މުޅި ދުނިޔޭގެ ނިސްބަތުން ބަލާއިރު، އެންމެ ގިނަ މީހުން މަރުވާ ބައްޔެއްގެ ގޮތުގައި ފާހަގަކުރެވިފައިވަނީ ހިތުގެ ބަލިތަކެވެ. އެހެންކަމުން ހިތުގެ ބަލިތަކުގެ ނުރައްކާތަކާއި އެ ނުރައްކާތަކުގައި އިންސާނުންގެ ފުރާނަ ގެއްލިގެން ދާ މިންވަރު ދަށް ކުރެވޭނެ ގޮތްތައް ދެނެގަތުމަށް ސައެންސްވެރިން ދިރާސާތައް ކުރާތާ އެތައް އަހަރެއް ވެއްޖެއެވެ.

ޖާނަލް އޮފް އެމެރިކަން ހާޓް އެސޯސިއޭޝަންގައި ދާދި ފަހުން ޝާއިއުކޮށްފައިވާ ދިރާސާ ރިޕޯޓެއްގައި ބުނެފައިވާ ގޮތުން ނިދުމުގެ އާދަ ގެންގުޅޭ ގޮތުން ވެސް ހިތުގެ ބަލިތައް ޖެހުމުގެ ނުރައްކާ އިތުރުވެއެވެ. ދުވާލުގެ ކުރީކޮޅުގައި ނުވަތަ މެންދުރު ކުރީގެ ވަގުތުތަކުގައި ބޮޑަށް ހަރަކާތްތެރިވެ އުޅޭ މީހުންނާއި މެންދުރާއި އިރު އޮއްސުމާ ދެމެދު ބޮޑަށް ހަރަކާތްތެރިވެ އުޅޭ މީހުންނާއި ރޭގަނޑުގެ ނިދި ނަގާލާފައި މަސައްކަތުގައި އުޅޭ މީހުންގެ ތެރެއިން ސިއްހީ މައްސަލަތައް އެންމެ ގިނައިން ދިމާވަނީ ރޭގަނޑު ހަރަކާތްތެރިވެ އުޅޭ މީހުންނަށެވެ.

މި ދިރާސާގައި ބައިވެރިކުރި މީހުންގެ 14 އަހަރުގެ މައުލޫމާތުތައް ދިރާސާކުރުމުން އެނގުނީ މެންދުރު ފަހު މަސައްކަތުގައި އުޅޭ މީހުންނާ އަޅައި ބަލާއިރު، ރޭގަނޑު ނިދި ނަގާލާފައި މަސައްކަތުގައި އުޅޭ މީހުންނަށް ހިތުގެ ބަލިތައް ނުވަތަ ސްޓްރޯކެއް ޖެހުމުގެ ނުރައްކާ 16 އިންސައްތަ އިތުރުކަމެވެ.

މި ދިރާސާގައި ބުނެފައިވާ ގޮތުން، އިންސާނާގެ ހަށިގަނޑުގައި ލައްވާފައިވާ ހަޔަވީ ގަޑި (ބަޔޮލޮޖިކަލް ކްލޮކް)އާ ހިލާފަށް އެމީހެއްގެ މަސައްކަތުގެ އާދަތައް ގެންގުޅޭ ނަމަ، ސިކުނޑިން ރާވައިދޭ ހަށިގަނޑުގެ މަސައްކަތްތަކަށް ބުރޫ އަރައި ސިއްހީ މައްސަލަތައް ކުރިމަތިވެއެވެ. މީގެ މާނައަކީ، އިންސާނާގެ ހަޔަވީ ގަޑި ހަމަޖެހިފައި އޮންނަ ގޮތުން ރޭގަނޑުގެ ވަގުތަކީ ނިދައި އަރާމުކޮށްގެން، އަނެއް ދުވަހުގެ މަސައްކަތަށް ހަށިގަނޑު ތައްޔާރުކުރާ ވަގުތެވެ.

މިއާ ހިލާފަށް އެ ވަގުތުގައި އަރާމުނުކޮށް ހަށިގަނޑުގެ ވަރުބަލިކަން ފިލުވުމަށް ގުދުރަތުން ލައްވާފައިވާ ނިޒާމުގެ ބޭނުން ރަނގަޅަށް ނުހިފައި، އެ ވަގުތު ވެސް މަސައްކަތުގައި އަވަދިނެތި އުޅޭ ނަމަ، އެމީހެއްގެ ސިކުނޑިއަށް ޕްރެޝަރު ބޮޑުވެއެވެ. ސިކުނޑީގެ ހާސްކަމާއި ކަންބޮޑުވުން އިތުރުވެ، ސިއްހީ މައްސަލަތަކަށް މަގު ފަހިވެއެވެ.

ރޭގަނޑުގެ ވަގުތުގައި ނުނިދައި އުޅޭ މީހުންގެ ކިބައިގައި އެންމެ ގިނައިން އަށަގަންނަ ނުބައި އާދަތަކަކީ، ދުންފަތުގެ އިސްތިއުމާލު ކުރުމާއި ބަނގުރާ ބުއިމާއި، ސިއްހަތަށް ގެއްލުން ދެނިވި ކާނާ ބޭނުންކުރުމެވެ. އޭގެ ތެރޭގައި އެކި ޒާތްޒާތުގެ ތައްޔާރީ ކާނާތައް ހިމެނެއެވެ.

އޭގެ އިތުރުން މީހާގެ މިޒާޖު ޚަރާބުކޮށްލާ ޒާތުގެ ނަފްސާނީ މައްސަލަތައް މެދުވެރިކުރުވައެވެ. އޭގެ ތެރޭގައި އެންޒައިޓީ އާއި ޑިޕްރެޝަންގެ އުނދަގޫތައް ހިމެނެއެވެ. މިފަދަ ކަންކަމަކީ ހިތުގެ މައްސަލަތަކަށް މަގު ފަހިކުރާ ކަންކަމެވެ.

ރޭގަނޑުގެ ނިދި ނަގާލާފައި މަސައްކަތުގައި އުޅޭ މީހުންގެ ހިތުގެ ބަލިތައް އިތުރުވަނީ، ދުޅަހެޔޮ ދިރިއުޅުމަކަށް ބޭނުންވާ އަސާސީ އަށް ކަންތަކަށް ސަމާލުކަން ނުދެވޭތީއެވެ. އެއީ ހަށިގަނޑަށް ފައިދާ ހުރި ކާނާ ކެއުމާއި، ހަރަކާތްތެރިވެ އުޅުމާއި، ދުންފަތުގެ އިސްތިއުމާލު ނުކުރުމާއި، ރަނގަޅު ފުން ނިންޖަކުން ނިދުމާއި، އުމުރާއި އިސްކޮޅާ އެއްވަރަށް ބަރުދަން ބެހެއްޓުމާއި، ކޮލެސްޓެރޯލް ކޮންޓްރޯލް ކުރުމާއި، ލޭގައި ހަކުރު އެކުލެވޭ ނިސްބަތް ކޮންޓްރޯލް މިންގަނޑުގައި ހިފެހެއްޓުމާއި ލޭގެ ޕްރެޝަރު ސިއްހީ މިންގަނޑުގައި ހިފެހެއްޓުމެވެ.