ރަށު ކައުންސިލަށް ކައުންސިލަރުންނާއި މުވައްޒަފުން ހަމަނުވެގެން އާންމުންނަށް ދޭންޖެހޭ ހިދުމަތްތައް ނުދެވޭތީ، ވ. ރަކީދޫ ރައްޔިތުން ނުކުމެ ރަށު އޮފީސް ބަންދުކޮށްފި އެވެ.

މި ނޫހަށް ލިބިފައިވާ ބައެއް ފޮޓޯތަކުން ފެންނަ ގޮތުގައި ރަކީދޫ އޮފީހުގައި ބަޔަކު ވަނީ ފިލާ ޖަހައި ބަންދުކޮށްފަ އެވެ. އަދި އޮފީސް އެތެރެއަށް ނުވަދެވޭ ގޮތަށް ދޮރު ކުރިމަތީގައި މޭޒު ފަދަ އެއްޗެހި އަތުރާފައިވާ މަންޒަރު ވެސް ފޮޓޯތަކުން ފެނެ އެވެ.

"ކައުންސިލު އިދާރާއިން ރައްޔިތުންނަށް ދޭންޖެހޭ އެއްވެސް ހިދުމަތެއް މިވަގުތު ލިބެމުން ނުދާތީ، ވ. ރަކީދޫ ރައްޔިތުންގެ ތެރެއިން ބަޔަކު ނިކުމެ ކައުންސިލު އިދާރާ ބަންދުކޮށްފި،" ވ. އަތޮޅު ކައުންސިލުގެ ރައީސް ސުޖާއު އަލީ އެކްސްގައި ކުރެއްވި ޕޯސްޓެއްގައި ވިދާޅުވެފައިވެ އެވެ.

ރަކީދޫ ޕޮލިސް ޑެސްކު ވެސް ހިންގަނީ އެ ރަށުގެ އޮފީސް އިމާރާތުގެ އެތެރޭގެ އެވެ. އެހެންކަމުން، ރަކީދޫގައި ހަރަކާތްތެރިވާ ފުލުހުންނަށް ވެސް މިއަދު އޮފީހަށް ނުނިކުމެވޭނެ ކަމަށް ބެލެވެ އެވެ.

ރަކީދޫ ނޫނަސް ކައުންސިލް އޮފީސް ހިންގާނެ އަދަދަށް ވެސް މުވައްޒަފުން ހަމަނުވާ ވަރަށް ގިނަ ކައުންސިލް އެބަ އުޅެ އެވެ. މި މައްސަލަ ދިމާވީ، ދާއީމީ މުވައްޒަފުން ނެގުން މަނާކޮށް މައި ސަރުކާރުން ހަރުކަށި ގާނޫނެއް ފާސްކުރި ފަހުންނެވެ.

ވެރިކަން ހިންގާ ޕީއެންސީގެ މެޖޯރިޓީ އޮތް މަޖިލީހުން ފާސް ކުރި ގާނޫނުގައި ބުނެފައިވާ ގޮތުން، ކައުންސިލެއްގެ އުމުރުގައި ބާކީ ހަ މަސްދުވަސް އޮތް ނަމަ އެ ކައުންސިލަކަށް އެއްވެސް ދާއިމީ މުވައްޒަފެއް ނުނެގޭނެ އެވެ. އަދި އެ މުއްދަތުގައި ތަރައްގީގެ އެއްވެސް ޕްރޮޖެކްޓެއް ހިންގުން ވެސް ސަރުކާރުން މަނާ ކުރި އެވެ.

އޭގެ އިތުރުން، ކައުންސިލުން ވިޔަފާރި ކުރުމަށް ކުރިން ލިބިދީފައިވާ ހައްގުތައް ވެސް ގާނޫނުގެ ދަށުން ވަނީ ވަރަށް ބޮޑަށް ހަނިކޮށްފަ އެވެ.