ބ. އޭދަފުށީގައި އިއްޔެ ފެށި ރިވައިވަލް ސްޕޯޓްސް ބެޑްމިންޓަން ޗެލެންޖްގެ ފުރަަތަމަ ދުވަހު ވެސް ފޯރިގަދަ މެޗުތަކެއް ފެނިގެންގޮސްފި އެވެ.
އިއްޔެ އިން ފެށިގެން މި މަހު 24 ވަނަ ދުވަހުގެ ނިޔަލަށް އޭދަފުށީ ޔޫތު ސެންޓަރު، ބެޑްމިންޓަން ކޯޓުގައި ކުރިއަށްދާ މުބާރާތުގައި 200 އަށް ވުރެ ގިނަ ކުޅުންތެރިން ވާދަކުރެ އެވެ. މިއީ، މި އަހަރު ޖެނުއަރީ މަހު، ރިވައިވަލް އިން އޭދަފުށީގައި ބޭއްވި ޖޫނިއާ މުބާރާތާއި، ދާދި ފަހުން ބޭއްވި އިންޓަ ރިސޯޓް މުބާރާތަށް ވުރެ ފުޅާކޮށް ކުރިއަށްދާ މުބާރާތެކެވެ.
މުބާރާތުގައި އިއްޔެ ވަނީ 63 މެޗު ކުޅެފަ އެވެ. މިއަދު ވެސް ގިނަ މެޗުތަކެއް ކުޅޭ ގޮތަށް ވަނީ ހަމަޖެހިފަ އެވެ.
ރިވައިވަލް ސްޕޯޓްސް ބެޑްމިންޓަން ޗެލެންްޖްގެ މެޗެއްގެ ތެރެއިން.-- ފޮޓޯ: މިރާން ނާޝިމް / އަދަދު
ރިވައިވަލް ސްޕޯޓްސް ކްލަބްގެ 112 ކުޅުންތެރިން މި މުބާރާތުގައި ވާދަކުރާއިރު، ދެން ހިމެނެނީ، އެހެން ޓީމުތަކާއި އިންޑިވިޖުއަލް ކުޅުންތެރިންނެވެ. ވާދަކުރާ ކުޅުންތެރިންނަށް ބަލާއިރު، އޭދަފުށީ ކުޅުންތެރިންގެ އިތުރުން, މާލޭގެ އެކަޑަމީތަކުގެ ކުޅުންތެރިންނާއި, ޅ. ނައިފަރު, ނ. ހޮޅުދޫ, އއ. ތޮއްޑޫގެ ކުޅުންތެރިން ވާދަކުރެ އެވެ. މީގެ ތެރޭގައި ގައުމީ ލެވަލްގައި ވާދަކުރާ ކުޅުންތެރިން ވެސް ހިމެެނެ އެވެ.
ރިވައިވަލްގެ މި ޗެލެންޖް މުބާރާތް ކުރިއަށް ދާނީ ދެ ޑިވިޝަނަކަށް ބަހާލައިގެންނެވެ. އެއީ ޖޫނިއާ އަދި މާސްޓާސް އެވެ. ޖޫނިއާ ބައިގައި ކުރިއަށް ދާނީ 10, 12, 14, 16 އަދި 18 އަހަރުން ދަށުގެ ކެޓަގަރީ ތަކެވެ.
ރިވައިވަލް ސްޕޯޓްސް ބެޑްމިންޓަން ޗެލެންްޖްގެ މެޗެއްގެ ތެރެއިން.-- ފޮޓޯ: މިރާން ނާޝިމް / އަދަދު
ދެން އޮތް، މާސްޓާސް ޑިވިޝަނުގައި ކުރިއަށް ދާނީ 35 އަދި 45 އަހަރުން މަތީގެ ކުޅުންތެރިންނަށް ހުޅުވާލައިގެން އަންހެން އަދި ފިރިހެން ސިންގަލްސް އަދި ޑަބަލްސްގެ މެޗުތަކެވެ.
މީގެ އިތުރުން ރިވައިވަލް ސްޕޯޓްސް އާއި ސްޕެޝަލް އޮލިމްޕިކްސް މޯލްޑިވްސް ގުޅިގެން, މި ފަހަރުގެ މުބާރާތުގައި ހަތަރު އަންހެން އަދި ހަތަރު ފިރިހެން ކުޅުންތެރިންނާއެކު, ހާއްސަ ކެޓަގަރީ އެއްގެ ކުޅުން ކުރިއަށްދާނެ އެވެ.
ރިވައިވަލް އިން ވަނީ މި މުބާރާތުގެ ޗެމްޕިއަން އަދި ރަނަރަޕަށް ފައިސާގެ އިނާމު ދިނުމަށް ނިންމާފަ އެވެ. އެގޮތުން އިނާމުތަކުގެ ޖުމްލަ 60,000 ރުފިޔާ އަށް އަރާނެ އެވެ.
