އުރީދޫ ދިވެހި ޕްރިމިއާ ލީގުގައި މިރޭ ދަ ގްރާންޑޭ ސްޕޯޓްސް ކްލަބް 3-1 އިން ބަލިކޮށް ސުޕަ ޔުނައިޓެޑް ސްޕޯޓްސް (ސަސް) ލީގު ތާވަލުގެ ފަސް ވަނަ އަށް ޖެހިލައިފި އެވެ.
ސަސް އިން މި ފަހަރު ލީގުގައި ހޯދި ތިން ވަނަ މޮޅާ އެކު ފަސް ވަނަ އަށް ޖެހިލީ ނުވަ މެޗުން 11 ޕޮއިންޓް ހަަަމަކޮށްގެންނެވެ. އެއީ ހަތަރު ވަނައިގައި އޮތް ޓީސީ ސްޕޯޓްސް ކްލަބާ ޕޮއިންޓުގެ ގޮތުން އެއްވަރުކޮށްގެންނެވެ. ކުރިން ފަސް ވަނައިގައި އޮތް ޔުނައިޓެޑް ވިކްޓްރީ (ޔޫވީ) ހަ ވަނައިގައި މިހާރު އޮތީ އަށް މެޗުން 10 ޕޮއިންޓާ އެކު އެވެ.
މާދަމާރޭ ޔުނައިޓެޑް ވިކްޓްރީން ކްލަބް ގްރީން ސްޓްރީޓްސްއާ ކުޅޭނެ އެވެ. މެޗު ފަށާނީ 10 ޖަހާއިރު އެވެ.
ދަ ގްރާންޑޭ އިން ލީގުގެ ފުލުގައި އޮތީ ނުވަ މެޗުން އެއް ޕޮއިންޓް ހޯދައިގެންނެވެ. ސީޒަނުގައި މިހާތަނަށް ދަ ގްރާންޑޭ އިން ޕްރެޒިޑެންޓްސް ކަޕާއި ލީގުގައި ޖުމްލަ އެއްކޮށް ކުޅުނު 16 މެޗުން ވެސް އަދި މޮޅެއް ނުލިބެ އެވެ. ދެ މެޗުން އެއްވަރުވިއިރު، 14 މެޗުން ވަނީ ބަލިވެފަ އެވެ.
މިރޭގެ މެޗަށް ދެ ޓީމުގެ ފުރަތަމަ އެގާރަ އަށް ބަލާއިރު، އެންމެ ފާހަގަކޮށްލެވެނީ ސަސްގެ ޓީމުގައި އަޔާޒް އަހުމަދު (އަޔާ) ހިމަނާފައިވުމެވެ. އަޔާ އަކީ ދަ ގްރާންޑޭ ދޫކޮށް މި ފަހަރު ސަސްއާ ގުޅުނު ކުޅުންތެެރިއެކެވެ. މެޗުގެ ހަތް ވަނަ މިނިޓްގައި މެޗުގެ ފުރަތަމަ ހަމަލާ ފޮނުވާލީ ވެސް އަޔާ އެވެ. ހިލޭ ޖެހުމަކުން އަޔާ ފޮނުވާލި ބޯޅަ ދަ ގްރާންޑޭގެ ކީޕަރު ހަސަން މުއާޒް ވަނީ މަތަކޮށްފަ އެވެ.
ދަ ގްރާންޑޭގެ ނައުފަލް (ވ) ކައިރިން ސަސްގެ އަޔާ ބޯޅަ ހިފައިގެންދަނީ.--- ފޮޓޯ: އެފްއޭއެމް
މެޗުގެ 12 ވަނަ މިނިޓްގައި ދަ ގްރާންޑޭގެ ފުރަތަމަ ހަމަލާ ފެނުނެވެ. އެ ޓީމުގެ އިސްމާއިލް ނަޒީހު އޭރިއާބޭރުން ޖެހި ބޯޅައިގައި ބާރެއްނެތްއިރު، ސަސްގެ ކީޕަރު މުހައްމަދު ޝަފީއު (ޗެކް) ވަނީ ފަސޭހައިން ބޯޅަ އަތަށް ނަގައިފަ އެވެ. އޭގެ މިނިޓެއް ފަހުން ދަ ގްރާންޑޭގެ އޭރިއާތެރެއިން ސަސްގެ އިބްރާހިމް އަތީގް ހަސަން (އިއްބެ) ޖެހި ބޯޅަ ދިޔައީ ހުރަސްދަނޑިމަތިންނެވެ.
