ވިޔަފާރި ކުރުމަށާއި މުވައްޒަފުން ނެގުމަށާއި ތަންތަން ކުއްޔަށް ދިނުމަށް ލޯކަލް ކައުންސިލަށް ގާނޫނުން ލިބިދީފައިވާ ބާރުތައް ހަނި ކުރަން ހުށަހަޅާފައިވާ ބިލާ ދެކޮޅު ކަމަށް ނ. ކެނދިކުޅުދޫ އަދި ށ. ފޯކައިދޫ ކައުންސިލުން ވެސް ބުނެފި އެވެ.

ސަރުކާރުން މަޖިލީހަށް ހުށަހަޅާފައިވާ ބިލާ ދެކޮޅު ކަމަށް ކެނދިކުޅުދޫ އަދި ފޯކައިދޫ ހިމަނައިގެން މިހާތަނަށް ހަ ކައުންސިލަކުން ވަނީ ބުނެފަ އެވެ. ބިލާ ދެކޮޅު ކަމަށް ދެން ބުނެފައި ވަނީ، އއ. ބޮޑުފުޅަދޫ އާއި އެ އަތޮޅު މާޅޮހާއި ހދ. ކުޅުދުއްފުށި ސިޓީ އާއި ލ. ގަން ކައުންސިލެވެ.

ކެނދިކުޅުދޫ އަދި ފޯކައިދޫ ކައުންސިލުން ވަކިވަކިން ގެޒެޓު ކުރި ދެ ނޫސް ބަޔާނެއްގައި ބުނެފައި ވަނީ ލާމަރުކަޒީ ގާނޫނަށް ސަރުކާރުން ހުށަހަޅާފައިވާ އިސްލާހުތައް ގާނޫނުއަސާސީ ހިލާފު ކަމަށެވެ. އަދި ބުނެފައި ވަނީ ސަރުކާރުން މަސައްކަތް ކުރަނީ "ހީލަތްތެރި" ގޮތެއްގައި ރަށްރަށުގެ ރައްޔިތުންގެ ބާރު ކަނޑުވާލަން ކަމަށެވެ.

"މި އިސްލާހުތަކަކީ، ދިވެހި ޖުމްހޫރިއްޔާގެ ގާނޫނުއަސާސީގެ އަށް ވަނަ ބާބުގައި ބަޔާންކުރާ ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުސޫލުން ހިންގުމާގުޅޭ އުސޫލުތަކާއި މުޅި ޖުމްލަ ގޮތެއްގައި ދިވެހި އެންމެހައި ރައްޔިތުންގެ ދިމިގްރާތީ އުންމީދުތަކަށް ފާޅުގައި ގޮންޖަހައި، ނިޒާމީ ސިފައެއްގައި ރަށްރަށުގެ ރައްޔިތުންގެ ބާރު ކަނޑުވާލުމުގެ ގޮތުން ހީލަތްތެރި ސިފައެއްގައި އަޅަމުންގެންދާ ފިޔަވަޅުތަކުގެ ސިލްސިލާއަށް އިތުރުވެގެންދާ ބޮޅެއް،" އެ ބަޔާންތަކުގައި ބުނެފައިވެ އެވެ.

ކެނދިކުޅުދޫ އާއި ފޯކައިދޫ ކައުންސިލުން އިތުރަށް ބުނެފައި ވަނީ، ލާމަރުކަޒީ ގާނޫނަށް ސަރުކާރުން ގެންނަން އުޅޭ އަދި ގެނެސްފައިވާ އިސްލާހުތަކުން، ލާމަރުކަޒީ ނިޒާމު ކުރިއެރުވުމަށްޓަކައި ބޭނުންވާ ހެޔޮ ނިޔަތް ސަރުކާރުގައި ނެތްކަން ހާމަވާ ކަމަށެވެ.

