުއިރު، ދުނިޔޭގެ ރޭންކިން އެއް ވަނައިގައި އޮތީ 4000 ޕޮއިންޓާ އެކު ހަވާއީގެ ޑޭވް ހުބާޑް އެވެ. މިއީ އޭނާ އަށް ދުނިޔޭގެ ޗެމްޕިއަންކަން ލިބުނު ނުވަ ވަނަ ފަހަރެވެ. އޭނާ އެ ކާމިޔާބީ ހޯދީ މި މަހު ޕޯޗުގަލްގެ ސިންޓްރާގައި ކުރިއަށްދިޔަ އައިބީސީ ސިންޓްރާ ޕްރޯގެ ޑްރޮޕް-ނީ ޗެމްޕިއަންކަން ހޯދައިގެންނެވެ.
ދެ ވަަނައިގައި އޮތް ފްރާންސްގެ އަމައުރީ ލެވާން އަށް 3720 ޕޮއިންޓް ލިބިފައިވާއިރު، ތިން ވަނައިގައި ދެ ބޮޑީބޯޑަރަކު އެބައޮތެވެ. އެއީ 2680 ޕޮއިންޓް ހޯދާފައިވާ ދެކުނު އެފްރިކާގެ އައިން ކޭމްޕްބަލް އާއި ރީޔޫނިއަންގެ ފަބިއަން ތަޒާ އެވެ.
ފަސް ވަނައިގައި ހަވާއީގެ ސެމީ މޮރެޓީނޯ އަށް ވަނީ 2320 ޕޮއިންޓް ލިބިފަ އެވެ. ހަ ވަނައިގައި އޮތް އިޒްރޭލުގެ ހެން ހައީމް ވަތޫރީގެ 2070 ޕޮއިންޓް އޮތްއިރު، ހަތް ވަނައިގައި އޮތް ކަވިކާ ރޯރްކަމާއި އަށް 1860 ޕޮއިންޓް ވަނީ ލިބިފަ އެވެ. އަށް ވަނައިގައި އޮތް އެމެެރިކާގެ މެކް ކްރިލީގެ 1830 ޕޮއިންޓް އޮތްއިރު، ނުވަ ވަނައިގައި އޮތް ހަވާއީގެ ކެލެން ޔަމަސާކީ އާއި އެކުއެޑޯގެ ޖެރިކޯ ރޮސޭރޯ އަށް ވަނީ 1720 ޕޮއިންޓް ލިބިފަ އެވެ. އޭގެ ފަހަތުން، 12 ވަނައިގައި ރާއްޖޭގެ ކުޑަ އައްޔަ އޮތީ 1460 ޕޮއިންޓް ހޯދައިގެންނެވެ. ދެން ރޭންކް ކޮށްފައިވާ ހަވާއީގެ ޕޮހާކަކުއެެއާ ކެކައުއާލުއާ އަށް ވަނީ 1400 ޕޮއިންޓް ލިބިފަ އެވެ.
މި ފަހަރުގެ ވިޒިޓް މޯލްޑިވްސް ޕްރޯ ފެށުމުގެ ކުރިން، ކުޑަ އައްޔަ ބުނީ މިއީ އޭނާގެ ކެރިއަރުގެ އެންމެ ބޮޑު ޗެލެންްޖް ކަމަށެެވެ. އެ ޗެލެންޖްގެ ދެ ޑިވިޝަނެއްގައި ވާދަކޮށް، ކުޑަ އައްޔަ ވަނީ ޑްރޮޕް-ނީ ޑިވިޝަންގެ ގަދަ ހަތަރަކުން ޖާގަ ހޯދައި، ކެރިއަރުގެ މުހިންމު ހިސާބަކަށް ވާސިލްވެފަ އެވެ.
