މީގެ ދެ އަހަރެއްހާ ދުވަސްކުރިން، މެންޗެސްޓާ ޔުނައިޓަޑްގެ ކޯޗުކަމުން ރަލްފް ރަންގްނިކް ދުރުވިއިރު، އޭނާ އަށް ގިނަ ފާޑުކިއުންތައް އަމާޒުވެ، އެނާ ވަނީ "ޖޯކަކަށް" ވެފަ އެވެ. ޔުނައިޓެޑްގެ ވަގުތީ ކޯޗުގެ މަގާމަށް ހަވާލުވެ، އޭނާ އަށް ކްލަބުން ދިން ޓާގެޓްތައް ހާސިލެއްނުވިއެވެ. ޓީމުގެ ނަތީޖާތައް ދަށްވުމުގެ އިތުރުން، ކުޅުންތެރިން އިހުތިރާމް ވެސް އޭނާއަށް ގެއްލުނެވެ.
ރަންގްނިކްއަކީ "ބޮސް" އެއް ގޮތުގައި އެއް އިރަކުވެސް ނުދެކޭ ކަމަށް އޭރު ޔުނައިޓެޑްގައި ހުރި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ވެސް ބުނެފައިވެ އެވެ.
ޖަރުމަނަށް ނިސްބަތްވާ ރަންގްނިކް އަކީ ޔުނައިޓެޑްއާ ހަވާލުވުމުގެ ކުރިން އެކި ކްލަބުތަކެއްގައި ރަނގަޅު މަސައްކަތްތަކެއް ކޮށްފައިވާ ކޯޗެެކެވެ. ހާއްސަކޮށް ރެޑްބުލް ލައިޕްޒިގްގެ މަތީ ޓެކްނިކަލް މަގާމެއްގައި ރަންގްކިން މަސަައްކަތްކުރިއިރު، އެ ކްލަބުން ދަނޑު މަތީގައި އަދި ދަނޑުން ބޭރުގައި ގިނަ ކުރިއެރުންތަކެއް ހޯދިއެވެ.
ޔުނައިޓެޑްގައި ކުރެވުނު ހިތި ތަޖުރިބާތަކާތަކަށް ފަހު، ރަންގްނިކް ހަވާލުވީ އޮސްޓްރިއާގެ ގައުމީ ޓީމުގެ ކޯޗުކަމާ އެވެ. އަދި މިހާރު ކުރިއަށްދާ ޔޫރޯގައި އޭނާ ވަނީ ތަފާތު ދައްކައިފަ އެވެ. އޮސްޓްރިއާ ޓީމުގެ ކުޅުންތެރިންގެ އިތުބާޜު ހޯދައިފައެވެ.
މިހާރު ކުރިއަށްދާ ޔޫރޯގައި ކުރީގެ ދެ ޗެމްޕިއަނުން ކަމަށްވާ ނެދަލޭންޑްސް އާއި ފްރާންސް ހިމެނޭ ގުރޫޕްގެ އެއް ވަނައިގައި ގަދަ 16ގެ ޖާއެއް އޮސްޓްރިއާ ހޯދުމަކީ އާދައިގެ ކަމެއް ނޫނެވެ.
އޮސްޓްރިއާ ގުރޫޕްގެ އެއް ވަނަ ހޯދީ ގުރޫޕް ޑީގައި ކުޅުނު ފަހު މެޗުގައި ނެދަލޭންޑްސް އަތުން 3-2 އިން މޮުވެގެންނެވެ. އޮސްޓްރިއާ އެއް ވަނަ ހޯދީ ކުރީގެ ޗެމްޕިއަން، ފްރާންސް ދެ ވަނަ އަށް ޖައްސާލުމަށް ފަހު އެވެ.
"އަހަރަމެންނަށް ބޯޅަ ލިބޭއިރު، ބެންޗުގައި އަހަރަމެންނަށް އިރުޝާދު ދޭން މި އިންނަނީ ވަރަށް މޮޅު ކޯޗެެއް،" ގުރޫޕްގެ ފަހު މެޗަށްފަހު އޮސްޓްރިއާގެ މިޑްފީލްޑަރު މާސެލް ސަބިޓްޒާ ބުންޏެވެ.
އޮސްޓްރިއާގެ ކޯޗުކަމާ ރަންގްނިކް ހަވާލުވީ 2022 ވަނަ އަހަރުގެ އޭޕްރީލް މަހުގެ ތެރޭގަ އެވެ. އޭނާގެ ކޯޗުކަމުގެ ކުރީކޮޅު އޮސްޓްރިއާ އިން ނެރުނު ނަތީޖާތައް އެހާ ރަނގަޅެއް ނޫނެވެ. އެކަމަކު ޓީމާ އެކު މަސައްކަތްކުރަން ވަގުތު ލިބި، މި ފަހުން ރަންގްނިކްގެ އިރުޝާދުގެ ދަށުން އޮސްޓްރިއާ އިން ވަނީ ރަނގަޅު ނަތީޖާތަކެއް ނެރެފަ އެވެ.
އެ ގޮތުން، މި މުބާރާތުގެ ކުރިން އިޓަލީ ބަލިކޮށް، ބެލްޖިއަމް އާއި ފްރާންސްއާ އެއްވަރުކުރުން ފާހަގަކުރެވެ އެވެ.
