އއ. ރަސްދޫގައި މިދިޔަ މަހުގެ 24، ގައި ހިނގި އަލިފާނުގެ ހާދިސާގައި ފިހުނު އަންހެން މީހާ މިރޭ މަރުވެއްޖެ އެވެ.

އަންހެން މީހާ މަރުވިކަން ރަސްދޫ ކައުންސިލުގެ ރައީސް، މުހައްމަދު ނާހިދު އަދަދު ނޫހަށް ކަށަވަރު ކޮށްދިނެވެ. އޭނާ ވިދާޅުވީ އަންހެން މީހާ މަރުވި ހަބަރު ލިބުނީ މިރޭ އިރާކޮޅު 7:30 ހާއިރު ކަމަށެވެ.

31 އަހަރުގެ އެ އަންހެން މީހާ މަރުވީ އައިޖީއެމް ހޮސްޕިޓަލުގެ އައިސީޔޫގައި، ވެންޓިލޭޓަރުގެ އެހީގައި ފަރުވާ ދެމުން ދަނިކޮށެވެ. އެނާ އާއެކު އެ ހާދިސާގައި ފިހުނު އޭނާގެ ފިރިމީހާއަށް ވެސް ފަރުވާ ދެމުން ދަނީ އައިސީޔޫގަ އެވެ.

ރަސްދޫ ކައުންސިލްގެ ރައީސް މުހައްމަދު ނާހިދު މި ނޫހަށް ވިދާޅުވީ އެ ދެމަފިރިން ދިރިއުޅެމުންދިޔަ ގޭގެ ކޮޓަރީގައި ހިނގި އަލިފާނުގެ ހާދިސާގައި ފިހުނީ އެ ދެމަފިރިން އެކަނި ކަމަށެވެ.

އެ ދެމަފިރިންގެ ފަސް އަހަރުގެ ތުއްތު ކުއްޖަކު ހުންނައިރު، އަލިފާނުގެ ހާދިސާ ހިނގި ވަގުތު އެ ކުއްޖާ ކޮޓަރީގައި ނޫޅޭ ކަމަށް ވެސް އޭނާ ބުންޏެވެ.

އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެ އެވެ. އަދި މިކަމާ ގުޅިގެން ފުލުހުން ވެސް އަދި މިހާތަނަށް އެއްޗެއް ބުނެފައެއް ނުވެ އެވެ.