ހަފްތާ ބަންދުގައި ކުރިއަށްދިޔަ ގައުމީ ގްރޯން ޕްރީ 2023 ގެ މޮޅު އެތުލީޓުގެ މަގާމު ހުސެއިން ފަޒީލް ހާރޫން (ފްލޭޝް) އާއި ފަސޫހާ އަހުމަދު ހޯދައިފި އެވެ.
ފަޒީލް އާއި ފަސޫހާ އަށް މޮޅު އެތުލީޓުގެ މަގާމު ލިބުމުގެ އެންމެ ބޮޑު ސަބަބަކީ މުބާރާތުގައި ގައުމީ ރެކޯޑް މުގުރާލާފައިވުމެވެ.
އެ ގޮތުން، ފަސޫހާ ވަނީ، އިއްޔެ، އަންހެނުންގެ 1500 މީޓަރު ދުވުމުން ގައުމީ ރެކޯޑް ހަދައިފަ އެވެ. އަދި ފަޒީލް ވަނީ މިއަދު، ފިރިހެނުންގެ 3000 މީޓަރު ރޭހުން ގައުމީ ރެކޯޑް މުގުރާލައިފަ އެވެ. ފަޒީލް، މިދިޔަ އަހަރުގެ ގްރޯން ޕްރީގެ މޮޅު އެތުލީޓުގެ މަގާމު ހޯދީ ވެސް ގައުމީ ރެކޯޑަކާ އެކު އެވެ.
މިއީ ފަޒީލް، ގްރޯން ޕްރީގެ މޮޅު ފިރިހެން އެތުލީޓަކަށް ހޮވުނު ހަތަރު ވަނަ ފަހަރު އެވެ. އެ ގޮތުން، 2018 އާއި 2019 ވަަނަ އަހަރުގެ ގްރޯން ޕްރީގެ އެއް ވަނަ ފިރިހެން އެތުލީޓަކަށް ހޮވުނު ފަޒީލް، 2021 ވަނަ އަހަރުގެ މުބާރާތުގައި ވާދަނުކުރެ އެވެ.
އެކަމަކު، މުބާރާތަށް އެނބުރި އައިސް، މިދިޔަ އަހަރު ފަޒީލް ވަނީ އަނެއްކާ ވެސް ގްރޯން ޕްރީގައި އޭނާގެ މަގާމު ދިފާއުކޮށްފަ އެވެ. އަދި މި ފަހަރު ވެސް ރެކޯޑަކާ އެކު، މޮޅު ފިރިހެން އެތުލީޓުގެ ޓްރޮފީ ހޯދީ އެވެ.
މިއަދު ކުރިއަށްދިޔަ 3000 މީޓަރު ރޭސް ނިންމުމަށް ފަހު ފަޒީލް އުފާފާޅުކުރަނީ.--- ފޮޓޯ: އަބްދުﷲ އިޔާން/ އަަދަދު
އިއްޔެ، ފިރިހެނުންގެ 1500 މީޓަރު ދުވުމުގައި ފަޒީލް އެއް ވަނަ ހޯދީ 4 މިނިޓް، 09.99 އިން ރޭސް ނިންމައިގެންނެވެ.
ފަޒީލް، މިއަދު، ފިރިހެނުންގެ 3000 މީޓަރު ދުވުމުން ގައުމީ ރެކޯޑް މުގުރާލީ 8 މިނިޓް 55.87 ސިކުންތުންނެވެ. އެ އިވެންޓުން ދެ ވަނަ އަށް ދިޔަ، އައިލެންޑް ރަނާސް މޯލްޑިވްސްގެ ޔޫސުފް އިބްރާހިމް ރޭސް ނިންމީ، 9 މިނިޓް 07.42 ސިކުންތުންނެވެ. ތިން ވަނަ ހޯދި ދިވެހި ސިފައިންގެ ކްލަބްގެ ޝިފާޒް މުހައްމަދުގެ ޓައިމިން އަކީ 9 މިނިޓް 28.92 ސިކުންތުންނެވެ.
ފަޒީލް ފަހަތުން ދެ ވަނަ ހޯދީ 100 މީޓަރާއި 200 މީޓަރު ދުވުމުން އެއް ވަނަ ހޯދި ހަސަން ސާއިދު އެވެ.
އިއްޔެ، ފިރިހެނުންގެ 100 މީޓަރު ދުވުމުން ސާއިދު އެއް ވަނަ ހޯދި ޓައިިމިން އަކީ، 10.73 ސިކުންތެވެ. މިއަދު، 200 މީޓަރު ދުވުމުގެ ރޭހުގައި ސާއިދު އިވެންޓް ނިންމީ 22.04 ސިކުންތުންނެވެ.
މިއަދު ކުރިއަށްދިޔަ 200 މީޓަރު ދުވުމުގެ އިވެންޓްގެ ތެރެއިން.--- ފޮޓޯ: އަބްދުﷲ އިޔާން/ އަދަދު
އެންމެ މޮޅު އަންހެން އެތުލީޓަކަށް ހޮވުނު ޓްރެކް އެންޑް ފީލްޑް އެސޯސިއޭޝަންގެ ފަސޫހާ، މިއަދު، 800 މީޓަރު ދުވުމުން އެއް ވަނަ ހޯދީ 2 މިނިޓް 19.73 ސިކުންތުންނެވެ. ދެ ވަނަ އަށް ދިޔައީ ޓްރެކް އެންޑް ފީލްޑް އެސޯސިއޭޝަންގެ ޒީކް އަޝްރަފް ރަޝިދު އެވެ. އޭނާގެ ޓައިމިން އަކީ 2 މިނިޓް 37.17 ސިކުންތުންނެވެ.
ދެ ވަނަ އަންހެން އެތުލީޓަކަށް ހޮވުނީ ޝަރީފް ސްޕޯޓްސްގެ އަހުނާ ނިޒާރު އެވެ. އޭނާ ވަނީ އަންހެނުންގެ 100 މީޓަރާއި 200 މީޓަރު ރޭސް ކާމިޔާބުކޮށްފަ އެވެ. އިއްޔެ ބޭއްވި، އަންހެނުންގެ 100 މީޓަރު ދުވުމުން، އަހްނާ، އެއް ވަނަ ހޯދިއިރު، ޓައިމިން އަކީ، 12.69 ސިކުންތެވެ.
މިއަދު ކުރިއަށްދިޔަ 200 މީޓަރު ދުވުމުން، އަހްނާ އެއް ވަނަ ހޯދީ 26.81 ސިކުންތުން ރޭސް ނިންމައިގެންނެވެ. މި އިވެންޓުން ދެ ވަނަ ހޯދި ދާންދޫ ސްކޫލްގެ އައިމިނަތު ލަޔާނާ މުހައްމަދުގެ ޓައިމިން އަކީ 27.38 ސިކުންތުންނެވެ.
