މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އަށް ޓެކްނޮލޮޖީއާ ގުޅުން ހުރި މަސައްކަތްތައް ކޮށްދޭނެ ޓެކްނޮލޮޖީ ސޮލިއުޝަންސް ޕްރޮވައިޑާއެއް ހޯދުމަށް މިއަދު އިއުލާންކޮށްފި އެވެ.

އެމްއޭސީއެލްއިން ބުނީ ޓެކްނޮލޮޖީ ސޮލިއުޝަންސް ޕްރޮވައިޑާއެއް ހޯދަނީ އެ ކުންފުނިން އަންގާ ގޮތަކަށް، ޓެކްނޮލޮޖީއާ ގުޅުންހުރި ހިދުމަތްތައް ފަރުމާކޮށް ބިނާކޮށް ފޯރުކޮށްދިނުމާއި ބެލެހެއްޓުމަށް ކަމަށެވެ.

އެކަމަށް އެދި ކުރިމަތިލާ ފަރާތްތަކަކީ އިކޮނޮމިކް މިނިސްޓްރީގައި ކުދި އަދި މެދު ފަންތީގެ ވިޔަފާރިއެއްގެ ގޮތުގައި ރަޖިސްޓްރީވެފައިވާ ފަރާތަކަށްވާން ޖެހޭނެ ކަމަށާއި ޓީމުގައި މަދުވެގެން ފަސް ދިވެހިން ވެސް ހިމެނެންވާނެ ކަމަށް އެމްއޭސީއެލް އިން ބުންޏެވެ.

ޓެކްނޮލޮޖީ ސޮލިއުޝަންސް ޕްރޮވައިޑާއަކަށް ޝައުގުވެރިވާ ފަރާތްތަކުން [email protected] މެދުވެރިކޮށް ޝައުގުވެރިކަން ފާޅުކުރަން ވަނީ އެދިފަ އެވެ. ޝައުގުވެރިކަން ފާޅުކުރާ ފަރާތްތަކުން އެ ފަރާތެއްގެ ފުރިހަމަ ނަމާއި އެޑްރެސް، އީމެއިލް، ގުޅޭނެ ނަންބަރުތައް އަދި ގާބިލުކަން އަންގައިދޭ ލިޔުން ހުށަހަޅަން ޖެހެ އެވެ.

ޝައުގުވެރިވާ ކުންފުނީގެ ގާބިލުކަން އަންގައިދިނުމަށް ޕްރޮފައިލް، މުވައްޒަފުންގެ ތަފްސީލް (ޕެންޝަން އޮފީހުންދޭ މުވައްޒަފެއްކަން އަންގައިދޭ ލިޔުން) އަދި ރަޖިސްޓްރޭޝަން ސެޓްފިކެޓް ހުށަހަޅަން ޖެހެ އެވެ.

އެމްއޭސީއެލްއިން ބުނީ ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކާ ކަނޑައެޅިފައިވާ އުސޫލެއްގެ ދަށުން މަސައްކަތް ހަވާލުކުރާނެ ކަމަށެވެ.