މިހާރު ކުރިއަށްދާ އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ ފުރަތަމަ ސެމީ ފައިނަލުގައި އެންމެ ފަހުގެ ޗެމްޕިއަން، ކްލަބް އީގަލްސް 3-1 އިން ބަލިކޮށް ސުޕަ ޔުނައިޓެޑް ސްޕޯޓްސް (ސަސް) އިން ފައިނަލުގެ ފުރަތަމަ ޖާގަ ހޯދައިފި އެވެ.
ނަވާރަ އަހަރުން ދަށަށް އެންމެ ފަހުން ޔޫތު ޗެމްޕިއަންޝިޕެއް 2022 ވަނަ އަހަރު ބޭއްވިއިރު، ފައިނަލުގައި ސަސް ބަލިކޮށް ތަށި އުފުލާލީ އީގަލްސް އިންނެވެ. އަންނަ އާދިއްތަ ދުވަހު ކުޅޭ ފައިނަލުގައި، ސަސްއާ ދެކޮޅަށް ކުޅޭ ޓީމެއް އެނގޭނީ މިރޭ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބް ބައްދަލުކުރާ މެޗުންނެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފެށުމުގެ ކުރިން ވަނީ މީގެ އެއް ދުވަސް ކުރިން މަރުވި، ގައުމީ ފުޓްބޯޅަ ޓީމުގެ ކުރީގެ ވައިސް ކެޕްޓަން، މުހައްމަދު އާރިފް (ބަކާ)ގެ ހަނދާނުގައި ސުކޫތެއް ގެެނެސްފަ އެވެ. މެޗު ޝަަރަފްވެރިކޮށްދިނީ، ބަކާއާ އެކު ގައުމީ ޓީމަށް ކުޅުނު ރާއްޖޭގެ އެއް ވަނަ ގޯލްކީޕަރު، އިމްރާން މުހައްމަދު އެވެ.
ސަސް އިން ވަނީ ފުރަތަމަ ހާފު ނިމެން ކައިރިވެފައިވަނިކޮށް ލީޑުނަގައިފަ އެވެ. މި ގޯލު ޖެހީ މެޗުގެ 43 ވަަނަ މިނިޓްގައި މުހައްމަދު އިޒާން އަލީ އެވެ. ސަސްގެ ކޯނަރެއްގައި އޭރިއާބޭރަށް އައި ބޯޅައެއް އެ ޓީމުގެ މުހައްމަދު ހޫދު އަހުމަދު ފޮނުވާލިއިރު، އީގަލްސްގެ ކީޕަރު، ލޫތު އިސްމާއިލް ޖަމީލް އަތުގައި ޖެހިފައި ރީބައުންސް ލިބުނު ވަގުތުގައި އިޒާން ވަނީ ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި އީގަލްސްގެ ކުޅުންތެރިއަކު އޭރިއާތެރެއިން ބޯޅައިގައި އަތްލުމުން، ރެފްރީ ވަނީ ޕެނަލްޓީއެއް ދީފަ އެވެ. ސަސްގެ ހޫދު ފޮނުވާލި ޕެނަލްޓީ ދިޔައީ ހުރަސްދަނޑިމަތިންނެވެ.
އީގަލްސްގެ ދެ ކުޅުންތެރިން ކައިރިން ސަސްގެ އިޒާން ބޯޅަ ހިފައިގެންދަނީ.--- ފޮޓޯ: ނައުޝަމް ވަހީދު/ އަދަދު
މެޗުގެ 78 ވަނަ މިނިޓްގައި އީގަލްސް އިން އެއްވަރުކުރީ މުހައްމަދު އައިމަން ޖެހި ގޯލުންނެވެ. މިއީ ހާފުގެ މެދެެއްހާ ހިސާބުން އީގަލްސްގެ އަހުމަދު އަފްލާޒް އޭރިއާތެރެއަށް މަތިން ފޮނުވާލި ބޯޅައަކަށް އަރަައި، އެއް ފަަހަރުން ގޯލުގެ ތެރެއަށް ބޯޅަ ފޮނުވާލައިގެން އައިމަން ޖެހި ލަނޑެކެވެ.
އީގަލްސް އިން ނަތީޖާ ހަމަހަމަކުރިތާ ހަތަރު މިނިޓް ފަހުން ސަސް އިން އަނެއްކާ ވެސް ލީޑުނެގި އެވެ. މިއީ، މެޗުގެ 82 ވަނަ މިނިޓްގައި ހިލޭޖެހުމަކުން ސަސްގެ އަހުމަދު ނަވާފް ފައުޒީ ޖެހި ބޯޅައެއް އީގަލްސްގެ ކީޕަރު ލޫތު އަތުގައި ޖެހިފައި ވެއްޓުނު ވަގުތު، ހަސަން ހައިޝަމް އަހުމަދު ޖެހި ލަނޑެކެވެ.
ނަތީޖާ ހަމަހަަމަ ކުރަން އީގަލްސް އިން ފޮނުވާލި ހަމަލާ ސަސްގެ ކީޕަރު، އަބްދުﷲ ރަޒީފް ވަނީ މަތަކޮށްފަ އެވެ.
ސަސް އަށް ފައިނަލުގެ ޖާގަ ޔަގީންކޮށްދިން ލަނޑު ޖެހީ މެޗުގެ މޮޅު ކުޅުންތެރިޔާ އިޒާން އެވެ. އިތުރު ވަގުތުގެ ނުވަ ވަނަ މިނިޓްގައި އިޒާން މި ލަނޑު ޖެހީ އީގަލްސްގެ ޑިފެންޑަރުން ހެދި ގޯހެއްގެ ފައިދާނަގައި، އޭރިއާތެރެއިން ލިބުނު ބޯޅައެއް ގޯލުގެ މަތީ ކަނަށް ފޮނުވާލައިގެންނެވެ.
