އަންކާރާ، ތުރުކީ (މާޗު 24) - ތުރުކީގައި 2028 ވަނަ އަހަރު އޮންނަ ރިޔާސީ އިންތިހާބުގައި އިދިކޮޅު ޕާޓީގެ ފަރާތުން ވާދަކުރާނެ ކަމަށް ބެލެވޭ އިސްތަންބޫލްގެ މޭޔަރު އެކްރެމް އިމާމޮގްލޫ ޖަލުގައި ބަންދުކުރުމާ ގުޅިގެން އެ ގައުމުގައި ކުރަމުންދާ މުޒާހަރާތަކުގައި ހިނގަމުންދާ ކަންކަމުގެ ޒިންމާ އިދިކޮޅު ފަރާތްތަކުން ނަގަން ޖެހޭ ކަމަށް ރައީސް ރަޖަބް ތައްޔަބު އުރުދުގާން ވިދާޅުވެއްޖެ އެވެ.

އިމާމޮގްލޫ އާއި އޭނާގެ އަރިސް ހަތަރު މީހަކު ކޮރަޕްޝަނާއި ޓެރަރިޒަމްގެ ތުހުމަތުގައި ވަނީ ބަންދުކޮށްފަ އެވެ. އެ މީހުންގެ މައްޗަށް އަވަސް ޝަރީއަތްތަކެއް ހިންގައި ޖަލަށްލުމަށް ހުކުމްް ކުރާނެ ކަމަށް ބެލެވެ އެވެ. އެ ހުރިހާ ތުހުމަތަކަށް އިމަމޮގްލޫ ވަނީ އިންކާރު ކުރައްވާފަ އެވެ.

އަންކާރާގައި ބޭއްވި ވަޒީރުންގެ މަޖިލީހުގެ ބައްދަލުވުމަކަށް ފަހު ވާހަކަ ދައްކަވަމުން އުރުދުގާން ވަނީ އިދިކޮޅު ރިޕަބްލިކަން ޕީޕަލްސް ޕާޓީން މުޒާހަރާތަކުގައި ހަމަނުޖެހުން ހިންގުމަށް ހިތްވަރު ދޭ ކަމަށް ތުހުމަތު ކުރައްވާފަ އެވެ.

"ޒަހަމްވި ފުލުހުންނާއި، ފިހާރަތަކުގެ ބިއްލޫރިތައް ތަޅައިގެން ދިއުމާއި، ހަލާކުވެފައިވާ ރައްޔިތުންގެ މުދަލުގެ ޒިންމާ އުފުލަން ޖެހޭނީ މައި އިދިކޮޅު ޕާޓީން. މި ހުރިހާ ކަމަކަށް ސިޔާސީ ގޮތުން މަޖިލީހުގައި އަދި ގާނޫނީ ގޮތުން ޝަރުއީ ދާއިރާއިން އެ ޕާޓީ ޖަވާބުދާރީ ކުރުވާނަން" އުމުރުން 71 އަހަރުގެ އުރުދުގާން އިންޒާރު ދެއްވި އެވެ.

ތުރުކީގެ ބައެއް ސިޓީތަކުގައި އެއްވުންތައް ބޭއްވުން މަނާކުރި ނަމަވެސް ޖެހިޖެހިގެން ފަސް ދުވަހު މުޒާހަރާތައް ވަނީ ބާއްވާފަ އެވެ. އެތައް ލައްކަ ބަޔަކު ބައިވެރިވަމުންދާ މުޒާހަރާތައް ހުއްޓުމެއް ނެތި ކުރިއަށްގެންދާނެކަން އިދިކޮޅު ޕާޓީން ވަނީ އިއުލާންކޮށްފަ އެވެ.

މުޒާހަރާތަކާ ގުޅިގެން މިހާތަނަށް 1،133 މީހުން ވަނީ ހައްޔަރުކޮށްފަ އެވެ. އާދީއްތަ ދުވަހުގެ ރޭގެ މުޒާހަރާތައް ރޫޅާލުމަށް ހާލަތާ ނުބައްދަލު ބާރުގެ ބޭނުން ފުލުހުން ކުރުމުން އެތައް މުޒާހަރާވެރިންނަކަށް ހޮސްޕިޓަލުގައި ފަރުވާ ދޭން ވަނީ ޖެހިފަ އެވެ.

އުމުރުން 54 އަހަރުގެ އިމާމޮގްލޫއާ ދެކޮޅަށް ސިޔާސީ ދައުވާއެއް އުފުލާފައި މިވަނީ އޭނާއަށް ރިޕަބްލިކަން ޕީޕަލްސް ޕާޓީގެ ރިޔާސީ ޓިކެޓު އަރުވަން ތައްޔާރުވެފައި ވަނިކޮށެވެ. އެ ޕާޓީގެ އެތެރޭގެ ޕްރައިމަރީގައި 15 މިލިއަން ވޯޓު އޭނާ ކާމިޔާބު ކުރެއްވި އެވެ.

އޭނާގެ ސަޕޯޓަރުން ބުނަމުންދާ ގޮތުގައި މި ދައުވާތަކަކީ ތުރުކީގައި އިންސާފު ނުލިބޭނެ ކަމުގެ ހެއްކެކެވެ. "އިމާމޮގްލޫއާ މެދު އަމަލުކުރަމުން ދަނީ ބޭއިންސާފުން. އެއްވެސް ސަބަބެއް ނެތި އެ މީހުން އޭނާ ޖަލަށް ލީ،" އުމުރުން 22 އަހަރުގެ ޒުވާނަކު ރޮއިޓާސްއަށް ބުންޏެވެ.

އުރުދުގާންގެ ސަރުކާރުން އިދިކޮޅު ފަރާތްތަކާ މެދު އަމަލުކުރަމުންދާ ގޮތުން ތުރުކީގައި ދިގު މުއްދަތެއް ވަންދެން ސިޔާސީ ހަލަބޮލިކަމާއި ނުތަނަވަސްކަން އޮންނާނެ ކަމަށް ތަޖުރިބާކާރުން ލަފާކުރެ އެވެ.