ކ. ތުލުސްދޫގައި މިހާރު ކުރިއަށްދާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާ އިވެންޓެއް ކަމަށްވާ މޯލްޑިވްސް ޕްރޯ 2026 ގެ ޖޫނިއާ މެންސް ރައިސިން ސީރީސް އިވެންޓްގެ ޗެމްޕިއަންކަން، ގައުމީ ބޮޑީބޯޑިން ޓީމުގެ އިޔަން އަހުމަދު ހޯދައިފި އެވެ.
އޭޝިއާގެ ސަރަަހައްދުގެ އެތުލީޓުންނަށް ހާއްސަކުރި ޖޫނިއާ އިވެންޓުގައި ވާދަކުރީ ހަމައެކަނި ރާއްޖޭގެ ތިން އެތުލީޓުންނެވެ. އެއީ، އިޔަންގެ އިތުރުން، ނޫހު މުހައްމަދު ދުނައިމް އިރުޝާދު އަދި ދާއިން އަބްދުލް ފައްތާހު އެވެ.
ތުލުސްދޫގެ މަޝްހޫރު ސާފް ޕޮއިންޓް، "ކޯކްސް" ރާޅުގަނޑުގައި ކުރިއަށްދިޔަ މިއަދުގެ ފައިނަލް ހީޓުގައި، މިދިޔަ އަހަރުގެ ޖޫނިއާ ލީގުގެ ޗެމްޕިއަންކަން ހޯދި އިޔަން ކާމިޔާބުކުރީ، 0.15 ޕޮއިންޓުގެ ފަރަގަކުންނެވެ. އިޔަންގެ އެންމެ ރަނގަޅު ދެ ރާޅުގެ ސްކޯ، 7.0 އާއި 6.90 އާ އެކު، ޖުމްލަ ޕޮއިންޓުގެ އަދަދަކީ، 13.90 އެވެ. އިޔަންގެ މައްޗަށް މި ފަހަރުގެ ބުރުނު ޝިކާރު ބޮޑީބޯޑިން ޗެލެންޖުގެ ޖޫނިއާ ބައިގެ ޗެމްޕިއަންކަން ހޯދި ނޫހު އަށް ސްކޯކުރެވުނީ، 13.75 ޕޮއިންޓެވެ. ނޫހުގެ އެންމެ ރަނގަޅު ދެ ރާޅުގެ ސްކޯ އަކީ، 6.25 އާއި 7.50 ޕޮއިންޓެވެ.
އައިބީސީ މީޑިއާ އަށް ދިން އިންޓަވިއުއެއްގައި އިޔަން ބުނީ، މޯލްޑިވްސް ޕްރޯގައި މި ލިބުނު ކާމިޔާބަކީ އެންމެ ފުރަތަމަ ބޮޑީބޯޑިން ފެށިއިރު ވެސް އުންމީދުކުރި ކަމެއް ކަމަށެވެ. އަދި، މި މަގާމަށް ވާސިލްވުމަށްޓަކައި، އާއިލާގެ ފަރާތުން ލިބުނު އެހީ އަކީ އެންމެ ބޮޑު ހިތްވަރު ކަމަށް އިޔަން ވަނީ ފާހަގަކޮށްފަ އެވެ.
ދެން، މި އިވެންޓްގައި ވާދަކުރި، ދާއިން އަށް 6.0 ޕޮއިންޓް ޖުމްލަ ލިބުނުއިރު، އޭނާގެ އެންމެ ރަނގަޅު ދެ ރާޅުގެ ސްކޯ އަކީ، 2.75 އާއި 3.25 ޕޮއިންޓެވެ.
އިޔަން އާއި ނޫހު ވަނީ މޯލްޑިވްސް ޕްރޯގެ މެންސް ރައިސިން ސީރީސް އިވެންޓްގައި ވެސް ވާދަކޮށްފަ އެވެ. ނޫހު އެ އިވެންޓުން ކެޓީ ކުއާޓާ ފައިނަލުގައި، ރާއްޖޭގެ އެންމެ ކާމިޔާބު ބޮޑީބޯޑަރު، އަލީ ހުޝްރުވާން މުހައްމަދު (ކުޑަ އައްޔަ)އާ ވާދަކޮށެވެ. އަދި، އިޔަން އަށް އެ އިވެންޓް ނިމުނީ ތިން ވަނަ ބުރުގައި އާމިން އުމަރު މޫސާ އަތުން ބަލިވުމުންނެވެ.
