އެހެން އިންޝުއަރެންސް ޕޮލިސީ ހުންނަ މީހުންނަށް އާސަންދަ ދިނުމުގެ ކުރިން އެ އިންޝުއަރެންސް ޕޮލިސީތަކުން ކަނޑާ ގޮތަށް މި މަހު ބަދަލު ގެންނާނެ ކަމަށް ބުނުމަށް ފަހު، އެ ސިޔާސަތު ތަންފީޒުކުރުން މަޑުޖެހިއްޖެ އެވެ.
ދައުލަތުގެ ވެލްފެއާ ނިޒާމު އޮންނަ ގޮތުން އެހެން އިންޝުއަރެންސް ޕޮލިސީ ހުންނަ މީހުންނަށް އާސަންދަ ލިބެ އެވެ. މި ނިޒާމު އިސްލާހުކުރަން ފަށާފައިވާ މަސައްކަތުގެ ދަށުން އެކަން ބަދަލުކުރާނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއޯއީ ހީނާ ވަލީދު ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވިދާޅުވީ މިދިޔަ އޯގަސްޓު 12، ގަ އެވެ.
"މިހާރު 1 އޮކްޓޯބަރުން ފެށިގެން އަޅުގަނޑުމެން އިމްޕްލިމެންޓް ކުރަން ފަށާ ބައެއް ކަހަލަ ޕޮލިސީސްތައް އެބަހުރި. އޭގެ ތެރޭގައި އެހެން އިންޝުއަރެންސެއް ހުރި ބޭފުޅެއް ކަމަށް ވާނަމަ، މިސާލަކަށް ބިލް ކްލިއާ ކުރާއިރުގައި އެންމެ ފުރަތަމަ އިތުރު އިންޝުއަރެންސްއަކުން ކްލިއާ ކުރުމަށް ފަހު އާސަންދަ އެންސްޕާގެ ތެރެއިން އެބައި ކްލިއާ ކުރާ ކަހަލަ ގޮތަކަށް," އެ ދުވަހު ހީނާ ވިދާޅުވި އެވެ.
މިހެން ވިދާޅުވި ނަމަވެސް މި ތާރީހަށް ވެލްފެއާ ނިޒާމަށް ގެންނަން ބުނި އެއްވެސް ބަދަލެއް ތަންފީޒުކުރަން ނުފަށަ އެވެ. މި ބަދަލުގެ ކަންކަން އޮތީ ކިހާ ހިސާބެއްގައިތޯ ސާފުކުރަން "އަދަދު" އިން ހީނާއަށް ތަކުރާރުކޮށް ގުޅުމުން އޭނާ ފޯނަށް ޖަވާބު ނުދެއްވާތީ މިކަމާ ގުޅޭ އިތުރު އެއްވެސް މައުލޫމާތެއް ނުލިބުނެވެ.
ވެލްފެއާ ނިޒާމު އިސްލާހުކުރުމަކީ، މި އަހަރަށް ފާސްކުރި ބަޖެޓުގައި ހަރަދުތައް ކުޑަކުރުމުގެ ގޮތުން ތަންފީޒުކުރަން ކަނޑައަޅާފައިވާ ސިޔާސަތެކެވެ. މި ކަންކަމުގެ ތެރޭގައި އާސަންދައިގެ އިތުރުން އެންސްޕާއިން އެހީ ދޭ ނިޒާމާއި ބަލްކް ޕްރޮކިޔުމަންޓުގެ ދަށުން ބޭސް ގަތުން ހިމެނެ އެވެ. މީގެ ތެރެއިން މިހާތަނަށް ތަންފީޒުކުރަން ފަށާފައި ވަނީ ބަލްކް ޕްރޮކިޔުމަންޓުގެ ދަށުން ބޭސް ގަތުން އެކަންޏެވެ.
މުޅި ވެލްފެއާ ނިޒާމު މިހާރު އޮތް ގޮތް އިސްލާހުކުރަން ވޯލްޑް ބޭންކު ފަދަ ބައިނަލްއަގުވާމީ މާލީ އިދާރާތަކުން ލަފާދޭތާ އެ ނިޒާމަށް ވީހާ ދުވަހެއް ވެއްޖެ އެވެ. އެކަން ބަދަލުކުރަން އެކި ސަރުކާރުތަކުން އެކި ސިޔާސަތުތައް ތަންފީޒުކުރާނެ ކަމަށް ބުނި ނަމަވެސް، މިއަދާ ހަމައަށް މިއިން އެއްވެސް ސިޔާސަތެއް ތަންފީޒެއް ނުވެ އެވެ.
މިފަހުން ވޯލްޑް ބޭންކުން ނެރުނު ޑިވެލޮޕްމަންޓު އަޕްޑޭޓު ރިޕޯޓުގައި ވެސް މިކަމުގެ ކަންބޮޑުވުން ފާޅުކޮށްފައިވެ އެވެ. އަދި އިގުތިސޯދީ ދުވެލި ހިފަހައްޓަން، އިތުރަށް ފަސް ނުކޮށް، ވީހާ ވެސް އަވަހަކަށް ހަރަދު ކުޑަކުރަން އަޅަން ނިންމާފައިވާ ހުރިހާ ފިޔަވަޅެއް އަޅަން ލަފާދީފައިވެ އެވެ.
