ސިނަމާލެ އަދި މާލެހިޔާ ފްލެޓްތަކުގެ ވެރިންނަށް ފައިސާ ދޭނެ ވާހަކަ މި ސަރުކާރުގެ މެނިފެސްޓޯ އަދި ވައުދު ފޮތުގައި އޮންނާނެ ކަމަށް ވިދާޅުވެ މުހައްމަދު މުއިއްޒު މިއަދު ވިދާޅުވި އެވެ.

ނޫސްވެރިންނާ ބައްދަލުކުރައްވާ މުއިއްޒު ވިދާޅުވީ މިދިޔަ ރިޔާސީ އިންތިހާބަށް ޕީއެންސީން ތައްޔާރުކުރި މެނިފެސްޓޯގެ އިތުރުން ރިޔާސީ އިންތިހާބުގައި ވީ ވައުދުތަކުގެ ފޮތުގައި ފްލެޓް ވެރިންނަށް ފައިސާ ދޭނެކަން ބަޔާންކޮށްފައިވާނެ ކަމަށެވެ.

"އެއްވެސް ގޮތަކަށް ރިޝަވަތެއް ނޫން. މީގެއިން މިހާމަވަނީ ތިބޭފުޅުންގެ މައުލޫމާތު ނެތްވަރު އެނގޭތޯ. އަޅުގަނޑުގެ މެނިފެސްޓޯގައިވެސް އޮންނާނެ ކަމެއް އެއީ. މެނިފެސްޓޯގައިވެސް އަދި އެއާ ގުޅިގެން ރިޔާސީ އިންތިހާބުގެ އެކިއެކި ކެމްޕެއިންގެ ދުވަސްވަރުވެސް އޮންނާނެ އެވާހަކަ ދައްކާފައި،" މުއިއްޒު ވިދާޅުވި އެވެ.

ނަމަވެސް އަދަދު އިން ބެލި ބެލުމުން މުއިއްޒުގެ މެނިފެސްޓޯގައި ބަޔާންކޮށްފައިވަނީ މާލޭގައި ހުންނަ ސިނަމާލެ، މާލެހިޔާ ފްލެޓްތައް އަދި ވިލިމާލޭގައި ހުންނަ ސިނަމާލެ ފްލެޓްތައް ތަޅައިލައި، އާ ފްލެޓްތަކެއް އަޅައިދިނުން އެކަންޏެވެ.

އޭގެ އިތުރުން، ރިޔާސީ އިންތިހާބުގެ ކެމްޕެއިނުގެ ތެރޭގައި ވެސް ފްލެޓުތަކުގެ ވެރިންނަށް ފައިސާގެ ހަދިޔާއެއް ދޭ ވާހަކަ މުއިއްޒު ވިދާޅެއް ނުވެ އެވެ. ހަމައެކަނި ވިދާޅުވެފައި ވަނީ އާ ފްލެޓުތަކެއް އަޅައިދޭ ވާހަކަ އެވެ.

"މާލޭގައި ހުރި ސިނަމާލެ، މާލެހިޔާ ފްލެޓްތައް އަދި ވިލިމާލޭގައި ހުރި ސިނަމާލެ 4، މިތަންތަން ހުރީ ބޮލަށް ވެއްޓެން ގާތްވެފައި. ވީރާނާވެގެންގޮސް ވެއްޓެނީ. ރެނދުލައިގެންގޮސް ހުސްވަނީ. އެހެންވީމާ، އެތަންތަންވެސް އިރާދަކުރެއްވިއްޔާ، އަޅުގަނޑުމެން އާއިމާރާތްތަކެއް އެތަންތަނުގައި އަޅައިދޭނަން. އަޅައިދީ އެ ފަރާތްތަކުގެ ގެދޮރު ތާއަބަދަށް އިރާދަކުރެއްވިއްޔާ، ވީހާވެސް ގިނަ ދުވަހަށް ޔަގީންކޮށްދޭނަން،" އޯގަސްޓް، 20، 2023، ގައި ޕީއެންސީން ބޭއްވި ކެމްޕެއިން ޖަލްސާއެއްގައި މުއިއްޒު ވިދާޅުވެފައިވެ އެވެ.

