މި މަހު ފަހުކޮޅު މާލޭ ރާޅުގަނޑު ސަރަހައްދުގައި ފަށާ "ވިޒިޓް މޯލްޑިވްސް ޕްރޯ 2022" ގެ ތައްޔާރީތަކާއި ދިވެހިވަންތަ ގިނަ ބައިބައި ހިމެނޭ ގޮތަށް ޓްރެއިލާ ލޯންޗްކޮށްފި އެވެ.
ދުނިޔޭގެ ޗެމްޕިއަން ބޮޑީބޯޑަރުން ވާދަކުރާ ވިޒިޓް މޯލްޑިވްސް ޕްރޯގައި ރާއްޖޭގެ ބޮޑީބޯޑަރުން ވެސް ފެންނާނެ އެވެ. މި މުބާރާތް އޮތީ މި މަހު 29 އިން އަންނަ މަހުގެ ހަތް ވަނަ ދުވަހަށެވެ. ރޭ މުބާރާތުގެ ޓްރެއިލާ ލޯންޗްކުރިއިރު، މުބާރާތަށް 15 ދުވަހުގެ ކައުންޓް ޑައުންއެއް ވެސް ވަނީ ފަށައިފަ އެވެ.
މުބާރާތުގެ ޓްރެއިލާ ދައްކާލިއިރު، އޭގެއިން މާނަފުން ވީޑިއޯ ތަކެއް ވަނީ ދައްކާލައިފަ އެވެ. އެގޮތުން ރާއްޖޭގެ ދިރިއުޅުމުގެ ކަންކަމާއި ގުދުރަތީ ރީތިކަން ދައްކުވައިދޭ މަންޒަރުތައް ހިމެނޭއިރު، ބޮޑީބޯޑަރުން ރާޅުތަކުގެ ތެރޭގައި އުޅޭ ހިތްގައިމު ވީޑިއޯތައް ވެސް ހިމެނެ އެވެ. އަދި ރާޅުގަނޑު ސަރަހަައްދު މަތިން ފެންނަ ގޮތަށް ވީޑިއޯއެއް ހިމަނާފައިވާއިރު، ބޮޑީބޯޑިންގެ ސަޕޯޓަރުންގެ ރޫހު ފެންނަ މަންޒަރުތައް ވެސް ޓްރެއިލާ އިން ފެނެ އެވެ.
މި މުބާރާތުގައި އެކި ގައުމުތަކުން 150 އެއްހާ އެތުލީޓުން ވާދަކުރާނެ އެވެ. ހަތަރު ކެޓަގަރީއަކުން ބައިވެރިވާ ވާދަކުރާ މި އިވެންޓަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ. އަދި މިއީ ޓުއާގައި ހިމެނޭ މުބާރާތްތަކުގެ ތެރެއިން ދެ ވަނަ އަށް އެންމެ ފައިސާގެ އިނާމްވެސް ބޮޑު މުބާރާތެވެ. މިގޮތުން އިނާމް ފައިސާގެ ގޮތުގައި 70،000 ޑޮލަރު ހަތަރު ކެޓަގަރީ އަކަށް ބަހާލެވޭނެ އެވެ.
ވިޒިޓް މޯލްޑިވްސް ޕްރޯ 2022 ގެ ލޯގޯ އަކީ ވެސް ދިވެހި ގިނަ ކުލަވަރުތަކެއް ހިމެނޭގޮތަށް ރާއްޖެ ރަމްޒުކޮށްދޭ ގޮތްތަކާ އެކު ފަރުމާކުރެވިފައިވާ ލޯގޯ އެކެވެ.
މިއީ ބޮޑީބޯޑިން އެސޯސިއޭޝަން އޮފް މޯލްޑިވްސް (އެމްބީބީއޭ) އަށް ވެސް ބޮޑު ތަޖުރިބާ އެކެވެ. މި ވަރުގެ މުބާރާތެއް ރާއްޖެ އަށް ގެނެސް ކާމިޔާބު ކަމާ އެކު އިވެންޓް ބޭއްވުމަށް، އެމްބީބީއޭ އިން އަންނަނީ ގިނަ މަސައްކަތްތަކެއް ކުރަމުންނެވެ. އަދި ވިޒިޓް މޯލްޑިވްސްއާ ގުޅިގެން މި މުބާރާތް ކުރިއަށްދާއިރު، މިއީ ރާއްޖެ އިސްތިހާރު ކޮށްލަން ވެސް ލިބިގެންދާ ބޮޑު ފުރުސަތެކެވެ.
ދިވެހި ގިނަ ބޮޑީބޯޑަރުން ވެސް މި މުބާރާތުގައި ފެނިގެންދާއިރު، މިއީ އެ ބޮޑީބޯޑަރުންގެ ކެރިއަރުގައި ވެސް ހާއްސަ މުބާރާތަކަށްވާނެ އެވެ.
އެމްބީބީއޭގެ ޖެނެރަލް ސެކްރެޓަރީ ހަސަން ރަޝީދު (ރަޝް) ވިދާޅުވީ، މިއީ ދިވެހި އެތުލީޓުންނަށް ވޯލްޑް ޓުއާގެ ކުރިއަށް ހުރި މުބާރާތްތަކުގައި ބައިވެރިވުމަށް ހުޅުވާލެވޭ ރަނގަޅު ފުރުސަތެއް ކަމަށެވެ. މިކަމުގެ ސަބަބުން އިންޓަނޭޝަނަލް މި ވަރުގެ މުބާރާތަށް އެކި އެކި ސަބަބުތަކާ ހެދި ބައިވެރިނުވެވި ތިބި ދިވެހި ބޮޑީބޯޑަރުންނަށް އިތުރު ހިތްވަރެއް ލިބޭނެ ކަމަށް ރަޝް ފާހަަގަކުރެއްވި އެވެ.