ސަބިޓްޒާ ބުނީ ޔޫރޯގައި އޮސްޓްރިއާ ކުޅުނު މެޗުތަކުން އެ ޓީމަށް އައިސްފައިވާ ކުރިއެރުންތައް ފެނުނު ކަމަށެވެ.
"ކުރިން މިވާ ގޮތަކީ އަހަރަމެން އަތުން ބޯޅަ ގެއްލުނީމަ، މާ ބޮޑަކަށް މަސައްކަތެއް ނުކުރެވޭ ބޯޅަ ހޯދާކަށް. އެކަމަކު މިހާރު ޓީމުތަކަށް އެނގޭނެ ބޯޅަ ގެއްލިއްޖެއްޔާ އަހަރަމެން އެ ބޯޅަ އަލުން ހޯދަން ގަދަ އަޅައި މަސައްކަތްކުރާނެކަން،" ސަބިޓްޒާ ބުންޏެވެ.
ތަފާސް ހިސާބުތަކުން ދައްކާ ގޮތުގައި މި އަހަރުގެ ޔޫރޯގައި "ޕްރެސިން" ގައި އެންމެ ރަނގަޅު އެއް ޓީމަކީ އޮސްޓްރިއާ އެވެ. އޮސްޓްރިއާ އަށް ވުރެ އިތުރަށް، އިދިކޮޅު ޓީމުގެ ޕާސްތައް ހުއްޓުވައި އަލުން ބޯޅަ ހޯދުމުގެ ކުރީގައި އުޅެނީ ޖަރުމަނެވެ.
އެކަމަކު، މި އަހަރުގެ ޔޫރޯގައި އެންމެ ގިނަ ފައުލްކޮށްފައިވާ އެއް ޓީމަކީ އޮސްޓްރިއާ އެވެ.
ޔުނައިޓެޑަކީ ރަންގްނިކްގެ ކޯޗިން ކެރިއަރުގައި އޭނާ ހަވާލުވި 13 ވަނަ ކްލަބެވެ. އެކަމަކު އޭނާގެ ކެރިއަރަށް ބަލާއިރު، އޮސްޓްރިއާގެ ކޯޗުކަމަކީ އޭނާ އަށް އެންމެ ގުޅޭ މަގާމެވެ.
މި އަހަރުގެ ޔޫރޯގެ ކުރިން ބަޔާން މިއުނިކް އިން އޭނާ އަށް ޝައުގުވެރިކަން ފާޅުކުރި ނަމަވެސް، ކްލަބު ފުޓްބޯޅަ އަށް އެނބުރި އައުމަށް ލިބުނު ފުރުސަތު ވަނީ ދޫކޮށްލައިފަ އެވެ. އަދި އޮސްޓްރިއާގައި ފަށާފައިވާ ޕްރޮޖެކްޓް އިތުރަށް ކުރިއަށްގެންދަން އަމާޒުހިފި އެވެ.
އޮސްޓްރިއާ ފައިނަލަށް ދިއުމަކީ ނުވާނެ ކަމެއް ނޫން
ގަދަ 16 ބުރުުގައި މިރޭ ތުރުކީއާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ރަންގްނިކް ބުނީ، އޮސްޓްރިއާ ޓީމަށް މި ފަހަރުގެ ޔޫރޯ ކާމިޔާބު ކުރުން ނޫނީ ފައިނަލަށް ދިއުމަކީ ނުވާނެ ކަމެއް ކަމަށް ގަބޫލުނުކުރުމަށެވެ.
"އަހަރެމެން އަބަދުވެސް ތިބެންޖެހޭނީ އުންމީދުތައް މަތިކޮށްގެން. މުބާރާތް ފެށުމުގެ ކުރިން ވެސް އަހަރެން ބުނިން، އަހަރެމެންނަށް ޗެމްޕިއަންކަން ނުހޯދޭނެ ކަމަށް ނޫނީ ފައިނަލަށް ވެސް ނުދެވޭނެ ކަމަށް ދެކެވޭ ވާހަކަތަކަށް ނުވިސްނަން، މި ޓީމުގެ މަސައްކަތުގެ ނަތީޖާ އެބަ ފެނޭ،" ރަންގްނިކް ބުންޏެެވެ.
ރަންގްނިކް ބުނީ ތުރުކީއާ ދެކޮޅަށް ވެސް ނުކުންނާނީ ގްރޫޕް ސްޓޭޖުގެ ކޮންމެ މެޗެކޭ އެއްގޮތަށް ވީ އެންމެ ރަނގަޅަށް ފޯކަސް ބަހައްޓައިގެން މޮޅުވުމަށް ކަމަށެވެ.
މިއީ ތުރުކީ އާއި އޮސްޓްރިއާ ބައްދަލުކުރާ 18 ވަނަ މެޗެވެ. އެކަމަކު، މިއީ މި ދެ ޓީމުން ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެެވެ. އެންމެ ފަހުން، އޮސްޓްރިއާ އިން ބޮޑު މުބާރާތެއްގެ ނޮކައުޓް މެޗަކުން މޮޅުވެފައިވަނީ 1954 ވަނަ އަހަރުގެ ވޯލްޑް ކަޕްގަ އެވެ.
އޮސްޓްރިއާ އާއި ތުރުކީ، ޔޫރޯގެ ގަަދަ 16 ގައި ކުޅޭ މެޗު ފަށާނީ މިރޭ 12 ޖަހާއިރު އެވެ.