ނަމަވެސް މުއިއްޒު މިއަދު ވިދާޅުވީ ސިނަމާލެ އާއި މާލެހިޔާ ފްލެޓްތައް ބޯމައްޗަށް ވެއްޓޭ ހިސާބުގައި ހުރި ކަމަށާއި ރިޔާސީ ވައުދުގައިވީ ވައުދާ އެއްގޮތަށް އެތަންތަނުގެ ވެރިންނަށް ފައިސާ ދޭނެ ކަމަށެވެ.

"ކުޑަކުޑަ ކަމެއް ނުކުރާ ވާހަކައެއް ނޫން. އެހެންނަމަވެސް މިތަންތަން ހުރީ މީހުންގެ ބޯމައްޗަށް ވެއްޓޭ ހިސާބުގައި. އެހެންވީމަ އަޅުގަނޑު ރިޔާސީ އިންތިހާބުގެ ތެރޭގައި އެ ވައުދުވީ. އެކިއެކި ޕޯޑިއަމްތަކުގައި ހުންނާނެ. އަޅުގަނޑު ހުންނާނެ ބޯ ފޮތެއް ނެރެފައި. ފޮތް ބައްލަވާ. ފޮތް ބަލާލަން ވަގުތު ނެތީ ކަމަށް ވެދާނެ،" މުއިއްޒު ވިދާޅުވި އެވެ.

ސިނަމާލެ އާއި މާލެހިޔާ ފްލެޓްތައް ހުރި ހާލަތުން އެތާ ދިރިއުޅޭ މީހުންނަށް އެހެން ތަނަކަށް ބަދަލުވެވެންދެން ވެސް ކޮންމެވެސް ކުރަންޖެހޭ ކަމަށާއި ސިޓީ ކައުންސިލުން އެ މަރާމާތް ނުކުރާ ކަމަށް މުއިއްޒު ވިދާޅުވި އެވެ. އެގޮތުން މުއިއްޒު ވިދާޅުވީ އެ ފައިސާވެސް ދޭން ނިންމީ ކެބިނެޓުން ކަމަށެވެ.

މީގެއިތުރުން މުއިއްޒު ވިދާޅުވީ ފްލެޓްތަކުގެ ޖޫރިމަނާ މާފުކޮށް ފައިސާ ދޭން ނިންމީ ކެބިނެޓުގައި މަޝްވަރާކޮށް މި އަހަރު ފެށުނު ހިސާބުގައި ކަމަށާއި އޭގެ ކުރިން އެކަން ނުކުރެވުނީ ސިޓީ ކައުންސިލްގެ ތެރެއިން އެއްބާރުލުން ނުލިބިގެން ކަމަށެވެ.

އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބާ ދިމާކޮށް ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެއް ލައްކަ ރުފިޔާ ދޭން ނިންމުމުން، ޖުމްލަ 161 އެޕާޓްމަންޓަށް ދައުލަތުގެ ބަޖެޓުން ޖުމްލަ 16.1 މިލިއަން ރުފިޔާ ދޭންޖެހޭނެ އެވެ.

އެ ނިންމެވުން މުއިއްޒު ނިންމެވީ މުލީއާގޭގައި މާލޭ ހިޔާ އަދި ސިނަމާލެ ފްލެޓުތަކުގެ ބައެއް ވެރިންނާއެކު ބޭއްވި ބައްދަލުވުމެއްގަ އެވެ.

އެ ބައްދަލުވުމުގައި ސަރުކާރު ހިންގާ ޕީއެންސީގެ ފަރާތުން މާލޭގެ މޭޔަރުގެ މަގާމަށް ވާދަ ކުރައްވާ މޫސާ އަލީ ޖަލީލު އާއި މާލޭގެ ޑަބްލިއުޑީސީގެ ރައީސަކަށް ވާދަކުރައްވާ އައިޝަތު އަލައިކާ އަދުނާނުގެ އިތުރުން އިންތިހާބުގައި ވާދަކުރައްވާ މިހާރުގެ ޑެޕިއުޓީ މޭޔަރު އަހުމަދު އަރީޝް އަދި ގަލޮޅު ދެކުނަށް ވާދަކުރައްވާ މިހާރުގެ ކައުންސިލަރު އިބްރާހިމް މުހައްމަދު ވެސް ބައިވެރިވެވަޑައިގަތެވެ.