ފުލުފުލުގައި ސަސް އިން އެޓޭކް ކުރަމުން ދިޔައިރު، މެޗުގެ 37 ވަނަ މިނިޓްގައި އެ ޓީމުގެ އަޔާ އަށް ރަނގަޅު ފުރުސަތެއް ލިބުނެވެ. އެކަމަކު، އޭރިއާތެރެއިން ލިބުނު ބޯޅަ އަޔާ އަށް ރަނގަޅަށް ކޮންޓްރޯލް ނުކުރެވި ފުރުސަތު ގެއްލުނީ އެވެ. އޭގެ ދެ މިނިޓް ފަހުން ސަސް އިން ލީޑުނެގި އެވެ. މެޗުގެ 39 ވަނަ މިނިޓްގައި ސަސްގެ މުހައްމަދު އައްޒާމް ނެގި ހުރަހަކުން އިއްބެ ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެވެ.
ސަސް އަށް ލީޑުފުޅާކޮށްދޭން މެޗުގެ 41 ވަނަ މިނިޓްގައި ކޯނަރަކުން ހުރަސްވި ބޯޅައަކުން އެ ޓީމުގެ އަހުމަދު އައިހަމް މޫސާ ބޮލުުން ޖެހި ބޯޅަ ކީޕަރު މުއާޒް އަތުގައި ޖެހިފައި، ހުރަސް ދަނޑީގައި ޖެހިފައި ބޯޅަ ދިޔައީ ބޭރަށެވެ.
ދެ ވަނަ ހާފްގެ ކުޅުން ފަށައިގެން ތިން ވަނަ މިނިޓްގައި ދަ ގްރާންޑޭގެ ކެޕްޓަން ގާސިމް ސައްމާމު (ސަންމެ) ވަނީ ނުރައްކާތެރި ހަމަލާއެއް ފޮނުވާލައިފަ އެވެ. ހާފުގެ މެދަކާ ހަަމައިން ސަންމެ ޖެހި ބޯޅަ ދިޔައީ ކީޕަރު ޝަފީއު ބޯމަތިން އޮއްސިގެން ގޯލުގެ މަތި ކަނާ ދިމާލު ބޭރުންނެވެ.
ސަސްގެ ސަހާއު (ކ) ދަ ގްރާންޑޭގެ އަހުމަދު އަބްދުލް ސައްތާރު ކައިރިން ބޯޅަ ހިފައިގެންދަނީ.--- ފޮޓޯ: އެފްއޭއެމް
ސަސް އިން ލީޑުފުޅާކުރީ މެޗުގެ 60 ވަނަ މިނިޓްގައި ޔަސްފާދު ހަބީބު (މުލަކޭ) ޖެހި ގޯލުންނެވެ. އައްޒާމް ދިން ބޯޅައަކުން އޭރިއާ ރޮނގުކައިރިން މުލަކޭ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ. ބަދަލުތަކެއް ގެނެސްގެން، ދަ ގްރާންޑޭ އިން ގޯލެއް ޖެހޭތޯ ކުރި މަަސައްކަތް މެޗުގެ 70 ވަނަ މިނިޓްގައި ކާމިޔާބުކުރި އެވެ. ބަދަލަކަށް ކުޅެން އެރި ނަޖާހު އަބްދުލް ރަހީމް ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
އަލުން ދެ ގޯލުގެ ލީޑެއް ނަގަން ސަސް އިން ކުރި މަސައްކަތުގައި މެޗުގެ 78 ވަނަ މިނިޓްގައި މުލަކޭ ޖެހި ބޯޅަ ދަ ގްރާންޑޭގެ ކުޅުންތެރިއަކު ފައިގައި ޖެހިފައި އަމާޒުވީ ގޯލުގެ ދަނޑިއަށެވެ. ދަ ގްރާންޑޭ އިން އެއްވަރުކުރަން ކުރިއަށް ޖެހިގެން ކުޅެމުން ދަނިކޮށް މެޗުގެ 88 ވަނަ މިނިޓްގައި ސަސް އިން ވަނީ ކައުންޓަ އެޓޭކުގައި ތިން ވަނަ ގޯލެއް ޖަހައިފަ އެވެ. ބަދަލަކަށް ކުޅެން އެރި ސަސްގެ އަލީ ނަސޫހު ރަޝީދު (ޕިލާ) ހުސްކޮށްލާފައި ގޯލު ކުރިމައްޗަށް ނެގި ބޯޅަ ސަސްގެ މުަހއްމަދު ސަހާއު (ބޭލް) ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
