ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގެންނެވި ކަމަށް ވިދާޅުވެ މަޖިލީހުގެ ޖަލްސާއެއްގައި ބައެއް މެމްބަރުން ކުރެއްވި ތުހުމަތުތައް ދޮގުކޮށް އެފަދަ ތުހުމަތެއް މަޖިލީހުގެ ތަޅުމުން ބޭރުގައި ކޮށްފިނަމަ ކަމާބެހޭ އިދާރާތަކަށް މައްސަލަ ހުށަހަޅާނެ ކަމަށް ސަރުކާރުން ބުނެފި އެވެ.
މެއި 6, 2021 ގެ ރޭގަނޑުގެ ވަގުތެއްގައި ދިން ބޮމުގެ ހަމަލާއާ ސަރުކާރާ ގުޅުން އޮތް ކަމަށާއި ސަރުކާރުގެ އިހުމާލު އޮތް ކަމަށް މީގެކުރިން ވެސް ނަޝީދަށް ތާއިދުކުރައްވާ ބޭފުޅުން ވަނީ ތުހުމަތު ކުރައްވާފަ އެވެ. ނަމަވެސް, ސީދާ ރައީސްގެ އިސްތަށިފުޅުގައި އެ ތުހުމަތު އެޅުވީ އިއްޔެގެ މަޖިލިސް ޖަލްސާގައި ވާހަކަ ދެއްކެވި ބައެއް މެމްބަރުންނެވެ.
އެގޮތުން, ނަޝީދު އަވަހާރަކޮށްލަން ބޮން ގޮއްވާލީ ސަރުކާރުން ކަމަށާއި އެކަމުގެ އަޑީގައި ހުންނެވީ ރައީސް ކަމަށް އަލަށް އުފައްދާ އިދިކޮޅު ޕާޓީ ދަ ޑިމޮކްރެޓްސްގެ އިސް މެމްބަރަކު ކަމަށްވާ މާފަންނު މެދު ދާއިރާ ތަމްސީލު ކުރައްވާ އިބްރާހިމް ރަޝީދު (ބޮންޑެ) ވަނީ ތުހުމަތު ކުރައްވާފަ އެވެ.
ސަރުކާރުގެ ބައިވެރިވުން އޮތް ކަމާއި އެއީ ސަރުކާރަށް އެނގިގެން ގޮއްވާލި ބޮމެއް ކަމަށް ދޭހަވާ މޭރުމަކުން ވެސް އިއްޔެގެ ޖަލްސާގައި ޑިމޮކްރެޓްސްގެ ބައެއް ބޭފުޅުން ވާހަކަ ދެއްކެވި އެވެ. ނަމަވެސް, މިއަދު ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ ތަރުޖަމާނު މިއުވާން މުހައްމަދު ވަނީ އެއީ "ކަނޑައެޅިގެން ދޮގު" ތުހުމަތުތަކެއް ކަމަށް ވިދާޅުވެފަ އެވެ.
"އެއީ އެ ހަމަލާގެ ސީރިއަސްކަން ގެއްލުވާލައި ބަޔަކަށް ގެއްލިފައިވާ ސިޔާސީ ތާއީދު އަނބުރާ ހޯދުމުގެ ގޮތުން, ތާއީދު ހޯދިދާނެ ކަމަށް ދެކެވަޑައިގެން ބައެއް ބޭފުޅުން ދައްކަވާ ވާހަކަ. އެކަމުގައި ހަގީގަތެއް އޮތް ކަމަށްވާނަމަ މި ދެ ތިން ދުވަހު ރައްޔިތުންގެ މަޖިލީހުގެ ތަޅުމުގައި އެކަނި ކީއްވެގެންތޯ އެ ވާހަކަ ދައްކަވަންވީ," މިއުވާން ވިދާޅުވި އެވެ.
މީގެކުރިން ވެސް އެހެން ޕްލެޓްފޯމްތަކުގައި ވެސް އެފަދަ ވާހަކަތައް ދެއްކުމުގެ ފުރުސަތު ލިބުނު ކަމަށާއި މިހާރު އެފަދަ ސާބިތު ނުހިފޭ ތުހުމަތުތައް ކުރަމުންދަނީ މަޖިލީހުގެ މެމްބަރުންނަށް ލިބޭ އިމްތިޔާޒްތަކުގެ ނިވަލުގައި ކަމަށް މިއުވާން ވިދާޅުވި އެވެ.
"ދައްކާ ވާހަކަތައް ސާބިތު ކޮށްދޭން ޖެހޭ ޕްލެޓްފޯމެއްގައި އެ ބޭފުޅުން އެ ވާހަކަ ނުދައްކަވަނީ ކީއްވެގެންތޯ ސުވާލު އުފެދޭ. މަޖިލީހުގެ ބޭރުގައި, އިމްތިޔާޒް ލިބިވަޑައިގަންނަވާ ތަނަކުން ބޭރުގައި, އަދި ރައްޔިތުންގެ ހިތުގައި ރުޅިވެރިކަމާއި ބައިބައިވުން އުފެއްދުމަށް ދޮގު ވާހަކަތަކެއް އެ ބޭފުޅުން ދައްކަވައިފިނަމަ ކަމާބެހޭ މުއައްސަސާތަކަށް ހުށަހަޅައިގެން އެ މައްސަލަ ބަލާނަން," މަޖިލީހުން ބޭރުގައި އެފަދަ ތުހުމަތެއް ކޮށްފިނަމަ މައްސަލަ ހުށަހަޅާނެ ކަމުގެ އިންޒާރު ދެއްވަމުން މިއުވާން ވިދާޅުވި އެވެ.
ބޮމުގެ ހަމަލާއާ ގުޅުވައި ރައީސް ސޯލިހާއި ސަރުކާރަށް ތުހުމަތުތައް އަމާޒު ކުރައްވަމުން ގެންދަވަނީ ސިޔާސީ ބޭނުމެއްގައި ކަމަށް އިއްޔެ މަޖިލީހުގެ ޖަލްސާގައި ސަރުކާރަށް ތާއިދު ކުރައްވާ ބޭފުޅުން ވެސް ވިދާޅުވި އެވެ. އަދި, އެކަމާ ގުޅިގެން މަޖިލީހުގެ ތަޅުން ހޫނުވެ ޖަލްސާ ވެސް ހުއްޓާލި އެވެ.
ނަޝީދާއި ރައީސްގެ ކޯޅުމުގެ ތެރެއިން އަނެއްކާ ވެސް ބޮމުގެ ހަމަލާއާ ގުޅޭ ވާހަކަތައް ދެކެވެން ފެށީ "އަދަދު" ނޫހަށް ދެއްވި އިންޓަވިއުއެއްގައި ގަލޮޅު އުތުރު ދާއިރާގެ މެމްބަރު އީވާ އަބްދުالله ވިދާޅުވި ބައެއް ވާހަކަތަކާ ގުޅިގެންނެވެ. އެއަށް ފަހު ދެ ރައީސުންގެ ފަޅިން ވެސް ހޫނު ބަހުގެ ހަމަލާތަކެއް ދަނީ އެކަމާ ގުޅިގެން ބަދަލުކުރަމުންނެވެ.
