ހިއުންޑާއި ގޯލްޑަން ފުޓްސަލް ޗެލެންޖު 2026 ގެ ގދ. އަތޮޅާއި އައްޑޫ ސިޓީގެ އަތޮޅު ސެމީ ފައިނަލު ޖާގަތައް ރޭގެ މެޗުތަކަށް ފަހު ކަށަވަަރުވެއްޖެ އެވެ.

ގދ. އާއި އައްޑޫ ސިޓީ، ކޮންމެ އަތޮޅަކުން ވެސް ބައިވެރިވީ ހަ ޓީމެވެ. އެހެން ކަމުން، އެ އަތޮޅު ބުުރުގެ ކުޅުން ކުރިއަށްދަނީ، ހަ ޓީމު ދެ ގްރޫޕަކަށް ބަހާލައިގެންނެވެ. އެ ގޮތުން، ރޭ ގދ. ގެ ގްރޫޕް އޭގައި ވާދޫން ވަނީ 4-1 އިން ގައްދޫ ބަލިކޮށްފަ އެވެ. އަދި، ގދ. ގްރޫޕް ބީގައި ހޯނޑެއްދޫ އާއި ފިޔޯރީ ކުޅުނު މެޗު ނިމުނީ 1-1 އިން އެއްވަރުވެގެންނެވެ.

ގދ. ގްރޫޕް އޭގެ އެއް ވަނަ ހޯދީ ދެ މެޗުން މޮޅުވެ ހަ ޕޮއިންޓް ހޯދި އެންމެ ފަހުގެ ޗެމްޕިއަން، ވާދޫ އެވެ. ދެ ވަނަ އަށް ދިޔައީ ދެ މެޗުން ތިން ޕޮއިންޓް ހޯދި މަޑަވެއްޔެވެ. އަދި، ފުލަށް ގޮސް މުބާރާތުން ކެޓީ ދެ މެޗުން ބަލިވި ގައްދޫ އެވެ. ގދ. ގެ ގްރޫޕް ބީގައި، ރޭގެ މެޗަށް ފަހު، ހޯނޑެއްދޫން ގްރޫޕްގެ އެއް ވަނަ ހޯދީ ހަތަރު ޕޮއިންޓާ އެކު އެވެ. ދެ ވަނަ އަށް ދިޔަ ފިޔޯރީ އަށް ވަނީ ދެ ޕޮއިންޓް ލިބިފަ އެވެ. އަދި، ފުލުގައި ނިންމި ރަތަފަންދޫ ވަނީ ދެ މެޗުން ބަލިވެފަ އެވެ.

ގައްދޫގެ އަހުމަދު ރިޝްފާން ލީޑުނަގައިދިން މެޗުގައި ވާދޫން ފަަހަތުން އަރައި މޮޅުވީ، ހަތަރު ލަނޑު ޖަހައިގެންނެވެ. އެ ޓީމުގެ މުހައްމަދު އިޔާދު އަލީ ހެޓްރިކެއް ހެދިއިރު، އަނެއް ލަނޑު ޖެހީ މުހައްމަދު ނާއިލް އެވެ.

ހޯނޑެއްދޫގެ އިސްމާއިލް މަމްދޫހު، އެ ޓީމަށް ލީޑުނަގައިދީފައިވަނިކޮށް، އިތުރު ވަގުތުގައި ފިޔޯރީ އަށް އެއްވަރުކޮށްދިނީ، އަބްދުﷲ މަހީލް މުއްތަލިބް އެވެ.

ހިތަދޫ ޓީމުގެ އީމާން ލަނޑު ޖެހުމަށް ފަހު އުފާފާޅުކުރަނީ.---- ފޮޓޯ: އަދަދު ސްޕޯޓްސް / އިމޭޖަސް.އެމްވީ

އައްޑޫގެ ގްރޫޕް އޭގެ އެއް ވަނަ ހޯދީ ރޭ އެންމެ ފަހުގެ ޗެމްޕިއަން، ފޭދޫއާ 2-2 އިން އެއްވަރުކުރި މަރަދޫ އެވެ. މަރަދޫ އާއި ފޭދޫ އަށް ހަތަރު ޕޮއިންޓާ އެކު ސެމީގެ ޖާގަ ލިބޭއިރު، މަރަދޫން ލަނޑުގެ ތަފާތުން އެއް ވަނަ ހޯދި އެވެ. މި ގްރޫޕްގެ ފުލަށް ދިޔަ މަރަދޫފޭދޫ ވަނީ ދެ މެޗުން ބަލިވެފަ އެވެ.

ގްރޫޕް ބީގައި، ހިތަދޫން ރޭ ކުޅުނު މެޗުގައި ވަނީ 1-1 އިން މީދޫއާ އެއްވަރުވެފަ އެވެ. މި ގްރޫޕްގެ އެއް ވަނަ ހޯދީ ހަތަރު ޕޮއިންޓާ އެކު ހިތަދޫ އެވެ. އަދި، ދެ ވަނަ އަށް ދިޔަ މީދޫ އަށް ވަނީ ދެ ޕޮއިންޓް ލިބިފަ އެވެ. އަދި، ފުލަަށްދިޔަ ހުޅުދޫ ކެޓީ އެއް ޕޮއިންޓާ އެކު އެވެ.

ފޭދޫ އަށް ރޭގެ މެޗުގައި ދެ ލަނޑު ވެސް ޖަހައިދިނީ މުހައްމަދު ސަޔަމް ސައީދު އެވެ. މަރަދޫގެ ލަނޑުތައް ޖެހީ ހަސަން ޝިއުސް އާއި ހަސަން ނޫރިޝް އެވެ.

ހިތަދޫގެ އީމާން ނަޒީރު އެ ޓީމަށް ލީޑުނަގައިދީފައިވަނިކޮށް، މީދޫން އެއްވަރުކުރީ ހިތަދޫގެ މުހައްމަދު ސަބާހު މަންސޫރު (ސަބަޓީ) އަތުން ބައިކޮޅަށް ވަން ގޯލުންނެވެ.

ގޯލްޑަން ފުޓްސަލް ޗެލެންޖުގައި މިއަދު ހަވީރު ހަތަރު މެޗު އަދި މިރޭ އަށް މެޗު ކުޅޭނެ އެވެ.

16:00 - އއ. މާޅޮސް - އއ. ބޮނޑުފޮޅުދޫ

16:00 - އއ. މަތިވެރި - އއ. ތޮއްޑޫ

17:00 - ގއ. ދާންދޫ - ގއ. ކޮލަމާފުށި

17:00 - ގއ. ގެމަނަފުށި - ގއ. ކަނޑުހުޅުދޫ

--------------------------------------------

20:00 - މ. ކޮޅުފުށި - މ. ނާލާފުށި

20:00 - މ. މުލައް - މ. މަޑުއްވަރީ

21:00 - ފ. ފީއަލީ - ފ. ބިލެއްދޫ

21:00 - ފ. ދަރަނބޫދޫ - ފ. މަގޫދޫ

22:00 - ކ. ކާށިދޫ - ކ. ގުޅި

22:00 - ކ. ދިއްފުށި - ކ. ގުރައިދޫ

23:00 - ކ. މާފުށި - ކ. ގާފަރު

23:00 - ގއ. ނިލަންދޫ - ގއ. ވިލިނގިލި