އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) އިން އިންތިޒާމްކޮށްގެން މިދިޔަ އަހަރު ކުރިއަށް ގެންދިޔަ ބޮޑީބޯޑިން ވޯލްޑް ޕްރޯ ޓުއާގެ މުބާރާތްތަކުގެ ތެރެއިން އެންމެ ފުރިހަމަ މުބާރާތުގެ ގޮތުގައި ރާއްޖޭގައި ބޭއްވި މޯލްޑިވްސް ޕްރޯ 2022 ކަމަށް ކަނޑައަޅައިފި އެވެ.
މޯލްޑިވްސް ޕްރޯ އަކީ ޖުލައި މަހުގެ 29 އިން އޮގަސްޓް 6 އަށް މާލޭ ރާޅުގަނޑު ސަރަހައްދުގައި ބޭއްވި ބޭއްވި ބޮޑީބޯޑިންގެ އެންމެ މަތީ ފަންތީގެ މުބާރާތެކެވެ. މި މުބާރާތުގައި ދުނިޔޭގެ 15 ގައުމަކުން ނަން މަޝްހޫރު އެތައް އެތުލީޓުންނެއް ވާދަކުރި އެވެ. އޭގެ ތެރޭގައި ދުނިޔޭގެ ޗެމްޕިއަނުންވެސް ހިމެނެ އެވެ.
"ވިޒިޓް މޯލްޑިވްސް ޕްރޯ 2022" އަށް ފަހު އައިބީސީ އިން ވެސް ވަނީ މުބާރާތުގެ އިންތިޒާމްތައް ރަނގަޅުކަން ފާހަގަކޮށްފަ އެވެ.
އޭޝިއާ ސަރަހައްދުގައިވެސް ބޭއްވި ފުރަތަމަ މުބާރާތާއި ގުޅޭގޮތުން މިދިޔަ އަހަރު އައިބީސީގެ ސީއީއޯ އަދި ވޯލްޑް ޓުއާ މެނޭޖާ ގްލެން ކުއެވޭސް ވިދާޅުވީ މުބާރާތުގެ އިންތިޒާމްތަކާއި ހިންގުންތެރިކަމަށް ބަލާއިރު، ރާއްޖޭގެ ބޮޑީބޯޑިން އެސޯސިއޭޝަނުން ކޮށްފައިވަނީ ފާހަގަކޮށްލަން ޖެހޭ ފެންވަރުގެ މަސައްކަތެއް ކަމަށެވެ.
ވޯލްޑް ޓުއާގެ 2022ގެ ހުރިހާ މުބާރާތެއް ނިމުމަށް ފަހު މި އަހަރުގެ މުބާރާތްތަކަށް ތައްޔާރުވަމުން އަންނައިރު މިދިޔަ އަހަރުގެ މުބާރާތްތަކާއި ގުޅޭ އެކި ވާހަކަތައް ދުނިޔޭގެ އެކި މީޑިއާތަކުގައި އަންނަނީ ފާހަގަކުރަމުންނެވެ.
އެ ގޮތުން ކޮވިޑުގެ މެދު ކެނޑުމަށްފަހު ބޭއްވި ފުރިހަމަ މުބާރާތުގެ ކާމިޔާބީ އާއި އެތުލީޓުންގެ މަސައްކަތް އަންނަނީ ފާހަގަކުރަމުންނެވެ. މީގެ ތެރެއިން ވެސް އެންމެ ބޮޑަށް ފާހަގަވީ މިދިޔަ އަހަރުގެ އެންމެ ފުރިހަމަ މުބާރާތުގެ ގޮތުގައި ރާއްޖޭގައި ބޭއްވި މޯލްޑިވްސް ޕްރޯ ފާހަގަކުރުމެވެ.
