ޖަނަވާރުގެ ހަށިގަނޑުގައި އުފެދި އާލާވެ އިންސާނުންނަށް ބަލި ޖައްސާ ތަފާތު ވައިރަސްތަކުގެ ތެރެއިން، ދުނިޔޭގެ އާންމު ސިއްހަތަށް އެންމެ ބޮޑު ނުރައްކަލެއް ކުރިމަތިކުރުވާނެ ކަމަށް، ސައެންސްވެރިން މިހާރު ބުނަނީ، ދެވައިރަހެކެވެ. އެއީ އިންފުލުއެންޒާ ޑީ ވައިރަހާއި ކެނީން ކޮރޯނާ ވައިރަހެވެ.

މީގެ ތެރެއިން އިންފުލުއެންޒާ ޑީ ވައިރަހަކީ އޫރާއި ގެރީގެ ހަށިގަނޑުގައި އުފެދޭ ފާރުގަނޑަކުން އުފަންވާ ކަމަށް ބެލެވޭ ވައިރަހެއް ކަމަށް ވިޔަސް، އިންސާނުން ކެއުމަށް ބޭނުންކުރާ ނައަފް ސޫފީގެ ބާވަތްތަކުންނާއި ކެއުމަށް ބޭނުންކުރާ ދޫނީގެ ބާވަތްތަކުންނާއި ފުއްލާ އާއި ޒަރާފާ އަދި ކެންގަރޫގެ ހަށިގަނޑުން ވެސް މި ވައިރަސް ފެނިފައި އެބަހުއްޓެވެ.

ކެނިން ކޮރޯނާ ވައިރަސް (CCoV) ފާހަގަކުރެވިފައިވަނީ ކުއްތާގެ ހަޖަމުކުރާ ނިޒާމަށް ބަލި ޖައްސާ ވައިރަހެއްގެ ގޮތުގައެވެ. ނަމުގައި އެއްގޮތް ކަމެއް ހުއްޓަސް، މިއީ ކޮވިޑް-19 ޖައްސާ ކޮރޯނާ ވައިރަހެއް ނޫނެވެ.

އިންފުލުއެންޒާ ޑީ ވައިރަހާއި ކެނިން ކޮރޯނާ ވައިރަހަކީ، މިހާތަނަށް އިންސާނުންގެ ސިއްހަތަށް މާބޮޑު ނުރައްކަލެއް ކުރިމަތިވާފައިވާ ދެ ވައިރަހަކަށް ނުވިޔަސް، ކެނިން ކޮރޯނާ ވައިރަހުގެ ސަބަބުން ދެކުނު އިރުމަތީ އޭޝިޔާގެ ބައެއް ގައުމުތަކުގައި، ނިއުމޯނިއާ ޖެހިގެން ބައެއް މީހުންނަށް ފަރުވާ ދޭންޖެހިފައިވެއެވެ.

ދިރާސާއިން ދައްކާ ގޮތުގައި އެމެރިކާގެ ފްލޮރިޑާ އާއި ކޮލޮރާޑޯގައި ގެރި ބަކަރި ގެންގުޅޭ ދަނޑުތަކުގައި މަސައްކަތް ކުރާ މީހުންގެ 97 އިންސައްތަ މީހުންގެ ހަށިގަނޑުގައި އިންފުލުއެންޒާ ޑީ ވައިރަހުގެ އެންޓިބޮޑީ އެކުލެވެއެވެ. މީގެ މާނައަކީ އެމީހުންގެ އުމުރުގެ ކޮންމެވެސް މަރުހަލާއެއްގައި އެމީހުންގެ ހަށިގަނޑަށް އެ ވައިރަސް އެތެރެވެފައިވެއެވެ.

ނަމަވެސް ޗައިނާގައި ދާދި ފަހުން ވަނީ އިންފުލުއެންޒާ ޑީ ވައިރަހުގެ ބަދަލުވެފައިވާ ބާވަތެއްގެ ސަބަބުން ބަލިވެ ހޮސްޕިޓަލުގައި ފަރުވާ ދޭން ޖެހިފައެވެ. މިއީ އިންސާނުންގެ ގައިން ގަޔަށް އެރުމުގެ ގާބިލުކަން ލިބިގެންވާ ވައިރަހެއް ކަމަށް ޗައިނާގެ ސައެންސްވެރިން ބުނެއެވެ.

