އިސްތަންބޫލް، ތުރުކީ (މާޗު 23) - ތުރުކީގައި 2028 ވަނަ އަހަރު އޮންނަ ރިޔާސީ އިންތިހާބުގައި އިދިކޮޅު ޕާޓީގެ ފަރާތުން ވާދަކުރާނެ ކަމަށް ބެލެވޭ އިސްތަންބޫލްގެ މޭޔަރު އެކްރެމް އިމަމޮގްލޫ އާއި އޭނާގެ އަރިސް ހަތަރު މީހަކު ކޮރަޕްޝަނާއި ޓެރަރިޒަމްގެ ތުހުމަތުގައި ޖަލަށްލުމަށް އެ ގައުމުގެ ޕްރޮސެކިއުޓަރުން އެދިއްޖެ އެވެ.

ތުރުކީގެ ރައީސް ރަޖަބް ތައްޔަބު އުރުދުގާންގެ އެންމެ ބޮޑު ވާދަވެރިޔާ ކަމަށްވާ އިމަމޮގްލޫ ހައްޔަރުކުރީ ބުދަ ދުވަހު އެވެ. އޭނާއަށް ކުރާ ތުހުމަތުތަކުގެ ތެރޭގައި ޓެރަރިސްޓް ގްރޫޕަކަށް ވާގިވެރިވުން ވެސް ހިމެނެ އެވެ.

މިއަދުގެ ވަގުތެއްގައި އޭނާގެ ބަންދާ މެދު ކޯޓުން ގޮތެއް ނިންމާނެ އެވެ. އެ ހުރިހާ ތުހުމަތަކަށް އިމަމޮގްލޫ ވަނީ އިންކާރު ކުރައްވާފަ އެވެ.

އިމަމޮގްލޫ ޕާޓީ ކަމަށްވާ ރިޕަބްލިކަން ޕީޕަލްސް ޕާޓީން ވަނީ މިއީ ސިޔާސީ ނުފޫޒު ފޯރުވައިގެން ކުރިއަށްގެންދާ ޝަރީއަތެއް ކަމަށް ބުނެފަ އެވެ. ނަމަވެސް، އުރުދުގާންގެ ސަރުކާރުން ވަނީ ޖުޑީޝަރީއަށް ނުފޫޒު ނުފޯރުވާ ކަމަށް ބުނެފަ އެވެ.

ތުރުކީގެ ގާނޫނުތައް ބުނާ ގޮތުން އޭނާގެ ބަދަލުގައި ސަރުކާރުން މޭޔަރުގެ މަގާމަށް މީހަކު ހަމަޖެއްސިދާނެ އެވެ.

މި މައްސަލައިގައި ތުރުކީގައި އަންނަނީ ބޮޑު މުޒާހަރާތަކެއް ކުރަމުންނެވެ. މުޒާހަރާތައް ރޫޅާލުމަށް ކަރުނަ ގޭހާއި ޕެޕާ ސްޕްރޭ ބޭނުންކޮށްފައިވާއިރު މިހާތަނަށް 323 މީހުން ވަނީ ހައްޔަރުކޮށްފަ އެވެ.

ހިޔާލު ހޯދުމުގެ ބައެއް ވޯޓުތަކުގައި އުރުދުގާންގެ މައްޗަށް އިމަމޮގްލޫ ކުރި ހޯދަމުންދާއިރު އޭނާއަށް ރިޔާސީ ޓިކެޓު ކުޑަދުވަސްކޮޅެއްގެ ތެރޭގައި އެރުވުމަށް އޮތީ ރާވާފަ އެވެ.

ދެން އޮންނަ ރިޔާސީ އިންތިހާބެއްގައި އުރުދުގާންއަށް ވާދައެއް ނުކުރެވޭނެ އެވެ. 22 އަހަރު ވަންދެން ތުރުކީގައި ވެރިކަން ކުރެއްވި އުރުދުގާން 2028 ގައި ވާދަކުރަން ބޭނުންވާނަމަ ގާނޫނުއަސާސީ ބަދަލުކުރަން ޖެހެ އެވެ.