ޕެރިސް (އޭޕްރީލް 9) - މިދިޔަ ހަފްތާގެ ހޮނިހިރު ދުވަހު ކުޅުނު ފްރެންޗް ލީގުގެ މެޗަށް ފަހު ލިލް ކޯޗު ޖޯސްލޭން ގޮރްވެނެކަށް ހަމަލާދީ މާރާމާރީ ހިންގަން އުޅުނު ކަމަށް ބުނެ، އެ ޓީމުގެ ތަރި ހަތެމް ބެން އާފާ ޓީމުން ބޭރުކުރުމުގެ މަސައްކަތް ކުރަމުން އަންނަ ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
މިދިޔަ އަހަރު ފްރާންސްގެ ބޯޑޯ ދޫކޮށް ޓީމަކާ ނުގުޅި ހުރި ބެން އާފާ، ލިލް އަށް ސޮއިކުރީ މިދިޔަ ޖެނުއަރީ މަހު އެވެ. ފްރެންޗް ލީގުގައި މިދިޔަ ހަފްތާގައި ބޯޑޯއާ ލަނޑެއް ނުޖެހި ލިލް އެއްވަރުވި މެޗަށް ފަހު ޗޭންޖިން ރޫމުގައި ބެން އާފާ ވަނީ އެ ޓީމަށް ކުޅޭ ޕޯޗުގީސް ކުޅުންތެރިޔާ، ޓިއާގޯ ޖާލޯ އަށް ތަކުރާރުކޮށް ފުރައްސާރަކޮށްފަ އެވެ. އެކަން ހުއްޓުވަން، ލިލް ކޯޗު ގޮރްވެނެކް، މަސައްކަތް ކުރި ވަގުތު ބެން އާފާ ވަނީ ގޮރްވެނެކާ ކުރިމަތިލައި ޓީމުގެ ކޯޗިން ސްޓާފުންނާ މާރާމާރީ ހިންގަން މަސައްކަތްކޮށްފަ އެވެ.
ގޮރްވެނެކް، މީޑިއާ އަށް ބުނީ ބެން އާފާގެ މައްސަލަ ކްލަބުން ބަލަމުން އަންނަ ކަމަށާއި ޓީމުގައި ބަހައްޓާނެތޯ ގޮތެއް ނިންމާނީ މެނޭޖްމަންޓުން ކަމަށެވެ. ފްރާންސްގެ މީޑިއާ ރިޕޯޓްތައް ބުނާގޮތުން ކުރިއަށް އޮތް ދެ ދުވަހެއްގެ ތެރޭގައި ލިލް އިން ބެން އާފާގެ ކޮންޓްރެކްޓް އެއްކޮށް އުވާލާނެ އެވެ.
"ކްލަބުން އަންނަނީ އެ މައްސަލަ ބަލަމުން. އެ ކުޅުންތެރިޔާ މިހާރު ޓީމުގެ ޓްރެއިނިންގައި ބައިވެރިއެއް ނުވޭ. ކްލަބްގެ ވެރިން އަންނަނީ މި މައްސަލައިގައި ހަރަކާތްތެރިވަމުން، މީޑިއާ އަށް އަންގަންޖެހޭ މައުލޫމާތު ބަޔާނެއްގެ ޒަރިއްޔާއިން ކްލަބުން ފޯރުކޮށްދޭނެ. އެ އަށް ފަހު ދެން، ގާނޫނީ ގޮތުން މި ކްލަބުން ކުރަން ޖެހޭ ކަންކަން ކުރިއަށްދާނެ،" ބެން އާފާގެ މައްސަލައާ ބެހޭ ގޮތުން ނޫސްވެރިއަކު ކުރި ސުވާލަކަށް ގޮރްވެނެކް ބުންޏެވެ.
ލިލް އަކީ އުމުރުން 35 އަހަރުގެ ބެން އާފާ މިދިޔަ 15 އަހަރުގެ ތެރޭގައި ކުޅޭ 10 ވަަނަ ކްލަބެވެ. ލިލްގައި މާ ގިނަ ދުވަހެއް ނުވެ ބެން އާފާ އެ ޓީމުން ބޭރުކޮށްލަން އުޅޭ ވާހަކަ ދެކެވެމުން އަންނަނިކޮށް އޭނާ ވަނީ ސޯޝަލް މީޑިއާގައި އަމިއްލަ ދިފާއުގައި ވާހަކަ ދައްކައިފަ އެވެ.
އިންސްޓަގްރާމްގައި ބެން އާފާ ލިޔެފައިވާގޮތުގައި އޭނާ ހިތްހަމަނުޖެހެނީ ލިލްގެ ވެރިން ވާހަކަ އޮޅުވާލައިގެން ދައްކާތީ ކަމަށެވެ. އަދި ބޯޑޯ މެޗަށް ފަހު އޭނާ ހިތްހަމަނުޖެހުނީ ރެލިގޭޝަނުން ސަލާމަތްވާން އުޅޭ ޓީމެއް ގޮތަށް ލިލް ކުޅޭތީ ކަމަށެވެ. އަދި ކުޅުން ބަދަލުކުރަން ތަކުރާރުކޮށް ބޭނުންވެގެން އެދެމުން އަންނައިރު، ކޯޗު ގޮރްވެނެކް ހުންނަނީ އެކަން ކުރަން ބިރުން ކަމަށް ބެން އާފާ ވަނީ ބުނެފަ އެވެ.
ފްރާންސްގެ ލިޔޯން، މާސޭ، ޕީއެސްޖީ، ލިލް، ރެެނެސް، ނީސް އަދި ބޯޑޯ އަށް ކުޅުނު ހަމައެކަނި ކުޅުންތެރިޔާ ބެން އާފާ ވަނީ ފްރާންސް އުމުރުފުރާ ގައުމީ ޓީމާއި ސީނިއާ ގައުމީ ޓީމަށް ވެސް ކުޅެފަ އެވެ.
އިނގިރޭސި ޕްރިމިއާ ލީގުގެ ނިއުކާސަލް ޔުނައިޓެޑާއި ހަލް ސިޓީ އަދި ސްޕެއިންގެ ރެއާލް ވަލޮޑޮލިޑުން ވެސް ފެނުނު ބެން އާފާ އަކީ އާދަޔާހިލާފު ހުނަރުވެރި މޮޅު ކުޅުންތެރިއެކެެވެ. އެކަމަކު، ކެރިއަރުގައި ބޭނުންވާ މިސްރާބަށް ނުދެވުނީ ތަކުރާރުކޮށް އަހުލާގީ މައްސަލަތައް ދިމާވާތީ އެވެ.
