މެޑްރިޑް (ޖޫން 3) - ރެއާލް މެޑްރިޑްގެ ޖަރުމަނު ތަރި، ޓޯނީ ކްރޫސްގެ ކްލަބް ފުޓްބޯޅަ ކެރިއަރު ނިންމާލީ އެންމެ ބޭނުންވި ގޮތަށް ކަމަށް ބުނެފި އެވެ.
އުމުރުން 34 އަހަރުގެ ކްރޫސް، ކްލަބް ކެރިއަރުގައި ކުޅުނު ފަހު މެޗަކީ، މިދިޔަ ހޮނިހިރު ދުވަހުގެރޭ ޔުއެފާ ޗެމްޕިއަންސް ލީގުގެ ފައިނަލުގައި ރެއާލުން 2-0 އިން ބޮރޫޝިއާ ޑޯޓްމަންޑް ބަލިކުރި މެޗުގަ އެވެ. މި މެޗުން މޮޅުވެ، ރެއާލުން 15 ވަނަ ފަހަރަށް ޗެމްޕިއަންސް ލީގު ކާމިޔާބުކުރިއިރު، މިއީ ކްރޫސްގެ ހަ ވަނަ ޗެމްޕިއަންސް ލީގު ތަށްޓެވެ. ކްރޫސް ވަނީ ކުރިން ބަޔާން މިއުނިކަށް ކުޅުނުއިރު އެއް ފަހަރު ޗެމްޕިއަންސް ލީގު ކާމިޔާބުކޮށްފަ އެވެ.
"އަހަރެން އަބަދުވެސް ބުނަމުން އައީ އެންމެ މަތީ ފަންތީގައި ހުރެފައޭ ކުޅުން ހުއްޓާލަން ބޭނުންވަނީ. އަހަރެން ބޭނުމެއް ނޫން ކްލަބެއްގެ ބެންޗުގައި ދުވަސްތަކެއް ގުނާފައި ރިޓަޔާކުރަން. އޭގެ ބަދަލުގައި އަހަރެން މި ނިންމާލީ، ޔޫރަޕްގެ އެންމެ ބޮޑު ތަށި ހޯދައިގެން،" ކްރޫސް ބުންޏެވެ.
ރެއާލަށް 2014 ވަނަ އަހަރު ބަދަލުވި، ކްރޫސް އެ ކްލަބްގައި ހޭދަކުރި 10 އަހަރު ތެރޭ 465 މެޗު ކުޅެ، 23 ތަށި ހޯދި އެވެ. އެ މުއްދަތުގައި ކްރޫސް ޖެހީ 28 ގޯލެވެ. ޗެމްޕިއަންސް ލީގުގެ ފައިނަލަކީ، ރެއާލާ އެކު ކްރޫސް މޮޅުވި 300 ވަނަ މެޗެވެ.
ކްރޫސް އަށް ފުޓްބޯޅަ ކެރިއަރުގައި އޮތް ފަހު މުބާރާތަކީ، މި މަހު 14 ގައި އަމިއްލަ ގައުމުގައި ފަށާ ޔޫރޯ ފުޓްބޯޅަ މުބާރާތެވެ. ކްރޫސް އަކީ ޖަރުމަނު ޓީމުގެ އެއް ވައިސް ކެޕްޓަން އެވެ.
