މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާގެ މަގާމަށް މުހައްމަދު އިޝާން މިއަދު އައްޔަނުކޮށްފި އެވެ.

މަނީ ލޯންޑަރިން އާއި ޓެރަރިޒަމަށް ފައިނޭންސްކުރުން ހުއްޓުވުމުގެ މަސައްކަތްތައް ވިލަރެސްކުރުމަށް އެމްއެމްއޭގައި ގާއިމުކޮށްފައިވާ ޔުނިޓުގެ ވެރިޔަކަށް އައްޔަނުކުރި އިޝާން މީގެ ކުރިން ހުންނެވީ މަރުކަޒީ ބޭންކުގެ ހެޑް އޮފް ފައިނޭންސްގެ މަގާމުގަ އެވެ.

މި މަގާމަށް އޭނާ ހޮވުނީ އެފްއައިޔޫގެ އިސްވެރިޔާގެ މަގާމަށް ކުރިމަތިލުމަށް އެމްއެމްއޭގެ މުވައްޒަފުންގެ ތެރެއިން ހުޅުވާލުމުން އެ މަގާމަށް ކުރިމަތިލި ފަރާތްތަކުގެ ތެރެއިން އިންޓަވިއުކޮށްގެން ކަމަށް އެ އިދާރާއިން ބުނެ އެވެ.

އިޝާންއަކީ ޗާޓާޑު އެކައުންޓަންޓެކެވެ. އޭނާ އަކީ އިނގިރޭސިވިލާތުގެ ޗާޓާޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ) ގެ އެސޯސިއޭޓް މެންބަރެއްގެ އިތުރުން، އިންސްޓިޓިއުޓް އޮފް ޗާޓާޑް އެކައުންޓަންޓްސް އޮފް ދަ މޯލްޑިވްސްގެ ވެސް އެފިލިއޭޓް މެންބަރެއްކެވެ.

އޭނާ ވަނީ މީގެ ކުރިން އެމްއެމްއޭގެ ހެޑް އޮފް ކޯޕަރޭޓް އެކައުންޓްސް ސެކްޝަނާއި، ހެޑް އޮފް ފައިނޭންޝަލް ކޮންޓްރޯލްސް ޑިވިޝަންގެ މަގާމު ވެސް ފުރުއްވާފަ އެވެ.

ފައިނޭންޝަލް އިންޓެލިޖެންސް ޔުނިޓަކީ މަނީ ލޯންޑަރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން މޯލްޑިވްސް މަނިޓަރީ އޮތޯރިޓީގައި ގާއިމުކޮށްފައިވާ ހާއްސަ ޔުނިޓެކެވެ.

އެ މަގާމު ހުސްވީ މީގެ ކުރިން ހުންނެވި އިސްމާއިލް ސާޖިދު މަގާމުން ވަކިކުރުމުންނެވެ. އަދަދު އަށް އެނގިފައިވާ ގޮތުގައި ސާޖިދު މަގާމުން ވަކިކުރީ ޖިންސީ ފުރައްސާރައިގެ މައްސަލައެއްގަ އެވެ. އެ މައްސަލާގައި އޭނާ ވަނީ އެމްއެމްއޭއާ ދެކޮޅަށް ވަޒީފާއާބެހޭ ޓްރައިބުނިލަށް މައްސަލަ ހުށަހަޅާފަ އެވެ.

އެފްއައިޔޫގެ ވެރިޔާ އައްޔަނުކުރުމާއި ވަކިކުރުމުގެ ބާރު އޮންނަނީ ގަވަރުނަރަށެވެ.