އަންނަ އޮގަސްޓް މަހު، ކ. ތުލުސްދޫގައި ބާއްވަން ނިންމާފައިވާ އޭޝިއަން ސާފިން ޗެމްޕިއަންޝިޕަކީ 2026 ވަނަ އަހަރުގެ އޭޝިއަން ގޭމްސްގެ ކޮލިފައިން އިވެންޓަކަށްވެފައިވާއިރު، މި ފަހަރުގެ މުބާރާތުގެ ތެރެއިން އޭޝިއަން ގޭމްސް އަށް ދިވެހި އެތުލީޓަކު ކޮލިފައިވުމަކީ އަމާޒެއް ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސް މުހައްމަދު ސޮބާހު (ޗޭ) ވިދާޅުވެއްޖެ އެވެ.
މިދިޔަ އަހަރު ތުލުސްދޫގައި އޭޝިއަން ސާފިން ޗެމްޕިއަންޝިޕް ކާމިޔާބު ކަމާ އެކު ނިންމާލިއިރު، މި ފަހަރު އެ މުބާރާތް ހޯސްޓްކުރަން ރާއްޖެ އަށް ދިނީ ބޮޑު ފުރުސަތެއް ފަހިވެފައި އޮތް ގޮތަށެވެ.
އެ ގޮތުން، އަންނަ އޮގަސްޓް މަހު 17-24 އިން ތުލުސްދޫގައި ބާއްވާ އޭޝިއަން ސާފިން ޗެމްޕިއަންޝިޕުން ރަނގަޅު ކާމިޔާބެއް ހޯދައި، 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސް އަށް ކޮލިފައިވުމުގެ ފުރުސަތު އެބައޮތެވެ.
އޭޝިއަން ސާފިން ޗެމްޕިއަންޝިޕްގެ މި ފަހަރުގެ މުބާރާތް ލޯންޗްކުރަން ބޭއްވި އިވެންޓްގައި، މިއަދު ވާހަކަ ދައްކަވަމުން، ސޮބާހު ވިދާޅުވީ، މި ފަހަރު އޮތީ، ކޮލިފައިން އިވެންޓަކަށްވާތީ ގަވާއިދު ތަންދިން ގޮތުން، މި ފަހަރު އެހާ ގިނަ ދިވެހި އެތުލީޓުން ބައިވެރިކުރެވެން ނެތް ކަމަށެވެ.
އެކަމަކު، އޭޝިއަން ސާފިން ޖަމިއްޔާއާ މަޝްވަރާ ކުރުމަށް ފަހު، ރާއްޖޭގެ ދެ ޓީމެއް ބައިވެރިކުރެވޭ ގޮތްވެފައިވާ ކަމަށް އޭނާ ވިދާޅުވި އެވެ.
"ޓީމު އޭ އާއި ޓީމު ބީ ބައިވެރިކުރެވޭ ގޮތް ވަނީ ވެފައި. ޓީމު އޭ އަކީ އޭޝިއަން ގޭމްސް އަށް ކޮލިފައިވާ ގޮތަށް އިންނަ ޓީމެއް، ޓީމު ބީ އަކީ ކޮލިފައިވާ ގޮތަށް އިން ޓީމެއް ނޫން، ރޭންކިން އަށް ގުނޭ ގޮތަށް މި ޓީމުތައް އެކުލަވާލެވުނުއިރު، ކޮންމެ ޓީމެއްގައި ވެސް އަންހެން، ފިރިހެން ޖޫނިއާ ތިނެއް އަދި ސީނިއާ އެތުލީޓުން ހިމެނޭނެ، އުންމީދަކީ 12 އެތުލީޓުން ހިމެނުން. އެހެން ކަމުގައި ވިޔަސް އަންހެން އެތުލީޓުން (ހޯދަން) ވަރަށް ޗެލެންޖިން،" ސޮބާހު ވިދާޅުވި އެވެ.
މިދިޔަ އަހަރު ވެސް އަދި އޭގެ ކުރިން ވެސް ބޭއްވި އޭޝިއަން ސާފިން ޗެމްޕިއަންޝިޕްގައި ރާއްޖޭގެ އެތުލީޓު، ހުސެއިން އަރީފް (އިބޫ) ވަނީ ލޯ މެޑަލް ކާމިޔާބުކޮށްފަ އެވެ.
މިދިޔަ އަހަރުގެ މުބާރާތަކީ، ކޮލިފައިން އިވެންޓެއް ނުވާތީ އެންމެ މޮޅު ސާފަރުން ނުފެނެ އެވެ. އެކަމަކު މި ފަހަރުގެ މުބާރާތް ކޮލިފައިން އަކަށްވާތީ، އޭޝިއާ ރީޖަންގެ އެންމެ މޮޅެތި ސާފަރުން ބައިވެރިވެ އެވެ.
