މިނިސްޓްރީތަކެއް އެއްކޮށްލައި ވަޒީރުންގެ މަޖިލީހަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނެވި ބަދަލާ ގުޅިގެން ބަދަލު ކުރެއްވި ވަޒީރުންނަށް ރުހުން ހޯދަން މަޖިލީހަށް ފޮނުވައިފި އެވެ.

މަޖިލީހުގެ ރުހުން ހޯދަން ފޮނުވާފައި ވަނީ ފިނޭންސް މިނިސްޓަރު، މޫސާ ޒަމީރު އާއި ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އާއި އެގްރިކަލްޗާ އެންޑް ވެލްފެއާ މިނިސްޓަރު، ޑރ. މަރިޔަމް މާރިޔާގެ އިތުރުން ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބުގެ ނަމެވެ.

އެ ބޭފުޅުންނަކީ މީގެ ކުރިން ވެސް ވަޒީރުންގެ މަޖިލީހުގައި ތިއްބެވި ބޭފުޅުންނެވެ. ނަމަވެސް މަޖިލީހުގެ ރުހުން އަލުން ހޯދަނީ މިނިސްޓްރީތަކެއް އެއްކޮށްލައި ގެނައި ބަދަލާ ގުޅިގެންނެވެ.

މިދިޔަ ޑިސެމްބަރު 26، ގައި ރައީސް މުއިއްޒު ގެންނެވި ބަދަލުގެ ދަށުން ހައުސިން މިނިސްޓްރީ އުވާލައި، އެ މިނިސްޓްރީގެ ދަށުން ހިންގަމުންދިޔަ ޕްލޭނިންގެ މަސައްކަތްތައް ފިނޭންސަށް އަދި ހައުސިންގެ މަސައްކަތްތައް ކޮންސްޓްރަކްޝަން މިނިސްޓްރީއަށް ވަނީ ބަދަލުކޮށްފަ އެވެ.

އެ ބަދަލު ގެންނެވުމަށްފަހު ހައުސިން މިނިސްޓަރަކަށް ހުންނެވި ޑރ. އަލީ ހައިދަރު ބަދަލު ކުރެއްވީ ހަޔާ އެޑިއުކޭޝަން މިނިސްޓަރަށެވެ. ހަޔާ އެޑިއުކޭޝަން މިނިސްޓަރުކަމުގައި ހުންނެވި ޑރ. މަރިޔަމް މާރިޔާ ބަދަލު ކުރެއްވީ އެގްރިކަލްޗާ އެންޑް އެނިމަލް ވެލްފެއާއަށެވެ.

އެ ބޭފުޅުންނަށް ރުހުން ދިނުމާމެދު ގޮތެއް ނިންމާނީ ކަމާބެހޭ ކޮމިޓީން މައްސަލަ ދިރާސާ ކުރުމަށްފަހު މަޖިލީހުގެ ތަޅުމަށް ކޮމިޓީގެ ރިޕޯޓު ހުށަހެޅުމުންނެވެ.