މި ފަހަރުގެ އޭޝިއަން ސާފިން ޗެމްޕިއަންޝިޕްގައި އޭނާގެ ފެށުން ރަނގަޅަށް ދިޔުން އެއީ މުބާރާތުގައި ކުރިއަށް ދިޔުމަށް ލިބުނު ބޮޑު ހިތްވަރެއް ކަމަށް ގައުމީ ސާފިން ޓީމުގެ ހޫދު އަހުމަދު (ހޫބްސް) ބުނެފި އެވެ.
ކ. ތުލުސްދޫގައި ކުރިއަށްދާ އޭޝިއަން ސާފިން ޗެމްޕިއަންޝިޕްގެ ރައުންޑް އެކެއްގެ ހީޓުން އެއް ވަނަ ހޯދައި ހޫދު ވަނީ ރައުންޑް ތިނަކަށް ދަތުރުކޮށްފަ އެވެ.
މިއަދު ހެނދުނު ކުރިއަށްދިޔަ ހީޓު 12 ގައި، ހޫދު ވަނީ ހަތް ރާޅުގެ ތެރެއިން، އެންމެ ރަނގަޅު ދެ ރާޅުން 9.16 ޕޮއިންޓް ސްކޯކޮށްފަ އެވެ. ހޫދުގެ އެންމެ ރަނގަޅު ދެ ރާޅުގެ ސްކޯ އަކީ 4.33 އާއި 4.83 އެވެ.
"އަދަދު ސްޕޯޓްސް" އާ ވާހަކަ ދައްކަމުން ހޫދު ބުނީ ފުރަތަމަ ރައުންޑާ އެކު ފެށުން ރަނގަޅު ވުން އެއީ މުބާރާތުގައި ކުރިއަށް ދިޔުމަށް ލިބުނު ބޮޑު ހިތްވަރެއް ކަމަށެވެ.
ފުރަތަމަ ރައުންޑުގެ ހީޓުން މޮޅުވުމަކީ ރައުންޑް ތިނަކަށް ނުކުންނައިރު, ބޮޑު ހިތްވަރެއް ލިބުން ކަމަށް ވެސް ހޫދު ވަނީ ބުނެފަ އެވެ. އަދި މިއީ މިދިޔަ އަހަރު ރެޕޯ-ރައުންޑުން ބަލިވުމުން ކުރި ފަރިތަކުރުންތަކުގެ ނަތީޖާ ކަމަށް ހޫދު ވަނީ ފާހަގަކޮށްފަ އެވެ.
"މިދޔަ އަހަރު ކެޓީ ރެޕޯ ރައުންޑުން. ދެން ވަރަށް ދެރަވި، އެހެންވެ، ވަރަށް ބުރަކޮށް ޕްރެކްޓިސްކޮށް މިއަހަރުގެ މުބާރާތައް މިއައީ." ހޫދު ބުންޏެވެ.
އޭނާ ބުނީ މިދިޔަ އަހަރާ އަޅާކިޔާއިރު، މި އަހަރުގެ މުބާރާތުގައި ވަރަށް މޮޅު އެތުލީޓުން އެބަތިބި ކަމަށެވެ. އަދި މިދިޔަ އަހަރުގެ އެތުލީޓުންގެ ފެންވަރު ވެސް މި ފަހަރު ރަނގަޅު ވެފައިވާކަން ހޫދު ފާހަގަކުރި އެވެ. އެހެންވެ, އެއީ މި މުބާރާތުގައި ބޮޑު ޗެެލެންޖެއް ކަމަށާއި، އެކަމަކު، ކާމިޔާބީއެއް ހޯދަން މަސައްކަތް ކުރާނެ ކަމަށް ހޫދު ވަނީ ބުނެފަ އެވެ.
