މީލާދުގެ 2000 އަހަރު ކުރިން ފެށިގެން އިންސާނުން ބޭނުންކުރަމުން އަންނަ، ދުނިޔޭގައި އެންމެ މަގުބޫލު މި ކާނާއަކީ މިއަދު އާ ތައާރަފަކަށް ބޭނުންވާނެ އެއްޗެއް ނޫނެވެ. އޭރު ކޮކޯ އަކީ ހަމައެކަނި މީރު ރަހައެއްގެ ގޮތުގައި ބެލެވުނު އެއްޗެއް ކަމުގައި ވިޔަސް، މިއަދު ސައިންސާއި ދިރާސާތަކުން ވަނީ ޑާކް ޗޮކްލެޓަކީ ސިއްހީ ގޮތުން އަގުނުކުރެވޭ ފަދަ "ސުޕަ ފުޑް" އެއްކަން ސާބިތުވެ އެވެ.

ކޮކޯގެ މިންވަރު ގިނަ، އަދި ހަކުރުގެ މިންވަރު މަދު މި ބާވަތުގެ ޗޮކްލެޓަކީ ހިތުގެ ދުޅަހެޔޮކަމުން ފެށިގެން ސިކުނޑީގެ ތޫނުފިލިކަމާ ހަމައަށް ހައިރާންކުރުވަނި ފައިދާތަކެއް ފޯރުކޮށްދޭ އެއްޗެކެވެ.

ޑާކް ޗޮކްލެޓުގައި ހިމެނޭ ފްލެވަނޯލްސް އަކީ ލޭހޮޅިތައް ދޫކޮށްލައި، ލޭގެ ދައުރުވުން ފަސޭހަކޮށްދޭ މާއްދާއެކެވެ. މީގެ ސަބަބުން ލޭގެ ޕްރެޝަރު އެއްވަރެއްގައި ހިފެހެއްޓުމަށާއި، ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު ކުޑަކޮށްދިނުމަށް އެހީތެރިވެދެއެވެ.

ހަށިގަނޑުގައި އުފެދޭ ބޭކާރު މާއްދާތަކުން ސެލްތަކަށް ލިބޭ ގެއްލުންތައް ކުޑަކުރުމަށް އެންޓިއޮކްސިޑެންޓްސް ބޭނުންވެއެވެ. ޑާކް ޗޮކްލެޓަކީ ގިނަ އަދަދަކަށް މިފަދަ މާއްދާތައް އެކުލެވޭ އެއްޗެކެވެ. މިއީ ދިފާއީ ނިޒާމު ވަރުގަދަކޮށްދީ، މުސްކުޅިވުން ލަސްކޮށްދޭ ކަމެކެވެ.

ޑާކް ޗޮކްލެޓް ކެއުމުން ސިކުނޑިއަށް ލޭ ފޮނުވައިދޭ މިންވަރު އިތުރުވެއެވެ. މީގެ ސަބަބުން ކަންކަމަށް ސަމާލުކަންދޭ މިންވަރު އިތުރުވުމާއި، ހަނދާންގަދަވުމަށް ބާރުއަޅައެވެ. އަދި އޭގައި ހިމެނޭ ކެފެއިން އާއި ތިއޯބްރޯމިންގެ ސަބަބުން ވަގުތުން ވަގުތަށް ސިކުނޑި ތާޒާކޮށްދެއެވެ.

ހާސްކަމާއި ފިކުރުތަކުން ދުރުވުމަށް ވެސް ޑާކް ޗޮކްލެޓަކީ އެހީތެރިއެކެވެ. މީގައި ހިމެނޭ މާއްދާތަކުން ހަށިގަނޑުގައި "އުފާވެރިކަން" އިހުސާސްކޮށްދޭ ހޯރމޯންތައް އުފައްދައިދެއެވެ. މީގެ އިތުރުން ސްޓްރެސް ހޯރމޯންއެއް ކަމަށްވާ ކޯޓިސޯލްގެ މިންވަރު ދަށްކޮށްދިނުމަށް ވެސް އެހީވެއެވެ.

މީގައި ހިމެނޭ ބައޯއެކްޓިވް މާއްދާތަކަކީ އިރުގެ ނުރައްކާތެރި ދޯދިތަކުން ހަންގަނޑަށް ލިބޭ ގެއްލުންތައް ކުޑަކޮށްދީ، ހަންގަނޑަށް ލޭ ފޯރުވައިދޭ މިންވަރު އިތުރުކޮށްދީ، ހަންގަނޑު އޮމާންކޮށް ބެހެއްޓުމަށް އެހީވާ މާއްދާތަކެކެވެ.

ޑާކް ޗޮކްލެޓުން ފައިދާ ލިބޭނީ ރަނގަޅު ބާވަތް އިހުތިޔާރު ކޮށްގެންނެވެ. 70 ޕަސެންޓު ނުވަތަ އެއަށްވުރެ ގިނައިން ކޮކޯ ހިމެނޭ ޗޮކްލެޓް ގަންނާށެވެ. ހަކުރު ގިނަ ޗޮކްލެޓްތަކާ ދުރުވާށެވެ. އަދި މާ ގިނައިން ކެއުމުގެ ބަދަލުގައި، ދުވާލަކު ކުޑަ އެތިކޮޅެއް (30-60 ގްރާމް) ބޭނުންކުރުން ފުދޭނެއެވެ.

ޑާކް ޗޮކްލެޓުން ލިބޭ މުހިންމު މާއްދާތައް

ކޮކޯގެ މިންވަރު 70 އާއި 85 ޕަސެންޓާ ދެމެދުގައި ހުންނަ 50 ގްރާމްގެ ޑާކް ޗޮކްލެޓް އެތިކޮޅަކުން، ދުވާލަކަށް ހަށިގަނޑަށް ބޭނުންވާ މާއްދާތަކުގެ ބޮޑު ބައެއް ފޯރުކޮށްދެއެވެ:

• ފައިބަރު: 5.5 ގްރާމް (މިއީ ހަޖަމުކުރުމުގެ ނިޒާމަށް ބޭނުންތެރި ބައެކެވެ).
• އަޔަން: ދުވާލަކަށް ބޭނުންވާ މިންވަރުގެ 33 ޕަސެންޓު (ލޭގެ ރަތް ސެލްތައް އުފެއްދުމަށް)
• މެގްނީޒިއަމް: ދުވާލަކަށް ބޭނުންވާ މިންވަރުގެ 28 ޕަސެންޓު (ނާރުތަކާއި މަސްތަކުގެ މަސައްކަތަށް)
• ކޮޕަ: ދުވާލަކަށް ބޭނުންވާ މިންވަރުގެ 98 ޕަސެންޓު (ހަކަތަ އުފެއްދުމަށް)
• މެންގަނީޒް: ދުވާލަކަށް ބޭނުންވާ މިންވަރުގެ 43 ޕަސެންޓު (ކަށިތަކުގެ ދުޅަހެޔޮކަމަށް)

މައުލޫމާތު: ހެޑްލައިން