"މިދިޔަ އަހަރުގެ އެންމެ ފުރިހަމަ މުބާރާތަކީ ރާއްޖޭގައި ބޭއްވި ވިޒިޓް މޯލްޑިވްސް ޕްރޯ، މުބާރާތުގެ ފޯރިއާއި، ބައިވެރިވުމާއި، ލައިވް ކުރުމަށް ބަލާއިރުވެސް މިއީ ވަރަށް ފުރިހަމަ މުބާރާތެއް" ބޮޑީބޯޑިންގެ ރިވިއުތައް ލިޔާ މީޑިއާތަކުގައި ލިޔެފައިވެ އެވެ.
ރިވިއުތަކުގައި ފާހަގަކޮށްފައިވާ ގޮތުން މޯލްޑިވްސް ޕްރޯ އަކީ ދުނިޔޭގެ ގައުމެއްގެ ރައީސަކު ބައިވެރިވި ދެ ވަނަ ވޯލްޑް ޓުއާ މުބާރާތެވެ. ރާއްޖޭގެ ރައީސުލްޖުމްހޫރިއްޔާ، އިބްރާހިމް މުހައްމަދު ސޯލިހު، މޯލްޑިވްސް ޕްރޯގެ ހީޓުތައް ބައްލަވާލައްވަން ވަޑައިގެންނެވިކަން ފާހަގަކުރަމުން އައިބީސީ އިން ވަނީ އެއީ މުޅި މުބާރާތަށް ވެސް ލިބުނު ފުރިހަމަކަމެއްގެ ގޮތުގައި ފާހަގަކޮށްފަ އެވެ.
ރައީސް ސޯލިހުގެ ކުރިން އައިބީސީ ޓުއާގެ އިވެންޓެއް ބައްލަވާލެއްވި ރައީސަކީ އެމެރިކާގެ ކުރީގެ ރައީސް ބަރަކް އޮބާމާ އެވެ. އޮބާމާ ވަނީ އެމެރިކާގެ ހަވާއީގައި 2015 ވަނަ އަހަރު ކުރިއަށްދިޔަ އައިބީސީ އިވެންޓެއް ބައްލަވާލައްވައިފަ އެވެ.
އައިބީސީ ވޯލްޑް ޓުއާ އިވެންޓުތަކުގެ ތެރެއިން ރާއްޖޭގެ އިވެންޓުވީ މުބާރާތުގެ ބައެއް ކެޓަގަރީތަކުގެ ޗެމްޕިއަނުން ކަނޑައެޅުމުގައި މުހިންމު އިވެންޓަކަށެވެ. މިދިޔަ އަހަރުގެ އަންހެން ޗެމްޕިއަންކަން ހޯދި އިޒަބެލާ ސޫސާ އަށް އެއް ވަނަ ލިބުމުގައި ރާއްޖޭގެ މުބާރާތުން އޭނާ ހޯދި ކާމިޔާބީއާ އެކު ލިބުނު ޕޮއިންޓްތައް މުހިންމު ދައުރެއް އަދާކުރި އެވެ.
މީގެ އިތުރުން ޑްރޮޕް ނީ ޑިވިޝަންގެ ޗެމްޕިއަންކަން ޑޭވިޑް ހަބާޑް އަށް ލިބުމާއި ޖޫނިއާ ބައި ގެބްރިލް މޮލީނާ ކާމިޔާބު ކުރުމުގައިވެސް ރާއްޖޭގެ ޕްރޯގައި އެ ދެ އެތުލީޓުން ޗެމްޕިއަންކަން ހޯދުން މުހިންމު ދައުރެއް އަދާކުރި އެވެ.
އައިބީސީ ވޯލްޑް ޓުއާގެ 2023ގެ އިވެންޓު ކަލަންޑަރު އަދި އިއުލާންކޮށްފަ އެއް ނުވެ އެވެ. ނަމަވެސް މިދިޔަ އަހަރުގައި ރާއްޖެ އިން އިންތިޒާމްކުރި ފުރިހަމަ އިވެންޓާ އެކު މި އަހަރު ވެސް މޯލްޑިވްސް ޕްރޯ ރާއްޖޭގައި ބޭއްވުމުގެ ފުރުސަތު ބޮޑުކަމަށް ބެލެވެ އެވެ.
