މެޑްރިޑް (ނޮވެމްބަރު 15) - ކޯޗިން ކެރިއަރުގެ ބާކީ ބައި ނިންމާލާނީ އެތުލެޓިކޯ މެޑްރިޑްގައި ހުރެ ނޫން ކަމަށް މަޝްހޫރު ކޯޗު ޑިއޭގޯ ސިމިއޯނީ ބުނެފި އެވެ.
އާޖެންޓީނާ ގައުމީ ޓީމުގެ ކުރީގެ މިޑްފީލްޑަރު ސިމިއޯނީ، 53، އޭނާ ކުރިން ކުޅުނު އެތުލެޓިކޯގެ ކޯޗުކަމާ 2011 ވަނަ އަހަރު ހަވާލުވުމުގެ ކުރިން ގިނައިން ކޯޗުކޮށްދިނީ އާޖެންޓީނާ ކްލަބްތަކަށެވެ. އެ ގޮތުން، 2006 ވަނަ އަހަރު، އާޖެންޓީނާގެ ރޭސިން ކްލަބުން ކޯޗިން ކެރިއަރު ފެށި ސިމިއޯނީ ވަނީ އެ ގައުމުގެ، އެސްޓޫޑިއާންޓެސް، ރިވާ ޕްލޭޓް އަދި ސެން ލޮރެންޒޯ އަށް ކޯޗުކޮށްދީފަ އެވެ. އަދި އިޓަލީގެ ކަޓާނިއާގައި ވެސް މަސައްކަތް ކުރި އެވެ.
އެތުލެޓިކޯގެ ކޯޗުކަމާ 2011 ވަނަ އަހަރުގެ ޑިސެމްބަރު މަހު ހަވާލުވި ސިމިއޯނީ ވަނީ ދާދި ފަހުން 2027 ވަނަ އަހަރުގެ ޖޫން މަހުގެ ނިޔަލަށް އެތުލެޓިކޯއާ އެކު ކޮންޓްރެކްޓް އާ ކޮށްފަ އެވެ.
އާޖެންޓީނާގެ މީޑިއާ އަކަށް ދިން އިންޓަވިއުއެއްގައި ސިމިއޯނީ ބުނީ މިއީ އެތުލެޓިކޯއާ އެކު އޭނާގެ ފަހު ކޮންޓްރެކްޓަށް ވުމުގެ ފުރުސަތު އެބައޮތް ކަަމަށެވެ.
"ޔަގީނުން ވެސް އަހަރެން ކޮންމެވެސް އެހެން ދިމާލެއްގައި ކޯޗިން މަސައްކަތް އަދި ކުރާނެ، އެއީ އަދި ވިސްނާފައި ނިންމަން ޖެހޭ ނިންމުމެއް،" ސިމިއޯނީ ބުންޏެވެ.
އާޖެންޓީނާ ގައުމީ ޓީމާ ހަވާލުވެދާނެތޯ އެހުމުން ސިމިއޯނީ ވަނީ އެއީ އަދި ވިސްނުމަށް ވެސް ނުގެންނަ ކަމެއް ކަމަށް ބުނެފަ އެވެ.
ސިމިއޯނީ ވަނީ އެތުލެޓިކޯ އަށް ރަނގަޅު ކާމިޔާބީތަކެއް ވެސް ހޯދައިދީފަ އެވެ. އެ ގޮތުން، ސްޕެނިޝް ލީގާއި ޔޫރޮޕާ ލީގާއި ޔުއެފާ ސުޕަ ކަޕް ވަނީ ދެ ފަހަރު ކާމިޔާބުކޮށްފަ އެވެ. އަދި ސްޕެނިޝް ކަޕާއި ސްޕެނިޝް ސުޕަ ކަޕް އެއް ފަަހަރު ކާމިޔާބު ކުރިއިރު، ޗެމްޕިއަންސް ލީގުގެ ފައިނަލަށް ދެ ފަހަރު ދަތުރުކުރި އެވެ.