ކުޑަ އައްޔަ އާއި އާމިން ވަނީ، ކުއާޓާ ފަައިނަލުން މޮޅުވެ ސެމީ ފައިނަލުގައި ވާދަކޮށް، މޯލްޑިވްސް ޕްރޯގެ އޯޕަން ކެޓަގަރީއެއްގެ ސެމީން ފުރަތަމަ ފަހަރަށް ޖާގަ ހޯދައިފަ އެވެ.
ރައިސިން ސީރީސްގެ ސެމީ ފައިނަލް ހީޓުތައް މިއަދު ހެނދުނު ކުރިއަށްދިޔައިރު، ސެމީ ފައިނަލްގެ ފުރަތަމަ ހީޓުގައި، ކުޑަ އައްޔަ ނުކުތީ، އެ ޑިވިޝަންގެ ޗެމްޕިއަންކަން ހޯދި ދުނިޔޭގެ ވަރުގަދަ ބޮޑީބޯޑަރެއް ކަމަށްވާ ފްރާންސްގެ ޕިއޭރް ލުއިސް ކޮސްޓެސްއާ ދެކޮޅަށެވެ. ކޮސްޓެސް ކުރިހޯދީ 0.8 ޕޮއިންޓުގެ ފަރަގަކުންނެވެ. އޭނާ އަށް އެންމެ ރަނގަޅު ދެ ރާޅުގެ، 7.00 އާއި 7.40އާ އެކު ޖުމްލަ 14.0 ޕޮއިންޓް ލިބުނެވެ. ކުޑަ އައްޔަ، އެންމެ ފަހު ވަގުތާ ހަަމައަށް ވެސް ހިތްވަރު ދެއްކި އެވެ. ކުޑަ އައްޔަގެ އެންމެ ރަނގަޅު ދެ ރާޅަށް، 8.25 އާއި 5.35 ލިބުނުއިރު، ޖުމްލަ އަކީ، 13.60 ޕޮއިންޓެެވެ.
ސެމީ ފައިނަލްގެ ދެ ވަނަ ހީޓުގައި، އާމިން ވާދަކުރާނީ، އަޝްރަފް ކައިރިން ކުރިހޯދި ކެނަރީ އައިލެންޑްގެ އާރްމީޑޭ ސޮލިވެރެސްއާ އެވެ. އަަރްމީޑޭ ވަނީ 15.50 ޕޮއިންޓް ހޯދައިފަ އެވެ. އެއީ، އެންމެ ރަނގަޅު ދެ ރާޅަށް، 8.0 އާއި 7.50 ޕޮއިންޓެވެ. އާމިން އަށް އެންމެ ރަނގަޅު ދެ ރާޅަށް، 7.0 އާއި 5.50 ލިބުނުއިރު، ޖުމްލަ އަކީ، 12.50 އެވެ. ފައިނަލުގައި ކޮސްޓެސްގެ ޖުމްލަ އަކީ، 18.50 އެވެ. އަދި އަރްމީޑޭ އަށް ލިބުނީ، 14.50 ޕޮއިންޓެވެ.
މިއީ، ރާޅުގަނޑު ނޫން ސަރަަހެއްދެއްގައި މޯލްޑިވްސް ޕްރޯ ކުރިއަށްދިޔަ ފުރަތަމަ ފަހަރެވެ. މީގެ ކުރިން މޯލްޑިވްސް ޕްރޯ، ތިން ފަހަރު ބޭއްވީ ވެސް ރާޅުގަނޑުގަ އެވެ. ތުލުސްދޫގައި މީގެ ކުރިން އޭޝިއާގެ ސާފިން މުބާރާތް ވަނީ ދެ ފަހަރު ހޯސްޓްކޮށްފަ އެވެ.
