އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕް ފުޓުބޯޅަ މުބާރާތުގައި, ފަހު ވަގުތު މާޒިޔާ ސްޕޯޓްސް އެންޑް ރެކްރިއޭޝަންގެ އަހުމަދު މިލްހާން މުހައްމަދު ޖެހި ގޯލުން 2-2 އިން ކުލަބް ގްރީން ސްޓްރީޓްސްއާ އެއްވަރުކޮށްފި އެވެ.
ގްރީން ސްޓްރީޓްސް އިން ވަނީ މީގެ ކުރިން މި މުބާރާތް އެއް ފަހަރު ކާމިޔާބު ކޮށްފަ އެވެ. އެއީ، އެންމެ ފުރަތަމަ 2018 ވަނަ އަހަރު 19 އަހަރުން ދަށަށް ފުރަތަމަ ފަަހަރަށް ޔޫތު ޗެމްޕިއަންޝިޕެއް ބޭއްވިއިރު އެވެ.
މިއަދު ހަވީރު ގައުމީ ފުޓުބޯޅަ ދަނޑުގައި ކުޅުނު މި މެޗުގެ ހަތް ވަނަ މިނެޓުގައި ގްރީން ސްޓްރީޓްސް އިން ވަނީ ގޯލު ޖަހާ ލީޑު ނަގައިފަ އެވެ.
ގްރީން ސްޓްރީޓްސްގެ ސަމާހު ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ / ނައުޝަމް ވަހީދު
މާޒިޔާގެ ކީޕަރު އަސަދުالله އާލިމް އަފީފް އޭރިއާ ތެރެއިން ގްރީން ސްޓްރީޓްސްގެ މުހައްމަދު މައީން ހަސަން ނާހް އަށް ކުރި ފައުލަކާ ގުޅިގެން ލިބުނު ޕެނަލްޓީ އަކުން މި ގޯލު ގްރީން އަށް ކާމިޔާބު ކޮށްދިނީ އާދަމް ސަމާހް އެވެ.
މި ލަނޑު ޖެހުމުގެ ކުރިން ވެސް ގްރީން ސްޓްރީޓްސް އިން ވަނީ ލަނޑެއް ޖެހޭތޯ އެޓޭކިން ހާފުގައި ރަނގަޅު ކުޅުމެއް ދައްކައިފަ އެވެ.
އެކަމަކު މެޗުގެ 35 ވަނަ މިނެޓުގައި މާޒިޔާ އިން ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. ގްރީންގެ އޭރިއާ ރޮނގު މަތިން ކަހަލަ ގޮތަކަށް ލިބުނު ހިލޭ ޖެހުމަކުން މި ގޯލުމާޒިޔާ އަށް ކާމިޔާބު ކޮށްދިނީ ކެޕްޓަން، އަބްދުالله ލޫތު އިބްރާހީމް އެވެ. ލޫތު ފޮނުވާލި ބޯޅަ ވަނީ ކައިރީ ކަނަށެވެ.
އެފްއޭއެމް ޔޫތު ޗެމްޕިއަންޝިޕްގައި މާޒިޔާ އާއި ކްލަބް ގްރީން ސްޓްރީޓްސް ކުޅުނު މެޗުގެ ތެރެއިން.--- ފޮޓޯ: އިމޭޖަސް.އެމްވީ
ހަމަހަމަ ކުޅުމެއް ދެ ޓީމުގެ ފަރާތުން ފެނިގެންދިޔަ މި މެޗުގެ 81 ވަނަ މިނެޓުގައި ގްރީން އަށް ދެ ވަނަ ފަހަރަށް ލީޑު ނަގާދިނީ ސައްޔާފް އާދަމް ޖަހާދިން ގޯލުންނެވެ. މިއީ ހިލޭ ޖެހުމަކުން އޭނާ ޖެހި ލަނޑެކެވެ.
އެކަމަކު އޭގެ ހަ މިނެޓު ފަހުން މާޒިޔާގެ މިލްހާން ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ. މިއީ އޭރިއާތެރެއަށް ހުރަސްވި ބޯޅައެއް ގްރީން ސްޓްރީޓްސްގެ ޑިފެންޑަރުންނަށް ސަލާމަތްނުކުރެވުނު ވަގުތުގައި މިލްހާން ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
މެޗުގެ މޮޅު ކުޅުންތެރިއަކަށް ހޮވިފައިވަނީ ގްރީން ސްޓްރީޓްސްގެ މުހައްމަދު ފައިޒާން ފަޒީން އެވެ. އޭނާ އަށް މި މެޗުގައި ލަނޑު ޖަހާނެ ރަނގަޅު ފުރުސަތެއް ލިިބިގެންދިޔަ އެވެ. ގްރީން ސްޓްރީޓްސްގެ ގިނަ އެޓޭކްތަކުގައި އޭނާ ފެނުނީ ތަފާތު ރޫހެއްގައި ކުޅެލިތަނެވެ.
މި މުބާރާތުގައި މިރޭ ވެސް މެޗެއް ކުޅޭނެ އެވެ. މިރޭގެ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން، ކުލަބް އީގަލްސް އާއި ޔުނައިޓެޑް ވިކްޓްރީ އެވެ.
