އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕުގެ ފައިނަލުގައި މިރޭ ޓީސީ ސްޕޯޓްސް ކުލަބާ ދެކޮޅަށް ސުޕަ ޔުނައިޓެޑް ސްޕޯޓްސް (ސަސް) އިން ނުކުންނައިރު, އެ ޓީމުން ތައްޔާރުވާނީ ޓީސީގެ ޓެކްޓިކަލް ގޭމަށް ވިސްނައިގެން ކަމަށް ސަސްގެ ކޯޗު އާފިއު މުހައްމަދު ބުނެފި އެވެ.
މި މުބާރާތުގެ ގްރޫޕް ސްޓޭޖުގައި ވެސް މި ދެ ޓީމު ބައްދަލުކޮށްފައިވާއިރު, އެ މެޗު ނިމުނީ 1-1 ގެ ނަތީޖާ އަކުން އެއްވަރުވެގެންނެވެ.
ފައިނަލް މެޗުގެ ކުރިން ގައުމީ ފުޓުބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން، "އަދަދު" އިން ކުރި ސުވާލަކަށް، ސަސްގެ ކޯޗު އާފިއު ބުނީ މި މެޗަށް ނުކުންނައިރު, މި ދެ ޓީމަކީ ދާދި ހަމަހަމަ ދެ ޓީމު ކަމަށެވެ. އެކަމަކު, ފިޒިކަލް ގޭމަކަށް ބަލަންޏާ ސަސް އަށްވުރެ އެޑުވާންޓޭޖު ބޮޑީ, ޓީސީ އަށް ކަމަށް އާފިއު ވަނީ ފާހަގަކޮށްފަ އެވެ.
"ދެ ޓީމަށް ބަލަންޏާ އެ މީހުންނަށް އެބަހުރި ކަންނޭނގެ އެޑުވާންޓޭޖުތަކެއް. އެއީ އެ މީހުންގެ ހަށިގަނޑަށް ބެލިކަމުގައި ވިޔަސް ސަސް އަށް ވުރެ އެޑުވާންޓޭޖު ބޮޑު ކޮށް މި ފެންނަނީ. އެކަމަކު މި ދެ ޓީމަކީ ހަމަހަމަ ދެ ޓީމު." އާފިއު ބުންޏެވެ.
ގްރޫޕް ސްޓޭޖުގައި މި ދެ ޓީމު ބައްދަލުކުރި މެޗަކީ މުޅިން ތަފާތު މެޗެއް ކަމަށް އާފިއު ވަނީ ބުނެފަ އެވެ.
އޭނާ ބުނީ އެ މެޗާ ފައިނަލް މެޗާ ހާސްބައި ތަފާތު ވާނެ ކަމަށެވެ. ފައިނަލް މެޗަށް ނުކުންނަން ޖެހޭނީ ފައިނަލަށް ތައްޔާރުވާ ގޮތަށް ތައްޔާރުވެގެން ކަމަށް އާފިއު ގަބޫލުކުރެ އެވެ.
"ގްރޫޕް ސްޓޭޖު މެޗާ މި މެޗާ ތަފާތު ވާނެ. މިއީ ފައިނަލެއް. ސަސް އިން ނުކުންނާނީ ޓީސީގެ ޓެކްޓިކަލް ގޭމަށް ވިސްނައިގެން." އާފިއު ބުންޏެވެ.
ސަސް އިން މި ފަހަރުގެ ޔޫތު ޗެމްޕިއަންޝިޕަށް ޓީމެއް އެކުލަވާލުމަށް ފަހު، މުބާރާތަށް ޓީމުގެ މަސައްކަތް ހަވާލުކުރީ އާފިއުއާ އެވެ. އާފިއު ބުނީ، އިތުރު ކުޅުންތެރިންތަކެއް ޓީމަށް ގެނެސްގެން މިހާތަނަށް ކުރެވުނު މަސައްކަތާ މެދު ހިތްހަމަޖެހޭ ކަމަށާއި ފައިނަލުގައި ވެސް ކާމިޔާބު ހޯދަން ބޭނުންވާ ކަމަށެެވެ.
ޔޫތު ޗެމްޕިއަންޝިޕް ފައިނަލުގައި ސަސް އިން ޓީސީއާ ދެކޮޅަށް ކުޅޭ މެޗު ފަށާނީ މިރޭ 21:00 ގަ އެވެ.
