އަންނަ އެޕްރީލް 4، ގައި ބާއްވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބުގައި ވާދަކުރުމަށް އިއްޔެގެ ނިޔަލަށް ހުށަހެޅި ޖުމްލަ 1,324 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.

އިލެކްޝަންސް ކޮމިޝަނުން ބުނީ ލޯކަލް ކައުންސިލް އިންތިހާބުގައި ވާދަކުރުމަށް ހުށަހެޅި 750 ކެންޑިޑޭޓުންގެ ކެންޑިޑަންސީ ގަބޫލުކުރިއިރު، 183 ކެންޑިޑަންސީ ގަބޫލުނުކުރާ ކަމަށެވެ. ކެންޑިޑަންސީ ގަބޫލުނުކުރުމުގެ ސަބަބުން އަލުން ފޯމު ހުށަހެޅީ 77 ކެންޑިޑޭޓުން ކަމަށް ވެސް ކޮމިޝަނުން ބުންޏެވެ.

ލޯކަލް ކައުންސިލް އިންތިހާބުގައި ވާދަކުރުމަށް ސިޔާސީ ޕާޓީތަކުން ހުށަހެޅި 617 ކެންޑިޑޭޓުންގެ ކެންޑިޑަންސީ ގަބޫލުކުރިއިރު، 113 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. ކެންޑިޑަންސީ ގަބޫލުނުކުރުމުގެ ސަބަބުން ސިޔާސީ ޕާޓީތަކުން އަލުން 36 ކެންޑިޑޭޓުންގެ ފޯމު ހުށަހަޅާފައިވެ އެވެ.

މީގެއިތުރުން ލޯކަލް ކައުންސިލް އިންތިހާބުގައި އަމިއްލަ ގޮތުން ވާދަކުރާ 133 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 70 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. އަމިއްލަ ގޮތުން ވާދަކުރާ 36 ކެންޑިޑޭޓެއްގެ ކެންޑިޑަންސީ ގަބޫލުނުކުރުމުން އަލުން ފޯމު ހުށަހަޅާފައިވެ އެވެ.

ޑަބްލިއުޑީސީގައި ވާދަކުރުމަށް ހުށަހެޅި 574 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 126 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. މިގޮތުން ކެންޑިޑަންސީ ގަބޫލުނުކުރާ 34 ކެންޑިޑޭޓަކު އަލުން ފޯމު ހުށަހަޅާފައިވެ އެވެ.

ސިޔާސީ ޕާޓީތަކުން ޑަބްލިއުޑީސީއަށް ވާދަކުރާ 488 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 77 ކެންޑިޑޭޓުންގެ ކެންޑިޑަންސީ ގަބޫލuކޮށްފައެއް ނުވެ އެވެ. މިގޮތުން އޭގެ ތެރެއިން 15 ކެންޑިޑޭޓަކު ވަނީ އަލުން އިލެކްޝަނަށް ފޯމު ހުށަހަޅާފަ އެވެ.

މީގެއިތުރުން އަމިއްލަ ގޮތުން ޑަބްލިއުޑީސީއަށް ވާދަކުރާ 86 ކެންޑިޑޭޓުންގެ ކެންޑިޑަންސީ ގަބޫލުކޮށްފައިވާއިރު، 49 ކެންޑިޑޭޓުންގެ ކެންޑިޑަންސީ ގަބޫލުކޮށްފައެއް ނުވެ އެވެ. ކެންޑިޑަންސީ ގަބޫލުނުކުރާ 19 ކެންޑިޑޭޓަކު ވަނީ އަލުން އިލެކްޝަނަށް ފޯމު ހުށަހަޅާފަ އެވެ.

އިލެކްޝަނުން ބުނީ އާންމުކޮށް ކެންޑިޑަންސީ ގަބޫލުނުކުރާ ސަބަބުތަކުގެ ތެރޭގައި ހިމެނެނީ ކުށާއި ދަރަނީގެ ރެކޯޑު ފުރިހަމައަށް ހުށަހަޅާފައި ނުވުމާއި، ކުށެއް ނުވަތަ ދަރަންޏެއް އޮތް ނަމަ އެކަމުގެ ތަފްސީލު ހުށަހަޅާފައި ނުވުމުގެ އިތުރުން ކަރެކްޝަނަލް ސާވިސް އިން ފުރިހަމަކޮށް ހުށަހަޅަންޖެހޭ ކުށުގެ ރެކޯޑު ހުށަނާޅާތީ އެވެ.

އިންތިހާބަށް ކުރިމަތިލުމުގެ ފުރުސަތު ހުޅުވާލީ ފެބްރުއަރީ 1، ވާ އާދީއްތަ ދުވަހުގެ 15:00 ގެ ނިޔަލަށެވެ.

މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.

އެޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފަ އެވެ.