މެޑްރިޑް (އޮކްޓޫބަރު 14) - ބާސެލޯނާ ދޫކޮށްލަން ލިއޮނަލް މެސީ ނިންމި ހިސާބުން އޭނާ ހޯދަން މަސައްކަތްކުރި ކަމަށް އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ ބުނެފި އެވެ.
މި ސީޒަން ފެށުމުގެ ކުރިން މެސީ ލައްވައި އާ ކޮންޓްރެކްޓެއްގައި ސޮއިކުރަން ބާސެލޯނާ އިން ބެލިއިރު، އެންމެ ބޮޑު މައްސަލަ އަކަށް ދިމާވީ ބާސެލޯނާގެ ހުރިހާ ކުުޅުންތެރިިންގެ ޖުމްލަ މުސާރަ އިންތިހާ އަށް ބޮޑުވެފައިވުމެވެ. ލަލީގާގެ މުސާރަ އޮނިގަނޑަށް ފައްތައިގެން މެސީ މަޑުކުރެވޭނެ އެއްވެސް ގޮތެއް ނެތިގެން ބާސެލޯނާ އަށް އެންމެ ފަހުން ޖެހުނީ އޭނާ ދޫކޮށްލާށެވެ. މެސީ ގުޅުނީ ޕީއެސްޖީއާ އެވެ.
އާޖެންޓީނާގެ ނޫހަކަށް ދިން އިންޓަވިއުއެއްގައި ސިމިއޯނީ ބުނީ މެސީ ގެނެވޭތޯ މަސައްކަތްކުރީ ލުއިސް ސުއަރޭޒް މެދުވެރިކޮށް ވާހަކަ ދައްކައިގެން ކަމަށެވެ.
"އަހަންނެއް މަޝްވަރާއެއް ނުކުރަން. އެކަމަކު އަހަރެން ސުއަރޭޒް ގާތުގައި ބުނިން މެސީ އެތުލެޓިކޯ އަށް ގެނެވޭތޯ މަސައްކަތް ކުރަން. އެކަމަކު، ސުއަރޭޒް އެ ވާހަކަތައް ތިން ގަޑިއިރެއްހާއިރު ދެކެވުނު ފަހުން ޕީއެސްޖީން މެސީއާ އެކު އެއްބަސްވުމަކަށް އަތުވެއްޖެ،" ސިމިއޯނީ ބުންޏެވެ.
ސިމިއޯނީ މެޗެއްގެ ތެރެއިން: މެސީއާ އެކު މަސައްކަތް ކުރަން ބޭނުންވާ ކަމަށް ބުނެފައިވޭ.
ސިމިއޯނީ ބުނީ މެސީއާ އެކު މަސައްކަތް ކުރަން ލިބޭ ފުރުސަތަކަށް އަބަދު ވެސް އިންތިޒާރުކުރާ ކަމަށެވެ. އޭގެ މާނަ އަކީ އޭނާ އެތުލެޓިކޯ ދޫކޮށް އެހެން ޓީމަކާ ގުޅޭ ވާހަކަ ނޫން ކަމަށް ސިމިއޯނީ ބުނެފައިވެ އެވެ.
އެތުލެޓިކޯ ކަހަލަ ޓީމަކަށް މެސީ އަންނަން ބޭނުންވާނެތޯ އެހުމުން ސިމިއޯނީ ދިން ޖަވާބަކީ މެސީ އަކީ ހުރިހާ މުބާރާތަކަށް ވާދަކުރެވޭ ފެންވަރުގެ ޓީމުތަކަށް ކުޅެން ބޭނުންވާނެ ކުޅުންތެރިއެއް ކަމަށާއި އެތުލެޓިކޯގައި އެ ފުުރުސަތު އެބައޮތް ކަމަށެވެ.
"އެތުލެޓިކޯ އަކީ މިހާރު މެސީ ފެންވަރުގެ ޓީމެއް،" ސިމިއޯނީ ބުންޏެވެ.
ދުނިޔޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ މެސީ ޕީއެސްޖީ އަށް ބަދަލުވީ ތިން އަހަރުގެ ކޮންޓްރެކްޓެއްގަ އެވެ. މެސީ އަށް ޕީއެސްޖީން އަހަރަކު މުސާރައިގެ ގޮތުގައި 35 މިލިއަން ޑޮލަރު ލިބޭނެ އެވެ. ސޮއިކުރިއިރު ވެސް ބޯނަހެއްގެ ގޮތުގައި މެސީ އަށް 35 މިލިއަން ޑޮލަރު ދިނެވެ.
