މިސްރުގެ ރެޑް ސީ ރިސޯޓް ސިޓީގެ ހާގާޑާގައި ސަބްމެރިންއެއް އަޑިއަށް ގޮސް ހަ މީހަކު މަރުވެއްޖެ އެވެ.

މިސްރުގެ ސަރުކާރުގެ އޮފިޝަލަކާ ހަވާލާދީ ރޮއިޓާސް އިން ބުނީ އެ ސަބްމެރިން އިން ދަތުރުކުރަނިކޮށް މަރުވީ ހަ ޓޫރިސްޓުން ކަމަށެވެ. އެއީ ކޮން ގައުމެއްގެ ޓޫރިސްޓުން ކަމެއް ހާމަނުކުރެ އެވެ.

ބައެއް ރިޕޯޓްތައް ބުނާގޮތުން ސަބްމެރިންގައި ދަތުރުކުރަނިކޮށް މަރުވީ ރަޝިއާއަށް ނިސްބަތްވާ ޓޫރިސްޓުންނެވެ.

މައުލޫމާތު ލިބޭ ގޮތުގައި ސަބްމެރިންގައި 40 ވަރަކަށް މީހުން ދަތުރުކުރިއިރު އޭގެ ތެރެއިން 29 މީހުން ވަނީ ސަލާމަތް ކޮށްފަ އެވެ. ބައެއް މީހުންނަށް ލިބުނު ޒަހަމްތަކަށް ފަރުވާ ހޯދަމުންދާ ކަމަށް ވެސް ރިޕޯޓްތައް ބުންޏެވެ.

މިދިޔަ ނޮވެމްބަރު މަހު ހާގާޑާގައި ފަތުރުވެރިންނާ އެކު ދަތުރުކުރި ބޯޓެއް އަޑިއަށް ގޮސް 11 މީހުން ގެއްލިފައި ނުވަތަ މަރުވެފައިވެ އެވެ.