ސުޕްރީމް ކޯޓުގެ ފަނޑިޔާރުކަމަށް ކުރިމަތިލެއްވި 12 ބޭފުޅުންގެ ތެރެއިން އެންމެ ގިނަ މާކްސް ހައިކޯޓުގެ ފަނޑިޔާރު، މުހައްމަދު ސަލީމް، އާއި އެ ކޯޓުގެ ކުރީގެ ފަނޑިޔާރު، އަބްދުالله ހަމީދުއަށް ޖުޑީޝަލް ސާވިސް ކޮމިޝަނުން ދީފި އެވެ.

ސުޕްރީމް ކޯޓަށް ކުރިމަތިލެއްވި ބޭފުޅުންގެ ތެރެއިން އެ ކޯޓަށް އައްޔަނުކުރަން ފޮނުވާނީ ކޮން ދެ ބޭފުޅެއްގެ ނަންކަން ފާސްކުރާނީ މިއަދު 2:00 ގައި އޮންނަ އެ ކޮމިޝަނުގެ ބައްދަލުމުގަ އެވެ. ސަލީމް އާއި ހަމީދުއަށް ލިބުނު މާކްސްގެ ތަފުސީލެއް އަދި ނޭނގެ އެވެ.

ސަލީމް އަކީ ހައިކޯޓުގެ ލީގަލް އޮފިސަރުގެ މަގާމުގައި 12 އަހަރު ހޭދަކުރެއްވުމަށްފަހު އެ ކޯޓުގެ ފަނޑިޔާރު ކަމަށް ވަޑައިގެންނެވި ބޭފުޅެކެވެ. އެ ކޯޓުގެ ފަނޑިޔާރުކަމަށް އޭނާ އައްޔަނުކުރީ އޯގަސްޓު 9، 2022 ގަ އެވެ.

އަބްދުالله ހަމީދުއަކީ ކުރީގެ ރައީސް އަބްދުالله ޔާމީންގެ ސަރުކާރުން އޭރުގެ ފަނޑިޔާރުންނަށް ދިން ފުލެޓުތައް ގަބޫލު ކުރެއްވި މައްސަލަ ޖޭއެސްސީން ތަހުގީގުކޮށް، ރައްޔިތުންގެ މަޖިލީހަށް ފޮނުވުމުން ޖޫން 6، 2022 ގައި ހައި ކޯޓުގެ ފަނޑިޔާރުކަމުން ވަކިކުރެއްވި ބޭފުޅެކެވެ.

އެ ކޯޓުގެ ފަނޑިޔާރުކަމަށް ދެން ކުރިމަތިލެއްވި ބޭފުޅުންނަކީ:

• މުހައްމަދު ފައިސަލް
• މުހައްމަދު ވަހީދު އިބްރާހިމް
• އިބްރާހިމް އަލީ
• މުހައްމަދު އިބްރާހިމް
• އަބްދުލް ގަނީ މުހައްމަދު
• ސުޖާއު އުސްމާން
• އަހުމަދު ހައިލަމް
• މުހައްމަދު ރާގިބު އަހުމަދު
• އައިޝަތު ފަޒްނާ އަހުމަދު
• މަރްޔަމް ނިހާޔަތު

ސުޕްރީމް ކޯޓުގެ ބެންޗުން ދެ ޖާގަ ހުސްވީ ސަރުކާރުން ނުފޫޒު ފޯރުވައި، ފަނޑިޔާރުކަމުން ޑރ. އަޒްމިރާލްދާ ޒާހިރާއި ފަނޑިޔާރު މަހާޒް އަލީ ޒާހިރު ވަކިކުރުމުންނެވެ. ޖޭއެސްސީން ނިންމި ގޮތަށް ދެ ފަނޑިޔާރުން ވަކިކުރަން ރައްޔިތުންގެ މަޖިލީހުން ފާސްކުރީ މެއި 14، ގަ އެވެ.

ޖޭއެސްސީއިން ސުޕްރީމް ކޯޓުގެ ފަނޑިޔާުރުންތަކެއްގެ މައްސަލަ ކުއްލި ގޮތަކަށް ބަލަން ފެށީ، ސިޔާސީ ޕާޓީތަކުން ބޭނުންވެއްޖެ ހާލަތެއްގައި ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހުގެ މައްސަލަ އެ ކޯޓުން ބަލަން ފެށުމުންނެވެ.

ފަނޑިޔާރުންގެ މައްސަލަ ބަލާ ކޮމިޓީގައި ޖޭއެސްސީން ހިމެނީ ތިން މެންބަރެކެވެ. އޭގެ ތެރޭގައި ރައީސް މުއިއްޒު އައްޔަން ކުރައްވާފައިވާ ދެ މެންބަރަކު ހިމެނެ އެވެ. އެއީ ޖޭއެސްސީއަށް ރައީސް އައްޔަން ކުރައްވަންޖެހޭ މެންބަރުގެ އިތުރުން ސިވިލް ސާވިސް ކޮމިޝަނުގެ ރައީސް އެވެ.