ރާއްޖޭގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ ރި ކޮލިފައިންގް ރައުންޑްގައި (ރައުންޑް 2) ގައި ވާދަކޮށް ރާއްޖޭގެ އެތުލީޓުން މެންސް އޯޕަން ކެޓަގަރީގެ ތިން ވަނަ ބުރުން ޖާގަ ހޯދިއިރު, އަންހެން ރައުންޑް 1 ގައި ވާދަކޮށް ރާއްޖޭގެ މަރިޔަމް ރާހިލް ނަސީމް (އާޔާ) ތިން ވަނަ ބުރަށް ދަތުރުކޮށްފި އެވެ.
ކ. ތުލުސްދޫގައި މިއަދު ކުރިއަށްދިޔަ ހީޓުތަކުގެ ތެރެއިން ފުރަތަމަ ކުރިއަށް ދިޔައީ އަންހެން އޯޕަން ރައުންޑްގެ ހީޓުތަކެވެ. އާޔާ ވާދަކުރީ ހީޓް ހަތަރެއްގަ އެވެ. ބޯ ވިއްސާރައިގައި މިއަދުގެ ހީޓުތައް ކުރިއަށް ދިޔައިރު, އާޔާ ތިންވަނަ ބުރަށް ދަތުރުކުރީ މި ހީޓުން ދެވަނަ ހޯދައިގެންނެވެ. އާޔާ އާއެކު, މި ހީޓުގައި ދެން ވާދަކުރީ ޗައިނާގެ ސިގީ ޔަންގް އާއި ޔަސަމަން ހޮސެއިން އެވެ.
މި ހީޓުގެ އެއްވަނަ އަށް ދިޔައީ ޗައިނާގެ ސިގީ ޔަންގް އެވެ. އޭނާ ވަނީ 9.27 ސްކޯކޮށްފަ އެވެ. ސިގީ އެންމެ މަތިން ސްކޯކުރީ ތިންވަނަ އަދި ހަތަރުވަނަ ރާޅުގަ އެވެ. އެއީ 4.70 އަދި 4.57 އެވެ. ހީޓުގެ ދެވަނަ އާޔާ ހޯދީ 3.16 ސްކޯކޮށްގެންނެވެ. އާޔާގެ އެންމެ މަތިން ސްކޯކުރީ ދެވަނަ އަދި ހަތަރުވަނަ ރާޅުގަ އެވެ. އެއީ 1.73 އަދި 1.43 އެވެ.
މިއަދު ދެން ކުރިއަށްދިޔައީ, މެންސް އޯޕަންގެ ރި ކޮލިފައިން ރައުންޑް ނުވަތަ ރެޕޯ ރައުންޑްގެ ހީޓުތަކެވެ. ރެޕޯ ބުރުގެ ފުރަތަމަ ހީޓުގައި ވާދަކުރި ރާއްޖޭގެ އިސްމާއިލް ރަޝީދު (ސްމައިލީ) ވަނީ ހީޓުން އެއްވަނަ ހޯދާ ތިންވަނަ ބުރުން ޖާގަ ހޯދައިފަ އެވެ. މި ހީޓުގެ އެއްވަނަ ސްމައިލީ ހޯދީ 11.33 ސްކޯކޮށްގެންނެވެ. ސްމައިލީ އެންމެ ރަނގަޅަށް ސްކޯކުރީ 2 އަދި 4 ވަނަ ރާޅުގަ އެވެ. ދެވަނަ ރާޅުން ސްމައިލީ 5.33 ސްކޯކުރިއިރު, ހަތަރުވަނަ ރާޅުން 6.00 ސްކޯކުރި އެވެ. މި ހީޓުގެ ދެވަނަ އަށް ކުވައިތުގެ އީސާ އަލް އީސާ ދިޔައީ, 5.94 ސްކޯކޮށްގެންނެވެ. އަދި ތިންވަނަ އަށް ދިޔަ, ޔުނައިޓެޑް އަރަބް އެމިރޭޓްސްގެ މުހައްމަދު ސުލްތާން އަށް ލިބުނީ 4.87 ގެ ސްކޯއެކެވެ.
ރާއްޖޭގެ ސްމައިލީ ރާޅާއެޅި ހީޓުގެ ތެރެއިން -- ފޮޓޯ: އަތޫފް އާތިފް / އަދަދު
ރާއްޖޭގެ ކެޕްޓަން އަހުމަދު އާގިލް (އައްމަޑޭ) ވާދަކުރީ ހީޓް 3 ގަ އެވެ. މި ހީޓުގެ އެއް ވަނަ އައްމަޑޭ ހޯދީ 10.16 ސްކޯ ކޮށްގެންނެވެ. އައްމަޑޭ އާއެކު މި ހީޓުގައި ދެން ވާދަކުރީ އާނިގް ކައިލާނީ ބިން ރަހުމަތު އަދި އަފްގާނިސްތާނުގެ ކައިސް ހަސަން އެވެ. މި ހީޓުގައި ކައިސް ހަސަން އަށް ރާޅެއްގައި އެޅިފައިނުވެ އެވެ. މި ހީޓުގެ އެއް ވަނަ އައްމަޑޭ ހޯދިއިރު, އޭނާ އެންމެ މަތިން ސްކޯކުރި ދެ ރާޅަކީ 3 އަދި 5 ވަނަ ރާޅެވެ. ތިން ވަނަ ރާޅުގައި 4.83 ސްކޯކުރިއިރު, ފަސް ވަނަ ރާޅުގައި 5.33 ސްކޯކުރި އެވެ. ދެ ވަނަ އަށް ދިޔަ އާނިގް އަށް ލިބުނީ 5.00 ގެ ސްކޯއެކެވެ.
ކެޕްޓަން އައްމަޑޭ ވަނީ އޭނާގެ ހީޓުން އެއްވަނަ ހޯދާ ދެވަނަ ބުރަށް ދަތުރުކޮށްފަ -- ފޮޓޯ: އަތޫފް އާތިފް / އަދަދު
ރާއްޖޭގެ އިސްމާއިލް މިގްލާލް (ކުޑަ އިއްސެ) ތިން ވަނަ ބުރުން ޖާގަ ހޯދީ ހީޓް 5 ގައި ވާދަކޮށް ހީޓުގެ އެއް ވަނަ ހޯދައިގެންނެވެ. މި ހީޓަށް އޭނާ މޫދަށް އެރުނީ ހީޓް ނިމެން ފަސް މިނެޓަށް ވެފައި ހުއްޓަ އެވެ. އެކަމަކު، ކައިރި ކައިރީގައި ތިން ރާޅު އަޅާ, އޭނާ ވަނީ އެންމެ މަތިން އެޅި ދެ ރާޅުގައި 5.00 އަދި 5.57 ސްކޯކޮށްފަ އެވެ. ދެވަނަ އަށް ދިޔަ, ޖޫލިއަން މާކް އަށް ސްކޯކުރެވުނީ 8.07 އެވެ.
މީގެ އިތުރުން މިއަދު ރާއްޖޭގެ ހަސަން ނާސިހު ހީޓް ހައެއްގައި ވާދަކުރަން އޮތް ނަމަވެސް ދެން އެ ހީޓުގައި ހިމެނޭ އަފްރިދުމް އަމޫ ހީޓުގައި ބައިވެރިނުވާން ނިންމުމުން ނާސިހު އަށް ވަނީ ތިން ވަނަ ބުރުގެ ޖާގަ އެއް ކަށަވަރުވެފަ އެވެ.
