އެމެރިކާ އާއި އިޒްރޭލު ގުޅިގެން އިސްވެ އިރާނަށް ދިން ހަމަލާތަކުގައި އެ ގައުމުގެ ރޫހާނީ ލީޑަރު، އާޔަތުالله ޚާމަނާއީ އަވަހާރަކޮށްލިތާ 48 ގަޑިއިރު ވެގެންދިޔައިރު، ވެސް ދިވެހި ސަރުކާރުން އެކަމާ ގުޅިގެން އެއްވެސް އެއްޗެއް ނުބުނެ ހިމޭނުން އޮންނާތީ އާންމުން ނުރުހުން ފާޅުކުރަން ފަށައިފި އެވެ.

އެމެރިކާ އާއި އިޒްރޭލުން ގުޅިގެން ދިން ހަމަލާތަކުގައި އާޔަތުالله ޚާމަނާއީ އަވަހާރަކޮށްލީ އިއްޔެރޭ ފަތިހު އެވެ. ނަމަވެސް މި ހަބަރު ޝާއިއު ކުރުމާ ހަމައަށް ވެސް ދިވެހި ސަރުކާރުން އަދި، ރައީސުލްޖުމްހޫރިއްޔާ މުހައްމަދު މުއިއްޒު އެކަން ކުށްވެރި ކުރައްވައިފައެއް ވެސް، އަދި ތައުޒިޔާ ފޮނުއްވައިފައެއް ވެސް ނުވެ އެވެ.

އެކަމާ ނުރުހުން ފާޅުކޮށް ސޯޝަލްމީޑިއާގައި ގިނަ ބަޔަކު ދަނީ ނުރުހުން ފާޅުކުރަމުންނެވެ. އެގޮތުން ހިިޔާލުފާޅުކުރި މީހުން ބުނީ މުސްލިމަކަށް ވިޔަސް ނުވަތަ އެހެން ދީނެއްގެ މީހަކަށް ވިޔަސް ހަމަލާއެއްދީ މަރާލުން އެއީ ކުށެއް ކަމަށާއި އެކަން ކުށްވެރިކުރަން ނުކެރުމަކީ ދެފުށްގެދޮތްކަން ކަމަށެވެ.

"މިހާރު ގައުމުގައި ވެރިކަން ކުރަން ތިޔަ ހުރީ ވެރިއެއްގެ ސިފަހުރި އިންސާނެއް ނޫން، ދޮގުން ފުރި ބަންޑުން ދަނީ މިހާރު،" އަބްދުالله ރަޝީދުގެ ނަމުގައި ފޭސްބުކް އެކައުންޓެއް ހިންގާ މީހަކު ބުންޏެވެ.

އެކަމާ ނުރުހުން ފާޅުކުރި ބައެއް އެހެން މީހުން ބުނީ، އިސްލާމީ ގައުމެއްގެ ވެރިއަކު އަވަހާރަވުމުން މީގެ ކުރިން ވެސް އަމަލު ކުރަމުން އައިގޮތަށް އެކަމާ ހިތާމަކޮށް، ތައުޒިޔާގެ މެސެޖު ފޮނުވުމަކީ ރާއްޖެއިން ކުރަންޖެހޭނެ ކަމެއް ކަމަށެވެ.

އެ މީހުންގެ ވާހަކައަށް ބާރު ލިބެނީ މި ވެރިކަމުގެ ދުވަސްވަރު ވެސް ކަން ކޮށްފައިވާ ގޮތުންނެވެ. ރާއްޖޭގެ ވެރިކަމުގެ ހުވާ މުއިއްޒު ކުރެއްވިފަހުން، ކުވެއިތުގެ އަމީރު އަވަހާރަވުމުން ދިވެހި ސަރުކާރުން ތައުޒިޔާ ފޮނުވައި ޑިސެމްބަރު 17، 2023 އިން ފެށިގެން ތިން ދުވަހަށް ދިވެހި ގައުމީ ދިދަ ބައިދަނޑިއަށް ތިރިކުރި އެވެ.

އޭގެފަހުން ނެމީބިއާގެ ރައީސް، އަވަހާރަވުމުން އެކަމުގެ ހިތާމައިގައި ވެސް ފެބްރުއަރީ 2024 ގައި ތިން ދުވަހަށް ގައުމީ ދިދަ ތިރިކުރި އެވެ. އަދި، މެއި 2024، ގައި އިރާނުގެ ރައީސްއަކަށް ހުންނެވި އިބްރާހިމް ރައީސީ އަވަހާރަވުމުން ވެސް ސަރުކާރުން އަމަލު ކުރީ ހަމަ އެގޮތަށެވެ. އިނގިރޭސި ރާނީ އެލިޒަބަތު ދެވަނަ އަވަހާރަވުމުން ވެސް އަމަލުކުރީ އެގޮތަށެވެ.

އެހެންނަމަވެސް، އާޔަތުالله ހާމަނާއީ އަވަހާރަކޮށްލުމުން އެކަން ކުށްވެރި ނުކުރިތަނުގައި، ދިވެހި ސަރުކާރުން އިރާނަށް ތައުޒިޔާގެ މެސެޖެއް ވެސް ނުފޮނުވަ އެވެ.

އެކަމާ ނުރުހުން ފާޅުކުރި ބައެއް އާންމު ރައްޔިތުން ވަނީ މުއިއްޒުގެ އިސްތިއުފާއަށް ވެސް ސޯޝަލްމީޑިއާގައި ގޮވައިފަ އެވެ.