ލަންޑަން (އޭޕްރީލް 6) - ޗެމްޕިއަންސް ލީގުގެ ދެ ވަނަ ބުރުގެ ދެ ވަނަ ލެގުގައި ޕީއެސްޖީ ބަލިކޮށް، ރެއާލް މެޑްރިޑް މުބާރާތުގެ ކުއާޓާ ފައިނަލުން ޖާގަ ހޯދުމާ އެކު، ރެއާލްގެ ކޯޗު ކާލޯ އަންޗެލޮޓީ އަށް ދިޔައީ ތައުރީފް އޮހެމުންނެވެ. އެހެން ނަަމަވެސް، ކުއާޓާ ފައިނަލްގެ ފުރަތަމަ ލެގަށް ކުރިމަތިލާއިރު، މަންޒަރު އޮތީ ވަަރަށް ބޮޑަށް ބަދަލުވެފަ އެވެ. ހާއްސަކޮށް، ލީގުގައި ބާސެލޯނާ އަތުން އަމިއްލަ ދަނޑުގައި ރެއާލް ބަލިވުމާ އެކު، އަންޗެލޮޓީ ވަނީ ހޫނު ފެނަށް ވެއްޓިފަ އެވެ. ޗެމްޕިއަންސް ލީގުގައި ކުރިއަށް ދިއުމަކީ، ކޯޗުގެ މަގާމުގައި ދެމިހުރުމަށް އަންޗެލޮޓީ އަށް މުހިންމު ކަމެކެވެ.
ސްޕެނިޝް ލީގުގައި ހޮނިހިރު ދުވަހު ސެލްޓަ ވީގޯ އަތުން މޮޅުވެ، ރެއާލް އިން ވަނީ ތާވަލްގެ އެއް ވަނައިގައި ލީޑު ދަމަހައްޓައިފަ އެވެ. އެކަމަކު، އަންޗެލޮޓީ އަށް ފިނިކަމެއް ލިބޭނީ ޗެމްޕިއަންސް ލީގުގެ ނަތީޖާ ވެސް ރަނގަޅުކޮށްގެންނެވެ.
ހުސްވި ހަފުތާގައި އަންޗެލޮޓީ ކޮވިޑް-19 އަށް ޕޮޒިޓިވްވެފައިވާތީ، މިރޭގެ މެޗުގައި އޭނާ ފެންނާނެކަމުގެ ޔަގީންކަމެއް ނެތެވެ. މި މެޗުގައި އަންޗެލޮޓީ އަށް ބެންޗުގައި އިނދެވޭނީ ކޮވިޑަށް ނެގެޓިވް ވެއްޖެނަމަ އެވެ.
މިދިޔަ އަހަރު އަންޗެލޮޓީ އަލުން ރެއާލާ ގުޅުމަކީ ގިނަ ބަޔަކަށް ހައިރާން ލިބުނު ކަމެކެވެ. އަންޗެލޮޓީ ކޯޗުކަމަށް ހަމަޖެއްސުމުގެ މަޝްވަރާތައް ނިމުނީ ވަރަށް އަވަހަށެވެ. މި ސީޒަން ފެށިއިރު، މި ވަގުތު އެންމެ ފާހަގަކޮށްލެވޭ ކޯޗުންތައް ތިބީ އެހެން ޓީމުތަކުގެ އެވެ. ބައެއް ފަރާތްތަކުން ސިފަކުރާ ގޮތުގައި އެވަޓަންގެ ކޯޗުގެ މަގާމުގައި ހުރި އަންޗެލޮޓީ ރެއާލުން ގެނައީ ކުރު މުއްދަތަކަށް ވިސްނުމެއްގަ އެވެ. އެއީ މި ސީޒަނަށް ފަހު، ޔޫރަޕްގައި މި ވަގުތު ފާހަގަކޮށްލެވޭ ކޯޗުންތަކެއް ކްލަބު ބަދަލުކުރާނެ ކަމަށް ބެލެވެތީ އެވެ. އޭގެ ތެރޭގައި ޕީއެސްޖީގެ މައުރީސިއޯ ޕޮޗެޓީނޯ އާއި އަޔަކްސްގެ އެރިކް ޓެން ހާގް ހިމެނެ އެވެ.
އަންޗެލޮޓީ އަށް ދެވަނަ ސީޒަނެއް ރެއާލްގައި ހޭދަކުރެވެން އޮތީ، ރަނގަޅު ނަތީޖާތަކެއް ނެރިގެންނެވެ. އެހެންވެއްޖެނަމަ، އަންނަ ސީޒަންގައި ވެސް އަންޗެލޮޓީ އަށް ފުރުސަތެއް ދިނުމަށް، ރެއާލްގެ ރައީސް ފްލޮރެންޓީނޯ ޕެރޭޒް ނިންމަފާނެ އެވެ.
މިދިޔަ އަހަރުގެ ޗެމްޕިއަންސް ލީގުގެ ސެމީ ފައިނަލުން ރެއާލް ވަނީ ޗެލްސީ އަތުން ބަލިވެފަ އެވެ. މި ފަހަރުގެ މުބާރާތުގެ ކުއާޓާ ފައިނަލުގައި ރެއާލުން ޗެލްސީއާ ދެކޮޅަށް ނުކުންނާނީ މިދިޔަ ސީޒަނުގެ ބަދަލުހިފުމުގެ ވިސްނުން ވެސް ސިކުނޑީގައި ބަހައްޓައިގެންނެވެ.
އަންޗެލޮޓީ ކުރިން ކޯޗުކޮށްދިން ކްލަބެއް ކަމަށްވާ ޗެލްސީ އަށް ވެސް މިއީ ފަސޭހަ ވަގުތެއް ނޫނެވެ. އިނގިރޭސި ޕްރިމިއާ ލީގުގައި މި ހަފްތާގައި ޗެލްސީ ކުޅުނު މެޗުން ވަނީ އަމިއްލަ ދަނޑުގައި ބްރެންޓްފޯޑް އަތުން 4-1 އިން ބަލިވެފަ އެވެ. އެހެން ކަމުން މިރޭ ރެއާލުން އެ ޓީމުގެ ކެޕްޓަން ކަރިމް ބެންޒެމާގެ ބޭނުން ހިފައިގެން، ޗެލްސީގެ ޑިފެންސް ތެރެއިން ލިބޭ ޖާގަތަކުގެ ބޭނުންހިފަން ވަރަށް ބޮޑަށް މަސައްކަތްކުރާނެ އެވެ.
ޗެލްސީން ރެއާލާ ދެކޮޅަށް ނުކުންނާނީ ޔޫރަޕްގައި ބަލިނުވެ އޮތް ރެކޯޑެއް ދަމަހައްޓާށެވެ. ޔޫރަޕްގެ މުބާރާތްތަކުގައި ޗެލްސީން ރެއާލާ ބައްދަލުކުރި ފަސް މެޗު ވެސް ބަލިވެފައިނުވެ އެވެ. ޗެލްސީ ދަނޑުގައި މިރޭ ރެއާލާ ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