މި ދެ ވައިރަހާ ބެހޭ ގޮތުން ދިރާސާތައް ހަދަމުން އަންނަ ސައެންސްވެރިން ބުނާ ގޮތުގައި، މި ދެ ވައިރަސް މިވަގުތު އިންސާނީ މުޖްތަމައުތަކުގައި ދަތުރުކުރަމުން ދަނީ ސިއްހީ ހިދުމަތްތެރިން ރާޑަރަށް ނާރައެވެ. ނަމަވެސް، އިންސާނުންގެ މެދުގައި މި ދެ ވައިރަސް ފެތުމަށް އެންމެ އެކަށޭނަ ގޮތަކަށް އިންސާނުން ވެށި ބަދަލުވަމުން އަންނަ ކަމަށް ވެސް ސައެންސްވެރިން ބުނެއެވެ.

ސައެންސްވެރިން ބުނާ ގޮތުގައި މި ދެ ވައިރަސްގެ ހާލަތު ވަޒަންކުރަމުން ދާ ނަމަ، އިންސާނުންގެ މެދުގައި މި ދެވައިރަސް، ވަބާއެއްގެ ގޮތުގައި ފެތުރިގަތުމުގެ ނުރައްކާ އޮތްކަން ކަށަވަރު ކުރެވޭނެއެވެ. އަދި މި ދެ ވައިރަހަކީ ވެސް އިންސާނުންގެ ނޭވާލާ ނިޒާމަށް ގެއްލުން ދޭނެ ދެ ވައިރަހަށް ވިޔަސް، މި ދެ ވައިރަހުގެ ސަބަބުން ކުރިމަތިވެދާނެ ނުރައްކަލަކަށް، ގައުމުތަކުގެ ސިއްހީ އިދާރާތައް ތައްޔާރުނުވާ ކަމަށް ވެސް ސައެންސްވެރިން ބުނެއެވެ.

ޔުނިވަސިޓީ އޮފް ޓެކްސަސްގެ ވަން ހެލްތު ރިސާޗް އެންޑް ޓްރެއިނިން ލެބޯރެޓަރީގެ ސައެންސްވެރިޔާ ގްރިގޮރީ ގްރޭ ވިދާޅުވާ ގޮތުގައި ކެނިން ކޮރޯނޯވައިރަހުގެ އާ ބާވަތެއް (CCoV-HuPn-2018) 2018 ވަނަ އަހަރު ވަނީ މެލޭޝިޔާއިން ފެނިފައެވެ. މި ވައިރަހުގެ އަސަރުކޮށްގެން 2018 ވަނަ އަހަރު މެލޭޝިޔާގައި ކުޑަކުއްޖަކަށް ފަރުވާ ދޭން ޖެހުނެވެ.

އޭގެ ފަހުން، ހަމަ މިބާވަތުގެ ކެނިން ކޮރޯނާވައިރަހުގެ އަސަރުކޮށްގެން ތައިލޭންޑާއި ވިއެޓްނާމް އަދި އެމެރިކާގެ އާކަންސަސްގައި ބައެއް މީހުންގެ ނޭވާލާ ނިޒާމަށް އުނދަގޫތަކެއް ކުރިމަތިވެ ފަރުވާ ދޭންޖެހުނެވެ. ސައެންސްވެރިން ބުނާ ގޮތުގައި މި ކަންކަމުން އެނގެނީ ކެނިން ކޮރޯނާވައިރަސް ތަފާތު ބާވަތްތައް، އެއް ބައްރުން އަނެއް ބައްރަށް ފެތުރެމުން އަންނަ ކަމެވެ. ވަބާއެއްގެ ސިފައިގައި ނުފެތުރުނަސް، މި ވައިރަހުގެ ނުރައްކާ އިންސާނުންގެ ތެރޭގައި އެބަ އޮތްކަން މިކަމުން ދޭހަވެއެވެ.