މިއުނިކް (17 ޖޫން) - ރުމޭނިއާ އަށް މި ފަހަރުގެ ޔޫރޯ ފުޓްބޯޅަ މުބާރާތުގައި އެންމެން ހައިރާން ކޮށްލެވިދާނެ ފަދަ ނަތީޖާތަކެއް ނެރެވިދާނެ ކަމަށް ދެކޭ ކަމަށް އެ ޓީމުގެ ކޯޗު އެޑްވާޑް އިއޮޑަނެސްކޫ ބުނެފި އެވެ.
މި ފަހަރުގެ ޔޫރޯގައި އެންމެ ދަށް ނަތީޖާއެއް ނެރޭނެ އެއް ޓީމު ކަމަށް ގިނަ ބަޔަކު ބަލަމުން އަންނަ ރުމޭނިއާ އިން މި އަހަރުގެ މުބާރާތައް ވަރަށް ރަނގަޅަށް ތައްޔާރުވެފައިވާ ކަމަަށް އިއޮޑަނެސްކޫ ވަނީ ބުނެފަ އެވެ.
ރުމޭނިއާ އަކީ މި ފަހަރުގެ މުބާރާތައް ކޮލިފައިވި އެންމެ "ސަޕްރައިޒިންގް ޓީމް" ކަމަށް ވެސް ގިނަ ބަޔަކު ދެކެ އެވެ.
އިއޮޑަނެސްކޫ ބުނީ މި މުބާރާތައް ކޮލިފައިވެ، ރުމޭނިއާ ކުޅުންތެރިން ތިބީ އެ ފޯމުގައި ޔޫރޯގައި ވެސް ކުޅެން ކަމަށެވެ. އަދި މި ފަހަރުގެ ޔޫރޯގައި އެ ފޯމުގައި ކުޅުންތެރިން ކުޅެފިނަމަ، ޔޫރަޕްގެ އެހެން ޓީމުތައް ހައިރާން ކޮށްލެވޭނެ ކަމުގެ ޔަގީންކަން އެބައޮތް ކަމަށް އިއޮޑަނެސްކޫ ބުނެފައިވެ އެވެ.
"މި މުބާރާތައް އަހަރެންގެ ޓީމު ކޮލިފައިވީ ވެސް ގިނަ ބަޔަކު ހައިރާން ކޮށްލާފަ. ކޮލިފިކޭޝަންގައި ދެއްކި ކުޅުން އަހަރެންގެ ޓީމުން ތަކުރާރުކުރާނެ ކަމުގެ ޔަގީންކަން އެބައޮތް" އިއޮޑަނެސްކޫ ބުންޏެވެ.
ޔޫކްރެއިންއާ އަޅާބަލާއިރު، ރުމޭނިއާގެ ކުޅުންތެރިންގެ ތަޖުރިބާ ބޮޑުތަނުން މަދު ކަމަށާއި, އެކަމަކު އެއީ ރުމޭނިއާ އަށް އޮތް އެޑުވާންޓޭޖެއްގެ ގޮތުގައި އިއޮޑަނެސްކޫ ދެކެ އެވެ.
"އަހަރެން ދެކެނީ އަހަރެންގެ ޓީމުގައި ތަޖުރިބާ މަދު ކުޅުންތެރިން ތިބުން އެއީ އެޑުވާންޓޭޖެއް ކަމަށް. ނަތީޖާ ނެރެން ބޭނުންވާނަމަ ކުޅުންތެރިންގެ ތަޖުރިބާ ހުރުން އެއީ މުހިންމު ކަމެއް އެކަމަކު ނަތީޖާ އަކީ ކުޅުންތެރިން ކުރާ ބުރަ މަސައްކަތުން ލިބޭ އެއްޗެއް" އިއޮޑަނެސްކޫ ބުންޏެވެ.
އިއޮޑަނެސްކޫގެ ބައްޕަ އެންޖެލް އިއޮޑަނެސްކޫ ވަނީ 1996 ވަނަ އަހަރުގެ ޔޫރޯގައި ވާދަކުރި ރުމޭނިއާ ޓީމަށް ކޯޗުކޮށްދީފަ އެވެ. މި ފަހަރު އިއޮޑަނެސްކޫ ކޯޗުކޮށްދޭއިރު، މިއީ ތާރީހީ ކަމެކެވެ. އެއީ، ޔޫރޯއެއްގައި ބައްޕަ އާއި ދަރިއަކު އެއް ޓީމެއްގައި ކޯޗުކޮށްދޭ ފުރަތަމަ ފަހަރު ކަމަށް ވުމެވެ.
ރުމޭނިއާ އިން ވަނީ މީގެ ކުރިން ޔޫކްރެއިނާ ދެކޮޅަށް ކުޅުނު އެކުވެރިކަމުގެ ހަ މެޗުގެ ތެރެއިން ތިން މެޗުން މޮޅުވެފަ އެވެ. މިރޭގެ މެޗު ފަށާނީ 6 ޖަހާއިރު އެވެ.
