ނެޓްބޯޅަ އެސޯސިއޭޝަން އޮފް މޯލްޑިވްސް (ނާމް) އިން މުޅިން އަލަށް ބޭއްވި ޖޫނިއާ ނެޓްބޯޅަ ޗެމްޕިއަންޝިޕް ކާމިޔާބުކަމާއިއެކު ނިންމާލައިފި އެވެ.
މާލޭ ކުޅިވަރު އެކުވެނި ނެޓްބޯޅަ ސިންތެޓިކް ކޯޓުގައި ކުރިއަށްދިޔަ މި މުބާރާތުގައި ތިން އުމުރުފުރާ އަކުން 13 ޓީމެއް ވަނީ ވާދަކޮށްފަ އެވެ. އެއީ 12 އަހަރުން ދަށާއި 14 އަހަރުން ދަށުގެ އިތުރުން 16 އަހަރުން ދަށުގެ އުމުރުފުރާގަ އެވެ. މި މުބާރާތުގައި ޖުމްލަ އެކު 130 ކުޅުންތެރިން ބައިވެރިވި އެވެ.
ނެޓްބޯޅަ ޖޫނިއާ ނެޓްބޯޅަ ޗެމްޕިއަންޝިޕްގެ 12 އަހަރުން ދަށުގެ ފައިނަލުގައި ފިއޮންތީ އެކަޑެމީއާ ވާދަކޮށް ޗެމްޕިއަންކަން ހޯދީ ޕާޕަލް ޗީތާސް އެވެ. ތިން ވަނަ ހޯދީ ގްރީން ވިންގްސް އެވެ. މި އުމުރުފުރާގެ ޑްރީމް ޓީމްގައި ހިމެނެނީ ގްރީން ވިންގްސްގެ ފާތިމަތު ޝައުޝާ ޝާކިރު، ޕާޕަލް ޗީތާސްގެ އާލާ އަހުމަދު އިނާޒް، މަރިޔަމް ނަތާރާ ނަސީރު، މަރިޔަމް އުޔޫން އިގްބާލް، ފިއޮންތި އެކަޑެމީގެ ތާރާ އެލީނާ ޝިފާހު، އާމިނަތު ސާރާ ހަލީމްގެ އިތުރުން ރޯޔަލް ބްލޫގެ އައިޝަތު ނޯޔާ ބިންތި ނަދީމް އެވެ.
މުބާރާތުގެ 14 އަހަރުން ދަށުގެ ޗެމްޕިއަންކަން ހޯދީ ފިއޮންތި އެކަޑެމީ އެވެ. އެއީ ފައިނަލްގައި ޝޫޓިން ސްޓާސް 12-08 އިން ބަލިކޮށްގެންނެވެ. މި އުމުރުފުރާގެ އެންމެ މޮޅު ހަތް ކުޅުންތެރިންނަކީ ޗެމްޕިއަން ފިއޮންތީގެ ތަޒްކިޔާ މުހައްމަދު މައުޝޫގް، އާމިނަތު އާނާ، ޝިބާ ހުސައިން ސުހައިލް، ޝޫޓިން ސްޓާސްގެ މަލަކް އިސްމާއިލް މާހިރު، އައިޝަތު ޝިނާ ޝަފީގު، ޒޯޔާ އަލީ މިސްބާހުގެ އިތުރުން ކޯމެޓްސްގެ އައިޝަތު އައިލީން ނަދީމް އެވެ.
ސޯޅަ އަހަރުން ދަށުގެ ފައިނަލުގައި ފިއޮންތީ ބަލިކޮށް ޗެމްޕިއަންކަން ހޯދީ ދަންޑަބާޑްސް އެވެ. މި އުމުރުފުރާގެ އެންމެ މޮޅު ހަތް ކުޅުންތެރިންނަކީ ޗެމްޕިއަން ތަންޑަބާޑްސްގެ އައިޝަތު ޔަފްއާ އަހުމަދު، އައިޝަތު އައިނީ، އައިޝަތު އީޝަލް އަލީ، އައިޝަތު ޝާޔާ ޝާފީގު، އައިޝަތު މަލަކް އަލީގެ އިތުރުން ފިއޮންތީގެ މަރިޔަމް ސާރާ އިސްމާއިލް އަދި ހަރިކޭންގެ މިޝްކާ އަފްރާހު ހަސަން އެވެ.
ނެޓްބޯޅަ އެސޯސިއޭޝަނުގެ ޖޫނިއާ ޕޫލްގެ ހަރަކާތްތައް ހުއްޓިފައި އޮތުމަށް ފަހު މި ބޭއްވި ޖޫނިއާ މުބާރާތާއިއެކު ނެޓްބޯޅައިގެ އާ ޖީލެއް ބިނާކުރުމަށް ކުރަމުން އަންނަ މަސައްކަތަށް ވަނީ އިތުރު ކުރިއެރުންތަކެއް ލިބިފަ އެވެ. މި މުބާރާތަކީ ނެޓްބޯޅައިގެ ހަރަކާތްތައް އާ މިސްރާބަކުން ގޮސް ކުރިއެރުން ލިބޭނެ ކަމެކެވެ.
މި މުބާރާތަކީ އެކުވެނީ އައުޓްޑޯގައި އެޅި ނެޓްބޯޅަ ސިންތެޓިކް ޓްރެކުގައި ބޭއްވި ފުރަތަމަ މުބާރާތެވެ. މި ކޯޓުގައި ސަރަހައްދީ ޖޫނިއާ މުބާރާތެއް ބޭއްވުމަށް މިހާރު އަންނަނީ މަސައްކަތް ކުރަމުންނެވެ. މުބާރާތުގެ ފައިނަލް މެޗު ޝަރަފްވެރިކޮށްދެއްވީ ކުޅިވަރާ ބެހޭ ވަޒީރު އަހުމަދު މަހުލޫފް އެވެ.