"މި ފަހަރު ޗެލެންޖިން ވާނެ އެހެން ނަމަވެސް އަޅުގަނޑު އުންމީދުކުރަނީ، އަޅުގަނޑުމެންނަށް ކޮލިފައިންގެ އެބަ އިނދޭ ދެ ފުރުސަތެއް. އެއީ، ރީޖަނަލީ އިންނަ ފުރުސަތާއި މުޅި އޭޝިއާ އިން ޓޮޕް ސެވަން، ތެރޭގައި ހިމެނުމުގެ ފުރުސަތު، އޭގެ ތެރޭގައި ހިމެނުމުގެ ފުރުސަތު އަޅުގަނޑުމެންނަށް އެބައިން. އެހެންވެއްޖިއްޔާ، އުންމީދަކީ އަޅުގަނޑުމެންނަށް އެއް ފުރުސަތު މީގެއިން ހޯދޭނެ ކަމަށް. އެތުލީޓުންނާ މެދު ވަރަށް ޔަގީންކަން އެބައޮތް،" ސޮބާހު ވިދާުޅުވި އެެވެ.
މިއީ އޭޝިއަން ގޭމްސްއެއްގައި ސާފިން އިވެންޓް އޮތް ފުރަތަމަ ފަަހަރު
ޖަޕާނުގައި 2026 ވަނަ އަހަރު ބާއްވާ އޭޝިއަން ގޭމްސް އަކީ ސާފިން އިވެންޓް ހިމަނައިގެން ބޭއްވޭ ފުރަތަމަ ގޭމްސް އެވެ.
މޯލްޑިވްސް އޮލިމްޕިކް ކޮމިޓީގެ ސެކްރެޓަރީ ޖެނެރަލް ތަމޫހު އަހުމަދު ސައީދު (ތަމޫ)، މިއަދު ވިދާޅުވީ މި އަހަރު ރާއްޖޭގައި އޭޝިއަން ގޭމްސްގެ ކޮލިފައިން މުބާރާތެއް ބޭއްވުމަކީ ރާއްޖެ އަށް ލިބުނު ބޮޑު ފުރުސަތެއް ކަމަށެވެ.
އޭޝިއަން ގޭމްސް އަށް ކޮލިފައިވެވޭނީ ޝޯޓްބޯޑު އިވެންޓްތަކުންނެވެ. އެއީ އޮލިމްޕިކްސްގައި ވެސް އެ އޮތީ އަދި ޝޯޓްބޯޑް ކަމަށްވާތީ އެވެ.
އޭޝިއަން ގޭމްސްގެ ސާފިން އިވެންޓްގެ މުޅި ޖުމްލަ ކޯޓާ އަކަށް މި ލިބެނީ 24 އަންހެން، 24 ފިރިހެން އެތުލީޓުން ގޮތަށް، 48 އެތުލީޓަކަށެވެ. ކޯޓާ ތެރެއިން ކޮލިފައިވާ އެތުލީޓުން މި ބަލަނީ، މި އަހަރާއި އަންނަ އަހަރު އޮންނަ ސާފިން ދެ ކޮލިފައިން މުބާރާތް މެދުވެރިކޮށެވެ.
އެ ގޮތުން، ރާއްޖޭގެ ސާފިން އެސޯސިއޭޝަނަށް މި ލިބެނީ، ކޮލިފައިން ސްލޮޓްގެ ގޮތުގައި، އެންމެ ގިނަވެގެން އަންހެން ދޭއް އަދި ފިރިހެން ދެ ޖާގަ އެވެ.
އޭޝިއަން ގޭމްސްގެ ކޯޓާގެ ތެރެެއިން، މި އަހަރަށް ވަކިން ބަލާއިރު، 12 ޖާގައެއް ކަށަވަރުވެގެންދާނެ އެވެ. އެއީ، އޭޝިއާ ބެހިގެންދާ ފަސް ބައިގެ ތެރެއިން، ކޮންމެ ބަޔަކުން އެއް ވަނަ، އޮޓޮމެޓިކުން ކޮލިފައިވާއިރު، އެ އެތުލީޓުން ނެގުމަށް ފަހު، މުޅި އޭޝިއާގެ އެންމެ ރޭންކިން ރަނގަޅު ހަތް އެތުލީޓަކު ވެސް ކޮލިފައިވާނެ އެވެ.
މި ހަތް އެތުލީޓުން ރޭންކްކުރާއިރު ކުރިން އޮޓޮމެޓިކް ކޮލިފިކޭޝަން ލިބުނު ފަސް އެތުލީޓުންގެ ގައުމު ނުހިމެނޭނެ އެވެ. މިއީ ގިނަ ގައުމަކަށް ފުރުސަތު ދިނުމަށްޓަކައި އޮންނަ އުސޫލެކެވެ.
އޭޝިއާ ބެހިފައިވާ ފަސް ބައިގެ ތެރެއިން ރާއްޖެ ހިމެނެނީ، ދެކުނު އޭޝިއާ ފަޅީގަ އެވެ. މި ބައިގައި ހިމެނެނީ، ރާއްޖޭގެ އިތުރުން، ބަންގްލަދޭޝް، ބޫޓާން، އިންޑިއާ، ޕާކިސްތާން، ސްރީ ލަންކާ އަދި ނޭޕާލް އެވެ.
