ދިވެހި ސަރުކާރުން އިންޑިއާއާއެކު ހަދާފައިވާ އެއްބަސްވުންތަކުގައި ގައުމީ ސަލާމަތަށް ނުރައްކާވާ ކަންކަން ހުރި ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ، ރާއްޖޭގެ ގައުމީ ސަލާމަތަށް ނުރައްކާވާ އެއްވެސް ކަމެއް "މިހާރަކު ނުހުންނާނެ" ކަމަށެވެ.

"މިހާރަކު ނުހުންނާނޭ ގައުމީ ސަލާމަތަށް ނުރައްކާވާ އެއްވެސް ކަމެއް އެއްބަސްވުމަކު. އެއިރުގައި އެ ހުރީ ބަދަލުތައް މިހާރަކު އޮތް އެއްބަސްވުމަކު ނޯންނާނޭ ގައުމީ ސަލާމަތަށް ނުރައްކާ އޮތް އެއްވެސް ކަމެއް،" މުއިއްޒު ވިދާޅުވި އެވެ.

ނަމަވެސް އިންޑިއާގެ އެއްބަސްވުންތަކުން އުނި ކުރީ ކޮން މާއްދާތަކެއް ކަމެއް ރައީސް ހާމައެއް ނުކުރައްވަ އެވެ. އެމަނިކުފާނު ވިދާޅުވީ، އެއްބަސްވުންތަކުން އުނިކޮށްފައި ހުރި ކަންކަމަކީ ގައުމީ ސަލާމަތަށް ނުރައްކާވާ ކަހަލަ ކަމެއް ނަމަ އެކަން ހާމައެއް ނުކުރެއްވޭނެ ކަމަށެވެ.

"ގައުމީ ސަލާމަތަށް ނުރައްކާވާ ކަހަލަ އެއްވެސް ކަމެއް އޮތް ނަމަ އަޅުގަނޑުމެން ހާމަ ކުރާނަމޭ. އެކަހަލަ ކަމެއް ނެތީމާ ނޫނީ އަޅުގަނޑުމެން ހާމަ ނުކުރާނަން،" މުއިއްޒު ވިދާޅުވި އެވެ. "އެ އުނިކުރި ކަންކަމަކީ ކޮބައިކަން ގައުމީ ސަލާމަތަށް ނުރައްކާވަންޏާ ހާމައެއް ނުކުރެވޭނެ."

ޕީއެންސީން އިދިކޮޅުގައި އޮވެ އެންމެ ބޮޑަށް ކަންބޮޑުވުން ފާޅުކުރީ މިދިޔަ ސަރުކާރުތަކުން، ބޭރު ގައުމުތަކާއެކު، ހާއްސަކޮށް އަވަށްޓެރި އިންޑިއާއާއެކު ވެފައިވާ އެއްބަސްވުންތަކާ ގުޅޭގޮތުންނެވެ. މި އެއްބަސްވުންތަކުގެ ސަބަބުން ރާއްޖޭގެ މިނިވަންކަމަށް އަސަރުކުރާ ކަމަށް ވެސް ރައީސް މުއިއްޒު އަދި ޕީއެންސީގެ އިސް އޮފިޝަލުން މީގެ ކުރިން އެކި ޖަލްސާތަކާއި ހިނގާލުންތަކުގައި ބުނެފައިވެ އެވެ.

އެގޮތުން، ރާއްޖެ އާއި އިންޑިއާއާ ދެމެދު ވެފައި އޮތް ހައިޑްރޯގްރަފީ އެއްބަސްވުމާއި، އުތުރު ތިލަފަޅުގައި ބިނާކުރަމުންދާ ސިފައިންގެ އަސްކަރީ ޑޮކްޔާޑާ ގުޅޭ އެއްބަސްވުމާއި ޑޯނިއާ އަދި ހެލިކޮޕްޓަރުތަކުގެ އެއްބަސްވުން މި ސަރުކާރުގެ ކުރީކޮޅު ރައްޔިތުންގެ މަޖިލީހުން ދިރާސާކުރަންވެސް ފެށި އެވެ.

އޭގެތެރެއިން ހައިޑްރޯގްރަފީ އެއްބަސްވުން އުވާލާފައިވާއިރު، ދެން ހުރި އެއްބަސްވުންތަކުގެ މައްސަލަ ބެލުމުގެ މަސައްކަތް ވަނީ މަޑުޖެހިފަ އެވެ. އެ އެއްބަސްވުންތައް އުވާ ވެސް ނުލަ އެވެ. އަދި އެއްބަސްވުންތަކުގެ ދަށުން ރާއްޖޭގައި ދުއްވާ އިންޑިއާގެ ހެލިކޮޕްޓަރާއި ޑޯނިޔާ މަތިންދާ ބޯޓެއް ފޮނުވައެއް ނުލަ އެވެ.

ހަމައެކަނި ކުރި ކަމަކީ އެ އުޅަނދުތައް ދުއްވަން އަސްކަރީ ޔުނިފޯމުގައި ތިބި މީހުންގެ ބަދަލުގައި، އިންޑިއާގެ ހިންދުސްތާން އޭރޮނެޓިކްސް ކުންފުނީގެ އެއްބަސްވުމުގައި ތިބި އިންޑިއާ މީހުން ގެނައުމެވެ. އެއަށް ފަހު ސަރުކާރުން ތަކުރާރުކޮށް ބުނަމުން ދަނީ ވައުދުވީ ގޮތަށް ރާއްޖޭގައި ތިބި އިންޑިއާ ސިފައިން ފޮނުވާލާފައިވާ ކަމަށެވެ.