މެލޭޝިއާގައި ކުރިއަށްދިޔަ، ލަލީގާ ޔޫތު މުބާރާތުގެ 16 އަހަރުން ދަށުގެ އުމުރުފުރާގެ މުބާރާތުން ތިން ވަނަ ހޯދި ސުޕަ ޔުނައިޓެޑް ސްޕޯޓްސް (ސަސް) ކާމިޔާބަށް ފަހު ރޭ އެނބުރި ރާއްޖެ އަތުވެއްޖެ އެވެ.
އޭޝިއާގެ އެކި ގައުމުތަކުގެ ޔޫތު ޓީމުތައް ވާދަކުރި މި މުބާރާތުގެ، 16 އަަހަރުން ދަށުގެ ކެޓަގަރީގެ ސެމީ ފައިނަލަށް ސަސް ދިޔަ އެެވެ. ސެމީގައި ސަސް ބަލިވީ، ތައިލެންޑްގެ ޝިއަންމާއިގެ 16 އަހަރުން ދަށުގެ ޓީމު އަތުން 2-1 އިންނެވެ.
ސަސް އިން ވަނީ ތިން ހޮވަން ކުޅުނު މެޗުގައި މެލޭޝިއާގެ ޕެންގެރާން ފުޓްބޯލް ކްލަބްގެ 16 އަހަރުން ދަށުގެ ޓީމު އަތުން 1-0 އިން މޮޅުވެފަ އެވެ. ޕެންގެރާން އަކީ ލަލީގާ ޔޫތު މުބާރާތުގައި މި ފަހަރު ރާއްޖޭން ވާދަކުރި ދެ ވަނަ ޓީމު، އާ ޖީލަކަށް އަތުން ކުއާޓާ ފައިނަލުގައި މޮޅުވި ޓީމެވެ.
މުބާރާތުގައި ސަސް އިން ހޯދި ކާމިޔާބަށް ފަހު، ރޭ އެނބުރި މާލެ އައިއިރު، އެ ޓީމަށް ވެލާނާ އިންޓަނޭޝަނަލް އެއާޕޯޓުން މަރުހަބާ ކިޔުމުގައި، ޓީމުގެ ކުޅުންތެރިންނާއި އޮފިޝަލުންގެ އާއިލާތަކުގެ އިތުރުން، ސަސް އެކެޑަމީ ކުދިން ބައިވެރިވި އެވެ.
މެލޭޝިއާގައި ލަލީގާ ޔޫތު މުބާރާތް ކުރިއަށްދިޔައީ، އަށް އަހަރުން ފެށިގެން 21 އަހަރުން ދަށުގެ އުމުރުފުރާ އަށް ކޮންމެ އުމުރުފުރަ އަކަށް ވަކިވަކިންނެވެ. މި މުބާރާތުގައި ރާއްޖޭގެ ދެ ޓީމު ވެސް ވާދަކޮށްފައިވަނީ، 16 އަހަރުން ދަށުގެ ބައިގަ އެވެ.
ސަސް ޓީމު ލީޑުކުރުމުގައި ހަރަކާތްތެރިވީ، ފަރީދު މުހައްމަދު (ފަރިއްޓެ) އެވެ. އަދި އާ ޖީލަކަށް ޓީމުގައި ހެޑް ކޯޗެއްގެ ގޮތުގައި މަސައްކަތްކުރީ، އިސްމާއިލް އާސިފް (ކުޑަހީނާ) އެވެ.
