މިފަހަރު ވެސް ރޯދަ މަހަށް ހާއްސަކޮށްގެން އަދަދު ނޫހުން ތަފާތު ރަހަތަކުގެ ވީޑިއޯ ޝޯ ވަނީ ގެނެސްދެ އެވެ. ރޯދަ މަހުގެ ފުރަތަމަ ހަފުތާގައި ގެނެސްދިން ޝޯތައް އަލުން ބަލާލުމަށް ހިއްސާ ކޮށްލަމެވެ.
ލުއި ޝޯ
ލުއި ޝޯ މި ފަހަރު ހާއްސަކޮށްފައި ވަނީ މުއިޒީޝަނުންނާއި ލަވަކިޔުންތެރިންނަށެވެ. މަޝްހޫރު ޕްރެޒެންޓަރު އަބްދުﷲ މުހައްމަދު ހުށަހަޅައިދޭ މި ޝޯގެ ފުރަތަމަ އެޕިސޯޑުގައި ގެނެސްދިނީ މަޝްހޫރު ލަވަކިޔުންތެރިޔާ ފައްތޭ އެވެ.
ނުވަދިހައިގެ އަހަރުތަކުގައި ދިވެހިންގެ ހިތްތަކުގައި ރަސްކަންކުރި އެއް އަޑަކީ އޭނާގެ އެވެ. އޭރު މަޝްހޫރު ވި ފައްތޭގެ ލަވަތަކާއި އަމިއްލަ ރާގުތަކުގެ މަގުބޫލު ކަމަކަށް އަދިވެސް ބަދަލެއް ނާދެ އެވެ. މި ޝޯގައި އޭނާ ބައެއް ލަވަތައް ލައިވްކޮށް ހުށަހަޅައި ދިނެވެ. ލަވަ ކިޔުމާއި އެތައް ދުވަހެއްގައި ދުރުގައި ހުއްޓަސް އެ އަޑުގެ ހިތްގައިމު ކަމަށް ބަދަލެއް ނާދެ އެވެ. މި ޝޯގައި ފައްތޭ ގިނަ ވާހަކަތަކެއް ކިޔައިދީފައިވެ އެވެ.
ތަރިންގެ އަދަދު
ސޮނީ ސްޕޯޓްސްއާ ގުޅިގެން ހަފުތާއަކު އެއް ދުވަހު ގެނެސްދޭ މި ސީޒަންގެ ބުރާސްފަތި ދުވަހުގެ އެޕިސޯޑުގައި ހުށަހަޅައި ދިނީ، މަޝްހޫރު އަދި ކާމިޔާބު ވޮލީބޯޅަ ކުޅުންތެރިޔާ އައިޝަތު މާޖިދާ ކުރި ދަތުރާއި ކުރިމަތިވި ގޮންޖެހުންތަކާއި، ފޮނި ކާމިޔާބީތަކުން އެހެން އެތްލީޓުންނަށް ކިޔައދޭ ވާހަކަ އެވެ.
ސުންދުސް
މިއީ އަދަދު ނޫހުން ކޮންމެ ރޯދަ މަހެއްގައި ގެނެސްދޭ ދީނީ ޕްރޮގްރާމެވެ. މި ރޯދަ މަހުގެ ކޮންމެ ތިން ދުވަހަކުން އެއް ދުވަހު ސުންދުސްގެ އާ ޕްރޮގްރާމެއް ގެނެސްދޭނެ އެވެ. އެންމެ ފަހުން ގެނެސްދިން ޕްރޮގްރާމުގެ މައުލޫއަކީ ރުޅި އެވެ.
އެހާރުން
މާ ސިންގާ އިންޑިއާ ކަނޑުގެ ސިއްރުތައް ދެނެގަންނަން ބޭނުން ހެއްޔެވެ؟
ތާރީހު ދިރާސާކުރާ ދެ ޒުވާނުން ކަމުގައިވާ އަލާ ދީދީ އާއި ޒައިދު މި ފަހަރު ވެސް ހުޅުވައިލަނީ ތާރީހުގެ ހާއްސަ ސަފުހާ އެކެވެ. މިފަހަރުގެ "އެހާރުން" ސީރީޒުގެ ފުރަތަމަ އެޕިސޯޑުގައި ގެނެސްދީފައި ވަނީ އިންޑިއާ ކަނޑުގައި ދިވެހީންގެ އެހާރާއި މިހާރުގެ ވާހަކަތަކެވެ. އިންޑިއާ ކަނޑު މުހިއްމުވެފައިވާ ސަބަބުތަކެވެ.
ކުޅިކޮށް
މިއީ މި ޕްރޮގްރާމު ގެނެސްދޭ ފަސް ވަނަ ރޯދަ މަހެވެ. އަދަދު ނޫހުގެ އެންމެ ގިނަ ދުވަސްވީ އެއް ޕްރޮގްރާމެވެ. "ކުޅިކޮށް" އިންސާފު ކުރަން ހުސައިން ފިޔާޒު މޫސާ މި ފަހަރު ފުރަތަމަ ދައުވަތު ދިނީ، އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު އަށެވެ.
މި ޕްރޮގްރާމުގައި ޝިފާޒު ރައީސް ޑރ މުހައްމަދު މުއިއްޒަށް ވަރަށް ބޮޑެތި ތުހުމަތުތައް ކުރެއްވި އެވެ.
ރޭހުރި
އަދަދު ނޫހުގެ މި މަރުކާގެ ދަށުން ފުރަތަމަ ޕްރޮގްރާމެއް ގެނައީ 2021 ވަނަ އަހަރު އެވެ. ރަދީފުގައި "ރޭހުރި" މި ބަހުގެ މާނައަކީ، "ރެއަށް ކެއްކި ތަކެތިން ހެނދުނަށް އިތުރުވެފައި ހުރި" އެވެ. މި މާނައިން ދޭހަވާ ގޮތަށް، ޕްރޮގްރާމުގައި ގެނެސްދީފައި ވަނީ ރޯދަ މަހު ގޭގައި ކައްކާ ތަކެތީގެ ބާކީ ބައިން އަނެއް ދުވަހު ރަހަމީރު އެއްޗެއް ތައްޔާރުކުރާނެ ގޮތެވެ.
"ރޭހުރި"ން ގެނެސްދޭ ކާ ތަކެތި ތައްޔާރުކޮށް، މި ޝޯ ހުށަހަޅައިދެނީ އާމިނަތު ނަޝީދާ (ނަޝީ) އެވެ.
