ގައުމީ ސަލާމަތާ ގުޅޭ މަޝްރޫއުތަކަށް އިންވެސްޓްކުރާ ބަޔަކަށް ކްރޮސް ސަބްސިޑީގެ ދަށުން އިންވެސްޓްމަންޓުގެ މުގާބިލުގައި ފަޅުތަކާއި ރަށްތައް ދޫކުރާ ގޮތަށް ހޯދާ ފައިސާގެ އަދަދު 100 މިލިއަން ޑޮލަރަށް އިތުރުކުރަން ސަރުކާރުން ނިންމައިފި އެވެ.

ސަރުކާރުން މިހާތަނަށް އެއްވެސް ތަފުސީލެއް އާންމުކޮށްފައި ނުވާ މި މަޝްރޫއުގެ މައުލޫމާތު ހިމަނައި ރައީސުލްޖުމްހޫރިއްޔާގެ ގަރާރެއް އިސްލާހު ކުރުމަށް ފަހު އެންމެ ފުރަތަމަ ގެޒެޓުގައި ޝާއިއުކުރީ މާޗު 21، ގަ އެވެ. އޭރު ހޯދަން ހިމަނާފައި އޮތީ 15 މިލިއަން ޑޮލަރެވެ.

އެ ގަރާރަށް މިއަދު ގެނައި އިސްލާހުގައި ބަދަލުކޮށްފައިވަނީ މި މަޝްރޫއުތަކަށް ހޯދާ އިންވެސްޓްމަންޓުގެ އަދަދު އެކަންޏެވެ.

މީގެކުރިން އޮތް ގޮތުން ގައުމީ ސަލާމަތާ ގުޅޭ މަޝްރޫއުތަކަށް އިންވެސްޓްކުރާ ބަޔަކަށް ކްރޮސް ސަބްސިޑީގެ ދަށުން އިންވެސްޓްމަންޓުގެ މުގާބިލުގައި ދެނީ މާލެ އަތޮޅުގެ އެންމެ ބޮޑު އެއް ފަޅު ކަމުގައިވާ ހިތްމިޔަ ފަޅު ކަމަށް މައުލޫމާތު ލިބިފައިވެ އެވެ.

މާލެ އަތޮޅުގެ ހުޅަނގު ބިތުގައި އޮންނަ މި ފަޅުގެ ބޮޑުމިނަކީ ޖުމްލަ 712 ހެކްޓަރެވެ. އިތުބާރުހުރި މަސްދަރަކުން އަދަދު ނޫހަށް ކަށަވަރުކޮށްދީފައިވާ ގޮތުގައި ޓޫރިޒަމް މިނިސްޓްރީން ކްރޮސް ސަބްސިޑީގެ ގޮތުގައި ފަޅުތަކާއި ބިންތައް ކުއްޔަށް ދިނުމަށް އެކުލަވާލާފައިވާ އުސޫލުގެ ދަށުން ހިސާބުކުރުމުން ހިތްމިޔަ ފަޅަށް ޖެހޭ އަންދާސީ އަގަކީ 38,650,000 ޑޮލަރެވެ.

ކްރޮސް ސަބްސިޑީ އުސޫލު އޮންނަ ގޮތުން ސީދާ ފައިސާ އިންވެސްޓުކުރާކަށް ވެސް ނުޖެހެ އެވެ. ސަރުކާރުން ބުނާ މަޝްރޫއުގެ އަމަލީ މަސައްކަތް ކުރާ ގޮތަށް ވެސް މި އުސޫލުގެ ދަށުން ފަޅުތަކާއި ރަށްތައް ދޫކުރެވެ އެވެ.

އެހެން ކަމުން މި އަދަދަށް ފައިސާ ދޭ ނުވަތަ އަމަލީ ގޮތުން އިންވެސްޓްކުރާ ބަޔަކަށް ބަދަލުގެ ގޮތުގައި އެހެން ފަޅެއް ނުވަތަ، ހިތްމިޔަފަޅާއެކު އެހެން ފަޅުތަކެއް ދޭނެ ކަމަށް ބެލެވެ އެވެ. ސަރުކާރުން ގެންގުޅޭ ވަންހަނާ ސިޔާސަތުގެ ދަށުން މިކަމާ ގުޅޭ އެއްވެސް މައުލޫމާތެއް މިހާތަނަށް ހާމަކޮށްފައި ނުވެ އެވެ.

ގައުމީ ސަލާމަތާ ގުޅޭ މަޝްރޫއުތަކެއް ހިންގަން ބޮޑު އިންވެސްޓްމަންޓެއް ހޯދަން ސަރުކާރުން އިއުލާނުކޮށްފައި މިވަނީ ދިވެހި އަސްކަރިއްޔާއަށް މިސައިލްތަކެއް ގަންނަން އުޅޭކަމުގެ އަޑުތަކެއް ފެތެރިފައިވަނިކޮށެވެ.

ސޯޝަލް މީޑިއާގައި ދައުރުވަމުންދާ ޕޯސްޓުތަކުގައި ބުނާ ގޮތުން ދިވެހި ސަރުކާރުން ސާފޭސް-ޓު-އެއާ މިސައިލްތަކަކާއި އެ ތަކެތި ހަރުކުރެވޭ ފެންވަރުގެ މަނަވަރެއް ގަންނަނީ ތުރުކީގެ އަސްކަރީ ކުންފުންޏެއް މެދުވެރިކޮށެވެ.

މި ސަރުކާރުން ޑްރޯންތައް ގަތީ ވެސް ތުރުކީގެ ކުންފުންޏަކުންނެވެ. އެ ޑްރޯންތައް ގަންނަން 37 މިލިއަން ޑޮލަރު ހަރަދުކުރިކަން އެކި މަސްދަރުތަކުން ޔަގީންވެފައިވީ ނަމަވެސް ސަރުކާރުން ވަނީ ޑްރޯންތައް ގަންނަން ކުރި ހަރަދު ހާމަކުރަން ދެކޮޅުހަދާފަ އެވެ.