ވިޒިޓް މޯލްޑިވްސް ޕްރޯ 2022ގެ ޖޫނިއާ ބައިގެ ފައިނަލުގައި މިއަދު ކެނެރީ އައިލެންޑްސްގެ ގެބްރިއެލް މޮލީނާ އަތުން ބަލިވި ނަމަވެސް އާދަޔާ ޚިލާފު ހިތްވަރެއް ރާއްޖޭގެ ޒުވާން ބޮޑީބޯޑަރު އާމިން އުމަރު މޫސާ ދައްކައިފި އެވެ.
އާމިން އަކީ ރާއްޖޭގެ ބޮޑީބޯޑިން ތާރީޚުގައި ބޮޑީބޯޑިން ވޯލްޑް ޓުއާގެ ފައިނަލުން ޖާގަ ހޯދި ރާއްޖޭގެ ފުރަތަމަ އެތުލީޓެވެ. އަދި މިއީ އައިބީސީ ވޯލްޑް ޓުއާ މުބާރާތެއްގައި ރާއްޖޭގެ އެތުލީޓުން ވާދަކުރި ފުރަތަމަ ފަހަރެވެ.
ޖޫނިއާ ބައިގެ ފައިނަލުގައި އާމިން ވަނީ މިހާތަނަށް މި މުބާރާތުގެ ޖޫނިއާ ބައިގައި އޭނާގެ އެންމެ މަތީ ސްކޯވެސް ހޯދައިފަ އެވެ. ފައިނަލުން ގެބްރިއެލް މޮލީނާ މޮޅުވީ ވެސް މި މުބާރާތުގެ ޖޫނިއާ ބައިގެ ހުރިހާ ގޮތަކުން އެންމެ މަތީ ސްކޯ ހޯދައިގެންނެވެ. ފައިނަލުން އާމިން ބަލިވީ 0.90 ގެ ކުޑަ ތަފާތަކުންނެވެ.
ފައިނަލް ހީޓު ފަށައިގެން ލީޑުގައި އޮތީ އާމިން އެވެ. އޭނާގެ ފުރަތަމަ ދެ ރާޅުން ހޯދި ސްކޯއާ އެކު ކުރީގައި އޮއްވައި މޮލީނާ އަށް ކުރި ލިބުނީ ހީޓު ނިމެން 10 މިނެޓަށް ވެފައިވަނިކޮށް އޭނާ ހޯދި ސްކޯ އިންނެވެ. އޭގެ ފަހުން އާމިން އަނެއްކާ ވެސް އެއް ރާޅުގައި 6.60 ގެ ސްކޯ އެއް ހޯދައި ލީޑު ނެގި އެވެ.
މޮލީނާ ފައިނަލުން މޮޅުވި ހީޓު ނިމެން ދެ މިނެޓަށް ވެފައިވަނިކޮށް ލިބުނު ރާޅުގައި 7.25ގެ ސްކޯ އެއް ހޯދައިގެން 13.00ގެ ޖުމްލަ ސްކޯ އަކާ އެކުގަ އެވެ. އާމިން އަށް ޖުމްލަ ލިބުނީ 12.10ގެ ސްކޯ އެކެވެ.
މޯލްޑިވްސް ޕްރޯގެ ފައިނަލުގައި މިއަދު އާމިން މޫސާ ވާދަކުރަނީ / ފޮޓޯ: އަދަދު - މުހައްމަދު ޝާބިން
މި މުބާރާތުގެ ފައިނަލާ ހަމައަށް އާމިން ދިޔައީ ހުރިހާ ގޮތަކުންވެސް ހިތްވަރު ދައްކައިގެންނެވެ. ފުރަތަމަ ބުރުގައި އޭނާ ވާދަކުރި ހީޓުން ލިބުނީ ދެ ވަނަ އެވެ. އޭގެ ފަހުން ތިންވަނަ ބުރުގައި ގެބްރިއެލް މޮލީނާ އަތުން ބަލިވީ ބޮޑު ތަފާތަކުންނެވެ. ނަމަވެސް އެ ހީޓުގެ ދެ ވަނަ އާމިން އަށް ލިބުމުން އޭނާ އަށް ސެމީ ފައިނަލުން ޖާގަ ލިބުނެވެ.
ސެމީ ފައިނަލުގައި އާމިން ވަނީ އެންމެ ފަހު ވަގުތު ރާއްޖޭގެ ޖޫނިއާ ޗެމްޕިއަން ޝިމާލް ޝަމީމް (ޝިމައްލެ) ބަލިކޮށްފަ އެވެ. އެ ހީޓުގެ އެންމެ ފަހު ތިން މިނެޓަށް ދިޔައިރު އާމިން އޮތީ ބަލިވެފަ އެވެ. ނަމަވެސް ފަހު ވަގުތު 0.50ގެ ތަފާތަކުން އޭނާ ވަނީ ޝިމައްލެ ބަލިކޮށްފަ އެވެ.
އެ މޮޅާ އެކު ދުނިޔޭގެ ބޮޑީބޯޑިންގެ ތާރީޚީ ފައިނަލުން އޭނާ ޖާގަ ހޯދި އެވެ. އާމިން އަކީ ދުނިޔޭގެ ބޯޑީބޯޑިން ފެޑެރޭޝަން (އައިބީސީ)ގެ ވޯލްޑް ޓުއާ މުބާރާތެއްގެ ފައިނަލުން ޖާގަ ހޯދި ފުރަތަމަ ދިވެހި އެތުލީޓެވެ.
ކްލަބް ވެލެންސިއާއާ އެކު މި ސީޒަނުގެ ޕްރެޒިޑެންޓްސް ކަޕްގެ ޗެމްޕިއަންކަން ހޯދި އާމިން އަކީ ވެލެންސިއާ ޔޫތު ޓީމުގެ ކެޕްޓަނެވެ. ވެލެންސިއާގެ އެސިސްޓަންޓް ކޯޗު އިސްމާއިލް އާސިފް (ކުޑަހީނާ) މީގެ ކުރިން "އަދަދު" އަށް ބުނެފައިވަނީ އާމިން އަކީ ރަނގަޅަށް ފޯކަސް ކޮށްގެން މަސައްކަތް ކުރާ އެތުލީޓެކެވެ. ބޮޑީބޯޑިން އާއި ފުޓްބޯޅައިގައި ވެސް އޭނާ އަށް ކުރިއެރުން ލިބޭ އެންމެ ބޮޑު ސަބަަބަކީ ކުޑަހީނާގެ ނަޒަރުގައި އެއީ އެވެ.