"މުޅި ޖުމްލަ ގޮތެއްގައި ސަރުކާރުގެ ފަރާތުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށަހަޅާފައިވާ އިސްލާހުތަކުން ސާފުވެގެންދާ ހަގީގަތަކީ ދިވެހިރާއްޖޭގެ ލާމަރުކަޒީ ނިޒާމު ކުރިއަރުވައި ބާރުވެރިކުރުމުގެ ކުޑަމިންވަރެއްގެ ވެސް ހެޔޮ ނިޔަތެއް ނެތްކަން،" ކައުންސިލުން ބުނެފައިވެ އެވެ.

ލާމަރުކަޒީ ގާނޫނަށް ސަރުކާރުން ގެންނަން އުޅޭ އިސްލާހުތަކާ ދެކޮޅަށް މާލޭ ސިޓީގެ މޭޔަރު އާދަމް އާޒިމް އާއި އައްޑޫ ސިޓީގެ މޭޔަރު އަލީ ނިޒާރު އަދި ވ. އަތޮޅު ކައުންސިލުގެ ރައީސް ސުޖާއު އަލީ ވެސް ވަނީ ވާހަކަ ދައްކަވައިފަ އެވެ.

ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ސުޕަ މެޖޯރިޓީ އޮތް މަޖިލީހަށް ހުށަހަޅާފައިވާ އެ ބިލު އޮތް ގޮތަށް ފާސްވެއްޖެ ނަމަ، ކައުންސިލުތަކަށް ލިބިދީފައިވާ ބާރުތަކުގެ ތެރެއިން، ވިޔަފާރި ކުރުމާއި މުވައްޒަފުން ނެގުމާއި ތަރައްގީގެ ޕްރޮޖެކްޓު ހިންގުމާއި ތަންތަން ކުއްޔަށް ދިނުމަށް ލިބިދީފައިވާ ބާރުތައް އެއްކޮށް ކަހަލަ ގޮތަކަށް ނެތިގެންދާނެ އެވެ.

ވިޔަފާރި ކުރަން ކުރިމަތި ކުރުވާ ހުރަސްތައް

• އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުން
• އުމްރާނީ ތަރައްގީއަށް ކޮންމެހެން ބޭނުންވާ މަސައްކަތެއް ނޫނީ ނުކުރެވުން
• ވިޔަފާރީގެ އިންވެސްޓްމަންޓު ނުވަތަ ރައުސުލްމާލު 10 މިލިއަން ރުފިޔާއަށް ވުރެ ބޮޑުވުން
• ކައުންސިލުން މިހާރު ކުރަމުންދާ ވިޔަފާރިތައް މަތީގައި ބަޔާން ކުރާ އުސޫލަކާ ހިލާފުވެއްޖެ ނަމަ އެ ވިޔަފާރިއެއް ތިން މަސްދުވަސް ތެރޭ ހުއްޓާލަން ޖެހުން

ތަންތަން ކުއްޔަށް ދިނުމަށް އެޅި ހުރަސްތައް

• އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުން.

މާލީ ކަންކަމަށް ނުފޫޒު ފޯރުވުން

• ފިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުން ކައުންސިލުތަކުގެ ބޭންކް އެކައުންޓުތައް ބަލަހައްޓަން މަޖުބޫރު ކުރުވުން
• ފިނޭންސް މިނިސްޓްރީ އިން ބޭނުންވެއްޖެ ހިނދެއްގައި ކައުންސިލުގެ ބޭންކު އެކައުންޓުގެ ސްޓޭޓްމަންޓެއް ދިނުމަށް މަޖުބޫރު ކުރުވުން

ކައުންސިލުގެ މަސައްކަތަށް ހުރަސް އެޅުން

• ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ބަންދު ކުރުން
• ކައުންސިލެއްގެ އުމުރުގައި ބާކީ އަހަރެއް އޮތް ނަމަ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ ސަރަހައްދުގެ ކުއްޔަށް ދޫކުރުން މަނާ ކުރުން
• ކައުންސިލެއްގެ އުމުރުގައި ބާކީ އަހަރެއް އޮތް ނަމަ ތަރައްގީގެ އާ މަޝްރޫއުއެއް ހިންގުން މަނާ ކުރުން