މީގެ ދެ އަހަރު ކުރިން ހދ. ކުޅުދުއްފުށީ ހުޅަނގު އުތުރު ފަރުމައްޗަށް ބީއްސާލި ބާޖާއި އެ ބާޖުން އެ ސަރަހައްދަށް އެޅިފައި ހުރި ހިލަތައް އިއްޔެއިން ފެށިގެން 10 ދުވަހުގެ ތެރޭގައި ނަގަން ސިވިލް ކޯޓުން ހުކުމްކޮށްފި އެވެ.

މި ބާޖު ނަގައިދޭން އަމުރުކޮށްދިނުމަށް އެދި މައްސަލަ ސިވިލް ކޯޓަށް ހުށަހެޅީ އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިންނެވެ.

ސީޝަލްސްގައި ރަޖިސްޓްރީކޮށްފައިވާ އައުރިސް އެސްއެސް ލިމިޓެޑުގެ 'ޓިއަންޖިން' ނަމަކަށް ކިޔާ މި ބާޖު ކުޅުދުއްފުށީ ފަރަށް ބީހުނީ، ޖުލައި 14، 2023 ގަ އެވެ. މި ބާޖު ބީހުނީ 6000 ޓަނުގެ ހިލަ ބަރުކޮށްގެން ދަތުރުކުރަނިކޮށެވެ.

މި އުޅަނދު އެތަނުން ނަގަން އީޕީއޭއިން ފުރަތަމަ އެންގީ އެ ސަރަހައްދަށް ލިބުނު ގެއްލުން ދިރާސާކުރަން ހިންގާ ޖޮއިންޓް ސާވޭގެ ކުރިންނެވެ. ނަމަވެސް އެ ދިރާސާތައް ނިންމާ، ޖޫރިމަނާ ނުކުރަން އެ އަހަރުގެ އޮކްޓޫބަރު 21، ގައި އީޕީއޭއިން ނިންމިއިރު ވެސް މި ބާޖު އެތަނުން ނުނަގަ އެވެ.

އީޕީއޭއިން ކޯޓަށް ހުށަހަޅާފައިވާ ލިޔުންތަކުގައިވާ ގޮތުގައި މި ބާޖު ފުންކުރުމުގެ މަސައްކަތް އައުރިސްއިން ހަވާލުކުރީ ބީމްސީ ސްލިޕްވޭ އެންޑް ސަލްވޭޖު ކުންފުންޏާ އެވެ. ނަމަވެސް ބާޖު ފުންކުރުމުގެ މުއްދަތު ތިން ފަހަރެއްގެ މަތިން އިތުރުކޮށްދިނުމުން ވެސް ފަރުމަތިން ބާޖު ނުނަގަ އެވެ.

މައްސަލައިގެ ކަންހިނގައިދިޔަ ގޮތުގެ ޓައިމްލައިން

• ޖުލައި 14، 2023 - ބާޖު ފަރަށް ބީހުން
• ޖުލައި 17، 2023 - ތަފްސީލު ރިޕޯޓު ފޮނުވަން އީޕީއޭއިން ސިޓީ ފޮނުވުން
• ޖުލައި 20، 2023 - މުއްދަތު އިތުރުކޮށްދޭން އެދުން
• ޖުލައި 25، 2023 - އިންސިޑެންޓް ރިޕޯޓު އީޕީއޭއަށް ލިބުނ
• އޮގަސްޓު 7، 2023 - ޖޮއިންޓް ސާވޭގެ ކުރިން އުޅަންދު ނަގަން އެނގުން
• އޮގަސްޓު 24، 2023 - ބާޖު ފުންކުރުމުގެ މަސައްކަތް އަވަސް ކުރަން އެނގުން
• ސެޕްޓެމްބަރު 4، 2023 - ބާޖުގެ މައްސަލައިގައި ކުޅުދުއްފުށި ކައުންސިލުން ސިޓީ ފޮނުވުން
• އޮކްޓޫބަރު 21، 2023 - އީޕީއޭއިން ސާވޭކުރުމަށް ފަހު ޖޫރިމަނާ ނުކުރަން ނިންމުން
• އޮކްޓޫބަރު 31، 2023 - ބާޖާއި އެތަނަށް އެޅުނު ހިލަތައް ނަގަން އެންގުން
• ނޮވެމްބަރު 1، 2023 - ބާޖު ފުންކުރުމުގެ މަސައްކަތް ބީއެމްސީއާ ހަވާލުކުރިކަން އެންގުން
• ޖެނުއަރީ 21، 2024 - 15 ދުވަހުގެ ތެރޭގައި ބާޖު ފުންކުރާނެ ކަމަށް ބުނުން
• ފެބްރުއަރީ 18، 2024 - ފެބްރުއަރީގެ ނިޔަލަށް ބާޖު ރީފްލޯޓު ކުރާނެ ކަމަށް
• މާޗު 31، 2024 - ބާޖު ފުންކުރަން 15 ދުވަހުގެ މުއްދަތެއް ދިނުން
• އޭޕްރިލް 2، 2024 - ބާޖު ނެގޭނެ ކަމަށް ބުނެ އިތުރު މުއްދަތެއް ދިނުން
• ޖެނުއަރީ 25، 2025 - މައްސަލަ ކޯޓަށް ހުށަހެޅުން

އީޕީއޭއިން މި މައްސަލަ ކޯޓަށް ހުށަހެޅީ މި އަހަރުގެ ކުރީކޮޅެވެ. މި މައްސަލައިގެ ތެރޭގައި އީޕީއޭއިން ވަނީ ބާޖާއި ހިލަތައް އެ ތަނުން ނުނަގާ ހުރުމުގެ ސަބަބުން ތިމާވެއްޓަށް ލިބެމުންދާ ގެއްލުންތަކުގެ އިތުރުން، ކުޅުދުއްފުށީ އެއާޕޯޓުގެ އޮޕަރޭޝަނަށާއި އިންފްރާސްޓްރަކްޗާއަށް ގެއްލުންވުމުގެ ފުރުސަތު އޮތް މައްސަލަ ވެސް ފާހަަގަކޮށްފަ އެވެ.

މި ބާޖު ބީހުނީ ކުޅުދުއްފުށީ އެއާޕޯޓުގެ ހުޅަނގު އުތުރު ސަރަހައްދަށެވެ. މީގެ ސަބަބުން އެއާޕޯޓުގެ ސީވޯލްއަށް ގެއްލުންވުމުގެ ފުރުސަތު އޮތުމުގެ ޝަކުވާ އެ އެއާޕޯޓު ހިންގި ރީޖަަނަލް އެއާޕޯޓްސް ކުންފުނިންނާއި ކުޅުދުއްފުށީ ސިޓީ ކައުންސިލުން ވެސް އީޕީއޭއާ ހިއްސާކުރި އެވެ.