ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބާރުގަދަ ބޮމެއް ގޮއްވާލި މައްސަލައިގައި ދައުވާ އުފުލާފައިވާ މީހުންނާ ދެކޮޅަށް ދައުލަތުން ހުށަހަޅާފައިވާ ހެކިންގެ ހެކިބަސް ނެގުން އަންނަ ޖޫން މަހަށް ތާވަލު ކުރަން ނިންމައިފި އެވެ.
މީގެ އަހަރެއްހާ ދުވަސް ކުރިން ނަޝީދު އަވަހާރަކޮށްލަން ސައިކަލެއްގައި ބޮމެއް ހަރުކޮށްލައިގެން ގޮއްވާލި ބޮމުގެ މައްސަލާގައި މިހާރު ޝަރީއަތް ކުރިއަށް ދަނީ، ޓެރަރިޒަމްގެ އެކި ދައުވާ އުފުލިފައިވާ ތަހުމީން އަހުމަދާއި، މުޖާޒް އަހްމަދާއި، އަލީ ހައިޝަމްއާއި، މުހައްމަދު ނާޒިމްއާއި، އިސްހާގައި، ފަހުމީ އަލީގެ ބައެވެ.
މި ހަ މީހުންގެ މައްސަލަ ކްރިމިނަލް ކޯޓުގައި ބައްލަވަނީ ތިން ފަނޑިޔާރުންގެ ބެންޗަކުންނެވެ. ރިޔާސަތުގައި އިންނަވާ ގާޒީ އާދަމް މުހައްމަދުގެ އިތުރުން އެ ބެންޗުގައި ދެން ހިމެނިވަޑައިގަންނަވަނީ ގާޒީ ސޮފްވަތު ހަބީބާއި ގާޒީ މުހައްމަދު މިސްބާހެވެ.
މިއަދުގެ ޝަރީއަތް ފަށަމުން ގާޒީ އާދަމް މުހައްމަދު ވަނީ ކޯޓުން އެ މައްސަލަ ކުރިއަށް ގެންދަން ނިންމާފައިވާ ތާވަލު ހިއްސާ ކުރައްވައިފަ އެވެ. މި ގޮތުން ހެކި ބަސް ނެގުމުގެ އަޑުއެހުންތައް އޮންނާނީ ޖޫން މަހުގެ 9، 12، އަދި 13 ވަނަ ދުވަހުގަ އެވެ.
ތާވަލު ހަމަޖެހިފައިވާ ގޮތް ޝަރީއަތުން އިއުލާނުކުރުމުން، މައްސަލައަށް ތައްޔާރުވުމަށްޓަކައި އިތުރު ފުރުސަތު ބޭނުންވާކަމަށް ދިފާއީ ވަކީލުން ވިދާޅުވި އެވެ. އެހެންނަމަވެސް ކޯޓުން ނިންމެވީ މައްސަލަ ދިރާސާ ކުރުމަށް އެކަށީގެންވާ ފުރުސަތު ދީފައިވާކަމަށާއި، އެހެންކަމުން ތާވަލުކުރެވިފައިވާގޮތަށް މެއި މަހުގެ 30 ވަނަ ދުވަހު ހެނދުނު 10:00 އަކަށް އަޑުއެހުން ބޭއްވުމަށެވެ. އަދި ޝަރީއަތުގެ ކުރިން ހުށަހަޅާ ހުށަހެޅުމެއް އޮތްނަމަ 10 ދުވަހުގެ ތެރޭގައި ހުށަހެޅުމަށް ކޯޓުން އެންގެވި އެވެ.
ދައުލަތުގެ ހެކިިތައް ސިއްރުކުރުމުގެ އަމުރެއް ނެރެދިން
ދައުލަތުގެ ފަރާތުން ހުށަހެޅި ހެކިތަކުގެ ތެރެއިން 22 ހެއްކެއް މުޅިން ސިއްރުކޮށްދޭން އަދި ދިފާއުން ކޯޓަށް ހާޒިރުވެގެން ދިރާސާކުރަން ފުރުސަތު ދެވޭ ގޮތަށް ހަ ހައްކެއް ސިއްރުކޮށްދޭން އެދުނެވެ.
ދިފާއުގައި އަލީ ހައިޝަމްގެ ވަކީލު ވިދާޅުވީ ކޮންމެ ހެއްކެއް ވެސް ސިއްރު ކުރަން ދައުލަތުން އެދުނު ސަބަބުތަކާ ހާލަތް އެއް ގޮތް ކަމެވެ. އެކަމަކު ސިއްރުކުރަން އެކި ހެކި އެދިފައިވަނީ އެކި މިންވަރަށެވެ.
ނާޒިމްގެ ވަކީލު ހަމްޒާ ލަތީފް ވެސް އެ ކަންބޮޑުވުން ފާޅުކުރައްވާފައި ވިދާޅުވީ ކޯޓަށް ހާޒިރުކޮށްގެން ހެކި ބެލެވޭ ގޮތް ހެދުމުން ލިޔުމަށް ނަކަލު ކުރާއިރު ވެސް ނަތީޖާއަކީ މުޅި ހެކި ލިބުން ކަމަށެވެ. އެހެންވެ އެ ގޮތަށް ދޫކުރެވޭ ހެކިތަކުގެ ކޮޕީއެއް ދެވޭ ގޮތަށް ހަމަޖައްސަން އޭނާ އެދިވަޑައިގަތެވެ.
