ސެވިލް، ސްޕެއިން (ސެޕްޓެމްބަރު 5) - އިތުރު ވަގުތުގެ ތެރޭގައި ކީލިއަން އެމްބާޕޭ އަތުން ޕެނަލްޓީއެއް ނާކާމިޔާބުވިއިރު، ހޯސޭ މޮރީނިއޯ ކޯޗުކޮށްދޭ ރެއާލް މެޑްރިޑުން ސްޕެނިޝް ލީގުގައި 1-0 އިން ރެއާލް ބެޓިސް އަތުން ބަލިވެއްޖެ އެވެ.
ރެއާލްގެ ކޯޗަކަށް ދެ ވަނަ ފަހަރަށް ހަވާލުވި މޮރީނިއޯގެ އިރުޝާދުގެ ދަށުން މި ސީޒަނުގައި ނުކުމެ، ލީގުގައި ފުރަތަމަ ކުޅުނު ތިން މެޗުން ވެސް ރެއާލް ވަނީ މޮޅުވެފަ އެވެ. އެކަމަކު، ބެޓިސް ދަނޑުގައި އެ ޓީމުން ކުރަން ޖެހުނީ އެންމެ ރަނގަޅު ތަޖުރިބާއެއް ނޫނެވެ. ސީޒަނުގައި ފުރަތަމަ ފަހަރަށް ވަނީ ބަލިވެފަ އެވެ.
އެސްޓަޑިއޯ ލަ ކަރްޓޫހާ ސްޓޭޑިއަމްގައި، ބެޓިސް އާއި ރެއާލްގެ ދެމެދުގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު ޖެހީ މެޗުގެ ފުރިހަމަ ވަގުތު ހަމަވާން ނުވަ މިނިޓަށް ވެފައި ހުއްޓަ އެވެ.
އެ ގޮތުން، މެޗުގެ 81 ވަނަ މިނިޓްގައި ކޯނަރަކުން ރެއާލްގެ އޭރިއާތެރެއަށް ހުރަސްވި ބޯޅައެއްގައި ބެޓިސްގެ ނެލްސަން ޑެއޯސާ ބޮލުން ފޮނުވާލި ބޯޅަ ރެއާލްގެ ކީޕަރު، ތިބޯ ކޯޓުއާ އަތުގައި ޖެހިފައި، ރީބައުންސަކަށް ނުކުތް ވަގުުތު ބެޓިސްގެ ފޯވާޑް، ޓްރޯއި ޕެރޮޓް ރަނގަޅު ތަނަަަށް އަރައި ގޯލަށް ބޯޅަ ފޮނުވާލި އެވެ.
ބެޓިސް އިން ލީޑުނެގިތާ ފަސް މިނިޓް ފަހުން، ރެއާލްގެ އެމްބާޕޭ ޖެހި ޝޮޓެއް ވަނީ ހުރަސްދަނޑިއަށް އަމާޒުވެފަ އެވެ.
ރެއާލުން ވަނީ 87 ވަނަ މިނިޓްގައި ލަނޑެއް ޖަހައި އެއްވަރުކޮށްފަ އެވެ. ބެޓިސްގެ އޭރިއާތެރެއަށް ރެއާލްގެ ވިނީޝިއުސް ޖޫނިއާ ނެގި ހުރަހަކުން އެ ޓީމުގެ ކާލޯސް އެސްޕީ އެކްރަބެޓިކް ކިކަކުން ޖެހި މޮޅު ލަނޑު ބަލައި ނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. އެއީ، އެ އެޓޭކް އެންމެ ފުރަތަމަ ފެށިއިރު، އެސްޕީ ބޯޅަ އަށް އަރައި ހުރީ އޮފްސައިޑްގައި ކަމަށްވާތީ އެވެ.
މެޗުން ރެއާލް ބަލިނުވެ ސަލާމަތްކޮށްދޭން އެންމެ ރަނގަޅު ފުރުސަތު ލިބުނީ، އިތުރު ވަގުތުގެ ފަސް ވަނަ މިނިޓްގައި އެމްބާޕޭ އަށެވެ. އެއީ، ވިނީޝިއުސް އަށް ބެޓިސްގެ އޭރިއާތެރެއިން އެ ޓީމުގެ ނެޓަން ކުރި ފައުލަކަށް ރެފްރީ ވަނީ ޕެނަލްޓީ ދޭން ނިންމައިފަ އެވެ. ވީއޭއާރް އިން ބަލާފައި ވެސް ޕެނަލްޓީއެއް ކަމަށް ނިންމި އެެވެ. އެކަމަކު، އެމްބާޕޭ، ފޮނުވާލި ޕެނަލްޓީ ބެޓިސްގެ ކީޕަރު، އަލްވާރޯ ވަލޭސް ވަނީ މަތަކޮށްފަ އެވެ.
އޭގެ ފަހުން، ކޯނަރަކުން ރެއާލްގެ ޓްރެންޓް އަލެކްސަންޑަ އާނޯލްޑް ނެގި ބޯޅައެއް އެސްޕީ ބޮލުން ފޮނުވާލިއިރު، އެ ހަމަލާ ވެސް ކީޕަރު ވަލޭސް ވަނީ ހުއްޓުވައިފަ އެވެ.
ރެއާލުން ފުރަތަމަ ފަަހަރަށް މި ސީޒަނުގައި ބަލިވިއިރު، މެންޗެސްޓާ ސިޓީ އާއި ވިޔަރެއާލްގެ ކުރީގެ ކޯޗު މެނުއަލް ޕެލެގްރީނީ ކޯޗުކޮށްދޭ ބެޓިސް އިން ސީޒަނުގައި ކުޅުނު ފުރަތަމަ ހަތަރު މެޗުގެ ތެރެއިން ތިން މެޗުން މި ވަނީ މޮޅުވެފަ އެވެ.