ފަހުމީގެ ގާނޫނީ ވަކީލު ބަދަލުވިއިރު، އާ ވަކީލު މުހައްމަދު ޝިފާޒް ވިދާޅުވީ އޭނާއަށް ދައުލަތުން އަމުރަށް އެދި ހުށަހަޅާފައިވާ ފޯމާއި ލިޔެކިއުންތައް ވެސް ލިބުނީ މިއަދު ކަމުން އެ ލިޔެކިއުންތައް ދިރާސާ ކުރަން އިތުރު ފުރުސަތެއް އޭނާއަށް ދެއްވުމަށެވެ.
ދެ ފަރާތުން ދެއްކި ވާހަކަތަކަށް ރިއާޔަތްކޮށް، ގާޒީން ނިންމެވީ ދައުލަތުން އެދިފައިވާ މިންވަރަށް ހެކި ރައްކާތެރި ކުރުމުގެ އަމުރު ނެރެދިނުމަށެވެ. އަދި ވަކީލު ބަދަލުވާ ކޮންމެ ފަހަރަކު ފުރުސަތުތައް ދޭނަމަ، މައްސަލަ ދިގުލައިދާތީ ފަހުމީގެ ވަކީލު އެދުނު ފުރުސަތު ނުދޭން ވެސް ނިންމި އެވެ.
މައްސަލައިގެ ފަސްފަހަތް
ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ. މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށްފަހު އަދުހަމް ފިލުވަން މަސައްކަތް ކުރިކަމަށް ތުހުމަތުކޮށެވެ. އަދި ތަހުމީނުގެ މައްޗަށް ގޮވާތަކެތި އެހެން ތަނަކަށް ގެންދިއުމަށް އެހީތެރިވެދިން ކަމެވެ.
ޓެރެރިޒަމްގެ ދައުވާ އުފުލާފައިވާ އެ އެންމެންވެސް ވަނީ ހާއްސަ ގާނޫނުގެ ދަށުން ޝަރީއަތް ނިމެންދެން ބަންދު ކޮށްފަ އެވެ.
އަތަމާ ޕެލަސް އިމާރާތުގެ އެތެރޭގަ ހުރެ ރިމޯޓެއް ބޭނުންކޮށްގެން ބޮން ގޮއްވާލި މައްސަލާގައި ނުވަ މީހަކަށް ދައުވާ އުފުލާފައި ވާއިރު މިހާތަނަށް ހުކުމަކާ ހަމައަށް ވާސިލްވެފައި ވަނީ އެންމެ މީހަކަށް ކުރި ދައުވާތަކުގަ އެވެ. އެއީ, ރިމޯޓް ބޭނުން ކޮށްގެން ބޮން ގޮއްވާލި އަދުހަމްގެ މައްޗަށެވެ. އޭނާގެ މައްސަލަ އަވަސް ނިޔާއެއްގެ ގޮތުގައި ގެންގޮސް, ހުކުމް އަވަހަށް އިއްވީ ކުށަށް އިއުތިރާފުވުމުންނެވެ.
މިދިޔަ އަހަރުގެ މެއި މަހުގެ ހަވަނަ ދުވަހުގެ ރޭ ހިންގި ޓެރަރިޒަމް އަމަލާ ގުޅިގެން ހައްޔަރު ކުރި މީހުންގެ ތެރެއިން މުހައްމަދު ތަސްލީމާއި، އަލި މަނިކުގެ މައްޗަށް އުފުލީ ޓެރަރިޒަމް ޖަމާއަތަކަށް ތާއީދު ކުރުމުގެ ދައުވާ އެވެ. ހަމަލާއާ ގުޅޭ އެއްވެސް ދައުވާއެއް އަދި އުފުލާފައި ނެތް އިރު، ދައުލަތުން ބުނަނީ ހެކި ލިބުނު މިންވަރަކުން އެ މީހުންގެ މައްޗަށް ވެސް އަދި ދައުވާ ކުރެވެން ފުރުސަތު އެބަ އޮތް ކަމަށެވެ.
އެ މައްސަލާގައި ޕްރޮސެކިއުޓާ ޖެނެރަލް އޮފީހުން ދައުވާ ނުކުރަން ނިންމީ އަހުމަދު ފާތިހުގެ މައްޗަށެވެ. އެއީ އޭނާގެ މައްޗަށް ކުށް ސާބިތުކުރެވޭ ވަރަށް ހެކި ނެތުމުން ކަމަށް އެ އޮފީހުން ބުނެ އެވެ.
މިއީ ރާއްޖޭގައި މިހާތަނަށް ގޮއްވާލި އެންމެ ބާރުގަދަ އައިއީޑީ ކަމަށް ރަސްމީ އިދާރާތަކުން ބުނާއިރު، މި ބޮން ހަދާފައި ވަނީ ބާޒާރުން އާންމުކޮށް ލިބެން ހުރި ބާވަތްތައް ބޭނުންކޮށްގެންނެވެ. އޭގެއިން ދޭ ގެއްލުން ބޮޑުކުރަން އަޅާފައި ހުރީ ރޭޒާ ފުއްތަކެކެވެ.
